Ömerjan hemdul: "Akamni 'heshemetchiliktin cheklesh' hökümnamisi sirliq we endishilinerlik"

Muxbirimiz shöhret hoshur
2020-04-15
Share
rozi-haji-hemdul-karxanichi-bina.jpg "Shinjang rozi haji soda cheklik shirkiti" binasining modéli.
RFA/Gülchéhre

Shinjang rozi haji soda shirkitining aka-uka sahibliri rozi hemdul bilen memet abdulning türkiyediki inisi ömerjan hemdul yéqinda xitay sot organlirining tor arxipliridin akisi memet hemdulning "Heshemetchilik (yuqiri istémal) tin cheklen'genliki" heqqide bir hökümname uchratqan. Hökümnamide jazaning sirtta ijra qilinidighanliqi isharetlen'gen hem mezkur höküm chiqqili 3 hepte bolghan bolsimu, emma ömerjan hemdul akisining a'ilisige qaytqanliqi heqqide héchqandaq uchur alalmighan. Muxbirimizning éniqlashliri dawamidimu alaqidar xadimlar we kishiler memet hemdulning ehwali heqqide héchqandaq melumat bérelmidi. Ömerjan hemdul bu sirliq höküm seweblik akisining teqdiridin endishe qilmaqta.

Ömerjan hemdul yéqinda tor arxipliridin akisi memet hemdul heqqide bir hökümname uchratqan. "Heshemetchilik (yuqiri sewiyediki istémal) tin cheklesh buyruqi" namidiki bu hökümname "Junggo qanun ijra'atliri uchurliri" namidiki tor bette élan qilin'ghan. Bu yil 3‏-ayning 24‏-küni chiqirilghan bu hökümde mehkumning hawa we déngiz sepirige chiqishqa bolmaydighanliqi, aliy derijilik mashinagha olturush we aliy méhmanxanilarda yétishqa bolmaydighanliqi shundaqla muqim mülük sétiwélishigha yol qoyulmaydighanliqi buyrulghan.

Ömerjan hemdul hökümnamidiki bu mezmunlardin memet hemdulning melum bir jazagha uchrighanliqi we jazaning sirtta ijra qilinidighanliqini perez qilghan we akisi bilen emdilikte téléfonda bolsimu bir körüshüsh mumkinchilikini kütken. Lékin höküm chiqqili bügün del 22 kün bolghan bolsimu, u akisining öyige qaytqanliqi heqqide héchqandaq uchur alalmighan. Korladiki alaqidar xadimlar memet hemdulning délosi heqqide pütünley xewiri yoqluqini bayan qildi.

Qeyt qilinishiche, memet hemdul üstidiki "Heshemetchiliktin cheklesh" hökümi korla sheherlik sot mehkimisi teripidin chiqirilghan. Emma bu sottiki xadimlarmu mezkur höküm we memet hemdulning qoyuwétilgenliki heqqide uchur bérelmidi.

"Beydu" uchur ambirida tonushturulushiche, "Heshemetchiliktin cheklesh" belgilimisi xitayda adette bir terep qilish qiyin bolghan délolar üchün 2010‏-yili tüzülgen we 2015‏-yildin bashlap ijra qilinishqa bashlighan. Melum bolushiche, bu peqet parixor emeldar we qerzdar shirket xojayinlirini jazalan'ghandin kéyinmu döletning mal-mülkini buzup-chéchishining aldini élish üchün tüzülgen iken.

Ikki akisining az dégen 100 milyon dollarliq meblighi barliqi, diniy étiqadliri seweblik bankidin qerz élip baqmighanliqini ilgiri sürgen ömerjan hemdul mezkur hökümni a'ilisige tewe mal-mülükning musadire qilghanliqining yaki uni musadire qilishqa urunushning ishariti dep qaraydiken.

Téléfonimizni qobul qilghan korladiki "Térrorluqning aldini élish ishxanisi" ning bir xadimimu memet hemdul üstidin chiqirilghan mezkur hökümdin xewersizlikini bayan qildi.

Muhajirettiki Uyghur közetküchiler ilgiriki ziyaretlirimiz dawamida xitay da'irilirining Uyghur rayonida lagérlarni idare qilishta maliye chiqimining zor bir qismini yerlik hökümetlerge artqanliqi, Uyghur rayondiki da'irilerning bu chiqimni bir terep qilishta Uyghur soda-karxanichilarni tutqun qilish we ularning mal-mülkini musadire qilish bilen hel qilghanliqini ilgiri sürgen idi. Kanadaliq lagér tetqiqatchisi shawn jang teripidin ashkarilan'ghan bir lagér qurulushi toxtamnamisidimu qurulush chiqimini nahiyelik hökümetning üstige alidighanliqi qeyt qilin'ghan idi.

Melum bolushiche, korlada "Chilanbagh sariyi" namidiki 33 qewetlik ikki bina qed kötürüp uzun ötmey bu heywetlik binaning sahipliri rozi hemdul bilen memet hemdul tutqun qilin'ghan. Sodidiki mahirliqi we teqwaliqi bilen tonulghan bu aka-ukilar heqqide ilgiri 25 yil we 15 yilliqtin késilgenliki heqqide uchurlar tarqalghan idi.

Ömerjan hemdul ikki akisining teqdiri heqqide chiqiwatqan bir-biridin perqliq bu uchurlar heqqide türkiyediki xitay elchixana xadimliridinmu bir izahatqa érishelmigen. U nöwette ikki akisining salametlik ehwalidin, bolupmu memet hemdulning bixeterlikidin endishe qilmaqta.

Téléfonimizni qobul qilghan we burun memet hemdulning délosigha qol tiqqanliqi ilgiri sürülgen bir saqchi xadimimu memet hemdulning qoyup bérilgenliki uchuridin xewersizlikini éytti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet