Oslodiki namayish sadasi norwégiye-xitay wekilliri söhbet üstilige qeder yétip barghan

Ixtiyariy muxbirimiz ekrem
2019-05-16
Élxet
Pikir
Share
Print
Osloda élip bérilghan birleshme namayishtin bir körünüsh. 2019-Yili 15-may. Oslo, norwégiye.
Osloda élip bérilghan birleshme namayishtin bir körünüsh. 2019-Yili 15-may. Oslo, norwégiye.
RFA/Ekrem

Oslodin igiligen melumatlirimizgha asaslan'ghanda, xitay xelq qurultiyining re'isi li jyenshuning norwégiye ziyariti munasiwiti bilen 15-may küni norwégiye parlaménti aldida Uyghurlar, tibetler, wéytnamliqlar, falun'gongchilar, xitay démokratliri we xelq'ara kechürüm teshkilati qatarliq organlarning hemkarlishishida xitaygha qarshi birleshme namayish élip bérilghan.

Norwégiye Uyghur komitétining re'isi bextiyar ependining bayan qilishiche, xitay da'irilirining bu qétimqi norwégiye ziyariti 2 milyondin artuq Uyghurning jaza lagérlirida xarliniwatqanliqi xelq'arada jiddiy diqqet tartiwatqan hemde Uyghur öktichi ziyaliysi ilham toxti "Nobél tinchliq mukapati" gha namzat körsitilgen bir weziyetke toghra kelgen. Shuning bilen bir waqitta yene xitaygha qarshi namayishchilarning namayish ornini namelum xitay teshkilatlirining aldin igiliwalghanliqi norwégiyede zor ghulghula qozghighan. Mushundaq bir mezgilde élip bérilghan bu namayishni közetküchiler nahayiti köp bolghan.

Diqqetke sazawer bolghini shuki, bu qétimqi namayishta norwégiye parlaménti aldidiki meydandin ayrilip qalghan namayishchilarning xitaygha qarshi towlighan jarangliq sho'ar sadaliri norwégiye-xitay da'iriliri söhbet ötküzüwatqan zalgha qeder anglan'ghan bolup, norwégiye téléwiziye qanalliri bu sadaning xitayning söhbet üstilige qeder yétip barghanliqini xewer qilghan. Diqqetke tartidighan yene bir mesile bolsa 2 neper parlamént ezasining li jyenshu kiridighan ishik aldida "Erkinlik!" dégen xet yézilghan wiwiskini kötürüp xitaygha étiraz bildürüp turushi hemde ularning Uyghurlar arisigha kélip ulargha medet bérishi bolghan. 

Dunya Uyghur qurultiyi ijra'iye komitétining mu'awin re'isi semet abla ependimu bu qétimqi namayishning ünümining nahayiti yaxshi bolghanliqi tilgha aldi. Namayishqa qatnashqan patime xanim bolsa bu qétimqi namayishta xitayni qollighuchilar bilen xitaygha qarshi küchlerning ikki septe turup, bir birige küch körsetkenlikini eskertti. 

Bextiyar ömer ependining bildürüshiche, 17-may küni norwégiyening stiwangér shehiridimu xitaygha qarshi yene bir qétim namayish élip bérilidiken.

Toluq bet