Өй безәшни «үчләштүрүш» долқуни уйғур мәдәнийитигә бузғунчилиқ, хитай ширкәтлиригә байлиқ елип кәлгән

Мухбиримиз шөһрәт һошур
2020-01-06
Елхәт
Пикир
Share
Принт
«Бавди» базирида шәһәр аһалилири чағанлиқ асма буюмларни таллаватқан көрүнүш. 2016-Йили 16-январ, корла.
«Бавди» базирида шәһәр аһалилири чағанлиқ асма буюмларни таллаватқан көрүнүш. 2016-Йили 16-январ, корла.
uy.ts.cn

Хитай даирилри «диний әсәбийликкә қарши туруш» намида мәсчитләрни, «сотсиялистик йеңи йеза қуруш» намида миллий қияпәттики мәһәллиләрни бузған болса, әмдиликтә «үчләштүрүш» нами билән өй безәшниму хитайчилаштуруватқанлиқи ашкариланди. Мәлум болушичә, уйғур мәдәнийитигә бузғунчилиқ елип кәлгән бу «үчләштүрүш», йәни хитайчилаштуруш долқуни райондики өй сайманлири содиси қилидиған хитай карханилириға зор миқдарда пул тепиш пурсити яритип бәргән.

Вәзийәттин хәвәрдар кишиләр алдинқи айларда радийомизға учур йоллап, қәшқәр нәзәрбағда «сотсиялистик йеңи йеза» бәрпа қилиш намида мәвҗут қәдимий мәһәллиләрниң, бостанлиқ кочиларниң бузулуватқанлиқи вә аһалиләрниң катәкчә шәкилдә селинған қорулар билән толған чәт-яқидики дәл-дәрәхсиз аһалиләр райониға көчүрүлүватқанлиқи, аһалиләрниң йәнә йеңи өйләргә көчкәндә илгирики миллий түстики өй-сайманлирини ташливетишкә мәҗбурлиниватқанлиқини мәлум қилған иди. Бу һәқтә елип барған ениқлашлиримиз давамида нәзәрбағдики алақидар хадимлар бу һәқтә еғиз ечишни рәт қилди.

Йәниму илгириләп елип барған ениқлашлиримиз давамида қәшқәр йеңишәһәрдә инкастики әһвалниң әйнән давам қиливатқанлиқи мәлум болди. Йеңишәһәрдә хизмәт гурупписида вәзипә өтәватқан бир хадим өйдики гиләмләрниң төкүлүватқанлиқи, кигизләрниң елип ташланғанлиқи, буларниң орниға сафа, бәнчаң қоюлғанлиқини ашкарилиди. У йәнә бу ишларниң «үчләштүрүш» дегән нам астида мәхсус хизмәт сүпитидә орундиливатқанлиқини тилға алди.

Лагер гуваһчиси зумрәт давут районда давам қиливатқан өй безәшни хитайчилаштуруш долқуни сәвәбидин үрүмчидики өй-сайманлири дуканлириниң 2018‏-йили бир мәһәл амбарлириниң қуруқдилинип қалғанлиқини, өзиниң сода-сетиқ кәчүрмишлиригә асасән баян қилди. У сөзидә өй безәшни хитайчилаштурушниң уйғур мәдәнийитигә қарита бир бузғунчилиқ елип кәлгән болса, райондики хитай ширкәтлиригә пул тепиш пурсити яритип бәргәнликини илгири сүрди.

Хитай таратқулирида илгири хитай даирилириниң йезиларда аталмиш заманиви турмуш адитигә көчүш үчүн 4 милярд 196 милйон йүән пул аҗратқанлиқи, бу пул билән йеза аһалилириниң өй безәклирини йеңичә түскә киргүзгәнликини хәвәр қилған иди. Әмма хәвәрләрдә миллий посун, миллий зоқ вә адәтләрниң чәткә қеқиливатқанлиқи тилға елинмиған иди.

Гума наһийәсидин телефонимизни қобул қилған бир аһалиму өз мәһәллисидә өй безәштә өзгириш болғанлиқини, өйлиридә кегиз-гиләмләр орниға сафалар орунлаштурулғанлиқи, һәтта җөрилири лагердин чиқип қалса, өйлирини тонумай қелиши мумкинликини тилға алған иди. Зумрәт давут буниң тәбиий бир қизиқиштики өзгириш билән әмәс, бәлки даириләрниң тәлипи, тәвсийәси, нөвити кәлгәндә буйруқи билән иҗра қилиниватқанлиқини илгири сүрди.

Пикирләр (0)
Share
Толуқ бәт