«Шәрқий түркистан вирус кризиси ярдәм мәркизи» әвәткән ярдәм пакистандики уйғурларниң қолиға тәгкән

Мухбиримиз меһрибан
2020-05-13
Share
omer-uyghur-xexpi-virus-yardem.jpg Өмәр уйғур әпәнди вә уйғур пидаийлири «шәрқий түркистан вирус кризиси ярдәм мәркизи» ниң иқтисадий ярдимигә рәһмитини билдүрмәктә вә сетивелинған ярдәм буюмлирини тарқитиш алдида турмақта. 2020-Йили 11-май, пакистан.
Ömer Uyghur Ependi teminligen

Пакистандики «өмәр уйғур вәхпи» ниң башлиқи өмәр әпәндиниң радийомизға билдүрүшичә, «өмәр уйғур вәхпи» йеқинда «шәрқий түркистан вирус кризиси ярдәм мәркизи» тәрипидин йолланған иқтисадий ярдәмни тапшурувалған. Мәзкур ярдәм 8-май күнидин башлап пакистанниң равалпинди, исламабад қатарлиқ шәһәрлиридә яшайдиған уйғурларға тарқитилишқа башлиған.

11-Май күни радийомиз зияритини қобул қилған өмәр әпәндиниң билдүрүшичә, улар 8-май күни биринчи түркүмдики иқтисадий ярдәмни равалпиндидики турмуш қийинчилиқи бар 150 тәк уйғур аилисигә вә исламабадтики бир қисим уйғур оқуғучиларға тарқитип бәргән. Улар 11-май дүшәнбә күни ифтардин кейин йәнә 70 уйғур аилигә йемәк-ичмәк, көктат қатарлиқ қошумчә турмуш буюмлирини тарқитидикән. Өмәр әпәндиниң билдүрүшичә, улар йеқин арида йәнә пакистанниң хитай билән чеградаш гилгитта олтурушлуқ иқтисадий ярдәмгә еһтияҗлиқ уйғурлар үчүн топланған ианә ярдәмлирини тапшуруп бериш сәпиригә җиддий тәйярлиниватқан икән.

Өмәр уйғур әпәнди мәзкур ярдәмниң келиш мәнбәси һәққидә тохталди.

Униң билдүрүшичә, пакистанда өткән айдин башланған корона вируси юқумидин карантин қилиш сәвәблик пакистандики уйғурлар иқтисадий җәһәттин қийинчилиққа дуч кәлгән. Бу қетим тарқитилған ярдәм «өмәр уйғур вәхпи» ниң мураҗиитидин кейин дуня уйғур қурултийи вә шәрқий түркистан маарип җәмийити қатарлиқ муһаҗирәттики уйғур тәшкилатлириниң тәшәббуси билән қурулған «шәрқий түркистан вирус кризиси ярдәм мәркизи» тәрипидин топланған биринчи түркүмдики иқтисадий ярдәм икән.

Дуня уйғур қурултийи диний ишлар комитетиниң мудири турғунҗан алавудун әпәнди 3-айниң 26-күни дуня уйғур қурултийи, шәрқий түркистан маарип җәмийити вә һәрқайси дөләтләрдики уйғур тәшкилатлириниң баш қошуши билән қурулған «шәрқий түркистан вирус кризиси ярдәм мәркизи» ниң баш мәсули икән.

Турғунҗан әпәнди 11-май күни бу һәқтә зияритимизни қобул қилди. У «шәрқий түркистан вирус кризиси ярдәм мәркизи» ниң 3-айниң 31-күни мураҗиәт елан қилғандин буян һәрқайси дөләтләрдики уйғурлар тәрипидин топланған ярдәм пуллириниң пакистан, афғанистан, мисир, һиндистан, түркийә қатарлиқ һәрқайси дөләтләрдики иқтисадий ярдәмгә еһтияҗлиқ уйғурларға әвәтилишкә башлиғанлиқини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.