"Sherqiy türkistan wirus krizisi yardem merkizi" ewetken yardem pakistandiki Uyghurlarning qoligha tegken

Muxbirimiz méhriban
2020-05-13
Élxet
Pikir
Share
Print
Ömer Uyghur ependi we Uyghur pida'iyliri "Sherqiy türkistan wirus krizisi yardem merkizi" ning iqtisadiy yardimige rehmitini bildürmekte we sétiwélin'ghan yardem buyumlirini tarqitish aldida turmaqta. 2020-Yili 11-may, pakistan.
Ömer Uyghur ependi we Uyghur pida'iyliri "Sherqiy türkistan wirus krizisi yardem merkizi" ning iqtisadiy yardimige rehmitini bildürmekte we sétiwélin'ghan yardem buyumlirini tarqitish aldida turmaqta. 2020-Yili 11-may, pakistan.
Ömer Uyghur Ependi teminligen

Pakistandiki "Ömer Uyghur wexpi" ning bashliqi ömer ependining radiyomizgha bildürüshiche, "Ömer Uyghur wexpi" yéqinda "Sherqiy türkistan wirus krizisi yardem merkizi" teripidin yollan'ghan iqtisadiy yardemni tapshuruwalghan. Mezkur yardem 8-may künidin bashlap pakistanning rawalpindi, islam'abad qatarliq sheherliride yashaydighan Uyghurlargha tarqitilishqa bashlighan.

11-May küni radiyomiz ziyaritini qobul qilghan ömer ependining bildürüshiche, ular 8-may küni birinchi türkümdiki iqtisadiy yardemni rawalpindidiki turmush qiyinchiliqi bar 150 tek Uyghur a'ilisige we islam'abadtiki bir qisim Uyghur oqughuchilargha tarqitip bergen. Ular 11-may düshenbe küni iftardin kéyin yene 70 Uyghur a'ilige yémek-ichmek, köktat qatarliq qoshumche turmush buyumlirini tarqitidiken. Ömer ependining bildürüshiche, ular yéqin arida yene pakistanning xitay bilen chégradash gilgitta olturushluq iqtisadiy yardemge éhtiyajliq Uyghurlar üchün toplan'ghan i'ane yardemlirini tapshurup bérish sepirige jiddiy teyyarliniwatqan iken.

Ömer Uyghur ependi mezkur yardemning kélish menbesi heqqide toxtaldi.

Uning bildürüshiche, pakistanda ötken aydin bashlan'ghan korona wirusi yuqumidin karantin qilish seweblik pakistandiki Uyghurlar iqtisadiy jehettin qiyinchiliqqa duch kelgen. Bu qétim tarqitilghan yardem "Ömer Uyghur wexpi" ning muraji'itidin kéyin dunya Uyghur qurultiyi we sherqiy türkistan ma'arip jem'iyiti qatarliq muhajirettiki Uyghur teshkilatlirining teshebbusi bilen qurulghan "Sherqiy türkistan wirus krizisi yardem merkizi" teripidin toplan'ghan birinchi türkümdiki iqtisadiy yardem iken.

Dunya Uyghur qurultiyi diniy ishlar komitétining mudiri turghunjan alawudun ependi 3-ayning 26-küni dunya Uyghur qurultiyi, sherqiy türkistan ma'arip jem'iyiti we herqaysi döletlerdiki Uyghur teshkilatlirining bash qoshushi bilen qurulghan "Sherqiy türkistan wirus krizisi yardem merkizi" ning bash mes'uli iken.

Turghunjan ependi 11-may küni bu heqte ziyaritimizni qobul qildi. U "Sherqiy türkistan wirus krizisi yardem merkizi" ning 3-ayning 31-küni muraji'et élan qilghandin buyan herqaysi döletlerdiki Uyghurlar teripidin toplan'ghan yardem pullirining pakistan, afghanistan, misir, hindistan, türkiye qatarliq herqaysi döletlerdiki iqtisadiy yardemge éhtiyajliq Uyghurlargha ewetilishke bashlighanliqini bildürdi.

Toluq bet