Пакистандики хитайпәрәст уйғурларниң хитай әлчиханисидин пул еливатқанлиқини йошурғанлиқи ашкариланди

Мухбиримиз шөһрәт һошур
2019-11-25
Share
pakistan-xitay-konsul-elchixana-chek.jpg Пакистандики хитай әлчиханисиниң «чәтәлдики җуңголуқлар җәмийити» гә йезип бәргән чеки.
RFA/Shöhret Hoshur

Йеқинда пакистан ахбаратида хитайниң уйғур сиясити һәққидә мәдһийә оқуған пакистандики бир қисим хитайпәрәс уйғурлар һәққидә радийомизға кәлгән инкаста уларниң хитай әлчиханиси тәрипидин пулға сетивелинғанлиқи илгири сүрүлгән. Әмма мәзкур җәмийәтниң һәйәт әзалиридин әзимхан абдуреһим өзлириниң бүгүнгә қәдәр хитай тәрәптин һечқандақ пул алмиғанлиқини баян қилған иди. Бүгүн пакистандики паалийәтчи өмәр уйғур уларға хитай әлчиханиси тәрипидин берилгән 37 миң америка доллириниң банка талониниң копийәсини радийомизға ашкарилиди.

Пакистанда яшаватқан бир түркүм хитайпәрәст уйғурлар өткән һәптә пакистан ахбаратида уйғур вәзийити һәққидә чиқиватқан хәвәрләрниң сахта икәнлики, уйғурларниң хитай һакимийити астида яхши яшаватқанлиқини илгири сүргән. Буниңға нарази болған пакистандики уйғур паалийәтчиләрдин абдулмәҗит давут «чәтәлдики җуңголуқлар җәмийити» намида ахбаратқа юқириқи сөзләрни қилған кишиләрниң һечқайсисиниң сап уйғур әмәсликини баян қилиш билән бирликтә уларниң хитай әлчиханисидин пул еливатқанлиқи вә бу пулниң бәдилигә хитайниң тәшвиқатини қиливатқанлиқини баян қилған иди. Әмма мәзкур җәмийәтниң сабиқ баш катипи вә нөвәттики һәйәт әзаси әзимхан абдуреһим өзлириниң хитай әлчиханисидин пул алғанлиқини түптин рәт қилған иди.

Гилгиттики паалийәтчи абдумеҗит давут мәзкур җәмийәт әзалириниң гилгиттики бир қисим намрат уйғурларға һәр 3-4 айда бир қетим ун-май тарқитидиғанлиқи, уйғурлар алғини унимиса бу ун-майларни пакистанлиқларға тарқитип сүрәткә чүшидиғанлиқини вә сүрәтләрни фейсбук бәтлиридә елан қилиш арқилиқ хитай әлчиханисиға алған пули һәққидә доклат беридиғанлиқини баян қилди. У көргән аңлиғанлириға асасән мәзкур җәмийәт әзалириниң хитай әлчиханисидин алған пулиниң аз бирқисим намратларға тарқитип қоюп, көп қисмини чөнтикигә салидиғанлиқини мәлум қилди. Әмма әзимхан мана мушундақ сөз-чөчәкләрниң җәмийәттә барлиқи, әмма бирму кишиниң униң алдиға келип йүзтуранә дәп бақмиғанлиқини тилға елип, хитай әлчиханисидин һечқандақ пул алмайватқанлиқини тәкитлиди.

Пакистандики уйғурлардин бири бу җәмийәтниң мәктәпни баһанә қилип туруп хитай әлчиханидин пул алидиғанлиқи, әмма алған пули һәққидә уйғур җамаитигә һечқандақ һесаб бәрмәйдиғанлиқини тилға алди. Әмма әзимхан мәктәпкә берилидиған пулниң өзлириниң қолиға тәгмәйдиғанлиқи, биваситә мәктәпкә берилидиғанлиқини, һәтта җәмийәтниң ишхана кираси вә паалийәтлири үчүнму өз янчуқидин пул чиқиридиғанлиқини оттуриға қойди.

Бу җәмийәтниң хитайдин пул елип хитайниң тәшвиқатчилиқини қиливатқанлиқи вә пакистандики уйғурларниң образиға сәлбий тәсир йәткүзүватқанлиқини йиллардин бери тәкитләп келиватқан паалийәтчи өмәр уйғур бүгүн мәзкур җәмийәтниң пул еливатқанлиқини испатлайдиған муһим бир пакитни ашкарилиди. У радийомизға йоллиған бәш милйон 700 миң ропийә, йәни 37 миң америка доллирилиқ бир банка чекиниң копийәсидә пул алғучи тәрәп «чәтәлдики җуңголуқлар җәмийити», пул бәргүчи тәрәп «хитайниң пакистанда турушлуқ әлчиханиси» дәп йезилған. Мәзкур чәк 2017‏-йили 4 ‏-айниң 26‏-күни нәқләштүрүлгән. Чәккә хуаң фамилилик бир хитайниң имзаси қоюлған.

Паалийәтчи өмәр уйғур мәзкур җәмийәтниң уйғурларниң мәнпәәтигә зиянлиқ ишларни көп қиливатқанлиқини тәкитлисә, абдумеҗит давут уларниң бу сахтипәзликиниң чоқум пакистан һөкүмити тәрипидинму көзитиливатқанлиқи вә чоқум бир күни уларниң җазасини тартидиғанлиқини илгири сүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.