Pakistandiki xitayperest Uyghurlarning xitay elchixanisidin pul éliwatqanliqini yoshurghanliqi ashkarilandi

Muxbirimiz shöhret hoshur
2019-11-25
Élxet
Pikir
Share
Print
Pakistandiki xitay elchixanisining "Chet'eldiki junggoluqlar jem'iyiti" ge yézip bergen chéki.
Pakistandiki xitay elchixanisining "Chet'eldiki junggoluqlar jem'iyiti" ge yézip bergen chéki.
RFA/Shöhret Hoshur

Yéqinda pakistan axbaratida xitayning Uyghur siyasiti heqqide medhiye oqughan pakistandiki bir qisim xitayperes Uyghurlar heqqide radiyomizgha kelgen inkasta ularning xitay elchixanisi teripidin pulgha sétiwélin'ghanliqi ilgiri sürülgen. Emma mezkur jem'iyetning hey'et ezaliridin ezimxan abduréhim özlirining bügün'ge qeder xitay tereptin héchqandaq pul almighanliqini bayan qilghan idi. Bügün pakistandiki pa'aliyetchi ömer Uyghur ulargha xitay elchixanisi teripidin bérilgen 37 ming amérika dollirining banka talonining kopiyesini radiyomizgha ashkarilidi.

Pakistanda yashawatqan bir türküm xitayperest Uyghurlar ötken hepte pakistan axbaratida Uyghur weziyiti heqqide chiqiwatqan xewerlerning saxta ikenliki, Uyghurlarning xitay hakimiyiti astida yaxshi yashawatqanliqini ilgiri sürgen. Buninggha narazi bolghan pakistandiki Uyghur pa'aliyetchilerdin abdulmejit dawut "Chet'eldiki junggoluqlar jem'iyiti" namida axbaratqa yuqiriqi sözlerni qilghan kishilerning héchqaysisining sap Uyghur emeslikini bayan qilish bilen birlikte ularning xitay elchixanisidin pul éliwatqanliqi we bu pulning bedilige xitayning teshwiqatini qiliwatqanliqini bayan qilghan idi. Emma mezkur jem'iyetning sabiq bash katipi we nöwettiki hey'et ezasi ezimxan abduréhim özlirining xitay elchixanisidin pul alghanliqini tüptin ret qilghan idi.

Gilgittiki pa'aliyetchi abduméjit dawut mezkur jem'iyet ezalirining gilgittiki bir qisim namrat Uyghurlargha her 3-4 ayda bir qétim un-may tarqitidighanliqi, Uyghurlar alghini unimisa bu un-maylarni pakistanliqlargha tarqitip süretke chüshidighanliqini we süretlerni féysbuk betliride élan qilish arqiliq xitay elchixanisigha alghan puli heqqide doklat béridighanliqini bayan qildi. U körgen anglighanlirigha asasen mezkur jem'iyet ezalirining xitay elchixanisidin alghan pulining az birqisim namratlargha tarqitip qoyup, köp qismini chöntikige salidighanliqini melum qildi. Emma ezimxan mana mushundaq söz-chöcheklerning jem'iyette barliqi, emma birmu kishining uning aldigha kélip yüzturane dep baqmighanliqini tilgha élip, xitay elchixanisidin héchqandaq pul almaywatqanliqini tekitlidi.

Pakistandiki Uyghurlardin biri bu jem'iyetning mektepni bahane qilip turup xitay elchixanidin pul alidighanliqi, emma alghan puli heqqide Uyghur jama'itige héchqandaq hésab bermeydighanliqini tilgha aldi. Emma ezimxan mektepke bérilidighan pulning özlirining qoligha tegmeydighanliqi, biwasite mektepke bérilidighanliqini, hetta jem'iyetning ishxana kirasi we pa'aliyetliri üchünmu öz yanchuqidin pul chiqiridighanliqini otturigha qoydi.

Bu jem'iyetning xitaydin pul élip xitayning teshwiqatchiliqini qiliwatqanliqi we pakistandiki Uyghurlarning obrazigha selbiy tesir yetküzüwatqanliqini yillardin béri tekitlep kéliwatqan pa'aliyetchi ömer Uyghur bügün mezkur jem'iyetning pul éliwatqanliqini ispatlaydighan muhim bir pakitni ashkarilidi. U radiyomizgha yollighan besh milyon 700 ming ropiye, yeni 37 ming amérika dolliriliq bir banka chékining kopiyeside pul alghuchi terep "Chet'eldiki junggoluqlar jem'iyiti", pul bergüchi terep "Xitayning pakistanda turushluq elchixanisi" dep yézilghan. Mezkur chek 2017‏-yili 4 ‏-ayning 26‏-küni neqleshtürülgen. Chekke xu'ang famililik bir xitayning imzasi qoyulghan.

Pa'aliyetchi ömer Uyghur mezkur jem'iyetning Uyghurlarning menpe'etige ziyanliq ishlarni köp qiliwatqanliqini tekitlise, abduméjit dawut ularning bu saxtipezlikining choqum pakistan hökümiti teripidinmu közitiliwatqanliqi we choqum bir küni ularning jazasini tartidighanliqini ilgiri sürdi.

Toluq bet