Qaynam-tashqinliqqa tolghan 2021-yilliq "Amérika Uyghur longqisi" putbol musabiqisi ghelbilik axirlashti

Muxbirimiz nur'iman
2021-09-07
Share
Qaynam-tashqinliqqa tolghan 2021-yilliq 2021-Yilliq "Amérika Uyghur longqisi" ni talishish putbol musabiqisining hel qilghuch musabiqiside mahirlar kichik sebiylerning hemkarliqida meydan'gha kirgen körünüshi. 2021-Yili 6-séntebir.
Photo: RFA

2-Séntebirdin 6-séntebirgiche amérikaning wirjiniye shtatida ötküzülgen 2021-yilliq "Amérika Uyghur longqisi" ni talishish putbol musabiqisi 6-séntebir küni kechte ghelibilik axirlashti. Bu qétimliq musabiqe "Amérika Uyghur longqisi" ni talishish putbol musabiqisining altinchi qétimliq musabiqisi bolup "Uyghur birleshme komandisi", "Uyghur birleshme klassik komandisi", "Mariyland Uyghur komandisi", "Boston-nyu-york birleshme Uyghur komandisi", "San-fransisko Uyghur komandisi" we "Izchilar komandisi" qatarliq alte komanda qatnashti.

Eng axirqi hel qilghuch musabiqe "Uyghur birleshme komandisi" bilen "Uyghur birleshme klassik komandisi" arisida nahayiti keskin élip bérildi. Eng axirqi hel qilghuch musabiqisini körgili kelgen tamashibinlar aldinqi künlerge qarighanda xilila köp idi. Musabiqe axirqi minutlirighiche ikkide ikki netije bilen dawam qildi. Tamashibinlarmu putbolchilargha oxshashla jiddiyleshti, eng axirqi bir minutta "Uyghur birleshme komandisi" qarshi terepning wartasigha bir top kirgüzüshi bilen meydan qiyqas-chuqanlargha toldi. Köp qétim chémpiyon bolghan "Uyghur birleshme komandisi" yene bir qétim "Amérika Uyghur longqisi" ni alghanidi.

"Uyghur birleshme komandisi" ning trénéri jür'et zahir ependi radiyomizning ziyaritini qobul qilip mundaq dédi: "Bu musabiqe heqiqeten jeng meydanigha oxshash jiddiy boldi. Bir-birige qarshi komandida oynighan aka-ukilar bar, hetta bizge qarshi oynighan komandining trénéri méning inim bolidu. Méning komandam utqan waqittiki héssiyatni ipadilep bergili bolmaydu."

U yene mundaq dédi: "Ashu addiy bir dügilek top her yili yüzdin artuq yash Uyghur balilarni bir yerge jem qiliwatidu. Bu musabiqining meqsiti top tépishla emes, mushu pursette yashlirimiz arisida dostluq ornitilidu."

Ötken ikki yilda tajsiman wirusi tüpeylidin ammiwi yighilish pa'aliyetliri zor cheklimige uchrighanliqtin mezkur musabiqimu toxtitip qoyulghan idi. Shu sewebtinmu nöwettiki weziyetning yol qoyghan da'irisi ichide ötküzülgen bu musabiqe amérikining her qaysi shtatliridin kelgen Uyghur jama'itining qizghin alqishigha érishti. Putbol musabiqisi 2-séntebirdin 6-séntebirgiche her küni chüshtin kéyin altidin on'ghiche orunlashturulghan bolup, chüshtin burun musabiqe körgili kelgenler üchün dala pa'aliyetliri orunlashturuldi.

Dala pa'aliyetlirining mezmunimu nahayiti mol bolup balilar üchün mexsus balilar oyunliri orunlashturuldi. Muhajirettiki Uyghurlargha tonushluq bolghan "Uyghur kolléktipi dukini" (Uyghur collective) shop), "Ependim dukini" (Ependim shop) qatarliq tor betliride Uyghur medeniyitini, tilini tonushturup kéliwatqan yashlar bu qétimliq dala pa'aliyitigimu tor betliride sétiliwatqan herxil doppilar, özgiche layihilen'gen maykilar, balilar üchün élipbe kitabliri, söz oyun kartilirini alghach kelgen bolup dala pa'aliyitige kelgen jama'et bes-beste sétiwélishqan.

"Amérika Uyghur longqisi" ni talishish putbol musabiqisi jeryanida orunlashturulghan pa'aliyetlerge bashtin-axiri söyünüsh ichide qatnashqan süreyye ablimit xanim özining bu jeryanda hés qilghanlirini biz bilen ortaqlashti.

Süreyye xanim we jür'et zahir ependiler éytqandek bu qétimliq pa'aliyet peqetla bir putbol musabiqisi bolmastin belki, muhajirettiki Uyghurlarning özlükini saqlap qilish yolida körsitiwatqan tirishchanliqning namayendisi idi.

Musabiqige qatnashqan alte komandining biri bolghan "Izchilar komandisi" yéngidin qurulghan komanda bolup, bu komandining bir putbol mahiri ziyaritimizni qobul qilip mundaq dédi: "Bizning komanda ezaliri putbol musabiqisi jeryanida bashtin-axiri bille heriket qilduq. Dostluqimiz téximu kücheydi. Tünügünki musabiqini körgili kelgen tamashibinlarmu bek köp idi, bekmu hayajanlandim. Bu xil muhit kelgüsi ewladlirimiz üchün bek muhim".

"Uyghur birleshme komandisi" ning trénéri jür'et zahir ependining éytishiche eger imkaniyet yar berse 2022-yilliq "Amérika Uyghur longqisi" ni talishish putbol musabiqisi kanada Uyghur jama'itining qollishi bilen kanadada ötküzülidiken.

"San-fransisko qizlar walibol komandisi" ning trénéri aykézer adil kéler yili "Amérika Uyghur longqisi" ni talishish musabiqisige qizlar üchün walibol musabiqisi orunlashturush pilani barliqini, walibol musabiqisige qatnishishini xalaydighan qizlarning özi bilen alaqileshse bolidighanliqini bildürdi. Bu qétimliq musabiqining échilish murasimida san firansisikodin kelgen qizlar chonglar bilen walibol musabiqisi teshkilligen bolup, "Amérika Uyghur longqisi" ning bir türi süpitide qizlar walibol musabiqisi orunlashturush pilanini otturigha qoyushqan idi. Ular asasen amérikada tughulup chong bolghan Uyghur qizlar bolup, walibol arqiliq Uyghur qizlar birliship özlükini tépishqa intiliwatqanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet