Часа аманлиқ мудири 5 айдин бери бикарға ишләватқанлиқини билдүрди

Қәшқәр часа аманлиқ мудири өткән айда мухбиримиз билән қилған сөһбити давамида өзиниң 5 айдин бери мааш алалмиғанлиқи, әмма мааш берилмисиму пайлақчилиқни йәнила давамлаштуридиғанлиқини ейтқан иди. Уни йеқиндин тонуйдиған, нөвәттә түркийәдә яшаватқан тиҗарәтчи абдурахман һәсән мәзкур аманлиқ мудириниң маашқа тайинипла әмәс, бәлки қәшқәрдики тиҗарәтчиләр тәрипидин еғизини тувақлаш үчүн берилгән париға тайинип һаят кәчүрүватқанлиқини, өзиниңму әйни чағда униңға 5 миң йүән пара бәргәнликини ашкарилиди.

Өткән айдики сөһбитимиз давамида қәшқәрдә 120 миң кишиниң “йепиқ тәрбийәләш мәркәзлири” дә икәнликини ашкарилиған қәшқәр часа аманлиқ мудири өзиниң җ х вә дөләт бихәтәрлик тармақлириға “қулақ”, йәни пайлақчилиқ вәзиписини өтәйдиғанлиқини билдүрүш билән бирликтә өзиниң 5 айдин бери мааш алмиғанлиқини, лекин мааш берилмисиму, өзиниң узундин бери шуғуллинип келиватқан бу хизмитини давамлаштуридиғанлиқини ейтқан иди.

Бүгүн бу часа аманлиқ мудири билән бурун бир мәһәллидә олтурған вә нөвәттә түркийәдә яшаватқан тиҗарәтчи абдурахман һәсән әпәнди зияритимизни қобул қилип, часа аманлиқ мудири бурун тәминлигән қәшқәрдә 120 миң кишиниң “йепиқ тәрбийәләш” тә икәнлики һәққидики учурлириниң ишәнчликликини тәкитлиди. У йәнә часа аманлиқ мудириниң иқтисадий җәһәттики қақшашлириниң бир адәт икәнликини баян қилди.

Униң билдүрүшичә, җ х тармақлириға узун мәзгил хизмәт көрсәткән бу киши вәзипә иҗра қилиш вә иш пүттүрүштә өзи гәрчә аманлиқ мудири болсиму, әмәлийәттә аһалиләр комитети мудири вә секритаридинму үстүн имтияз вә һоқуқларға игә икән. Униң йемәк-ичмәккә асасән пул төлимәйдиғанлиқини баян қилған бу гуваһчи қәшқәрдики бир қисим тиҗарәтчиләрниң аваричиликләрниң алдини елиш, йәни бу кишиниң еғизини тувақлаш үчүн закат нами астида пара беридиғанлиқини ашкарилиди.

Абдурахман һәсән йәнә нөвәттә уйғур районида пайлақчилиқ билән шуғуллиниватқан кишиләрниң һаят йолидики натоғрилиқ вә тәртипсизлик сәвәбидин охшашла турмушта бисәрәмҗанлиқ ичидә яшаватқанлиқини илгири сүрди. У йәнә бу түрдики кишиләрниң қақшаш арқилиқ пул үндүрүшни өзлиригә адәт қиливалғанлиқини баян қилди.

Юқирида қәшқәрдә узундин бери пайлақчилиқ билән шуғуллинип келиватқан часа аманлиқ мудириниң һәр тәрәптин кирим қилип кәлгән болсиму, йәнила турмушта бисәрәмҗанлиқ ичидә яшаватқанлиқи һәққидә аңлитиш бәрдуқ.