Бо шиләй вәқәсиниң бир тәрәп қилиниши һәққидики инкаслар

Йәкшәнбә күни хитайда чуңчиң шәһириниң сабиқ шәһәр башлиқи бо шиләйниң компартийә әзалиқ салаһийитини елип ташлиғанлиқ хәвири тарқалғандин кейин, бу хәвәр хитай тор бекәтлири һәм хәлқара мәтбуатларда инкас қозғиди.
Мухбиримиз меһрибан
2012-08-27
Share
gu-keyley-sot-305.jpg Бо шиләйниң хотуни гу кәйләй хәйриводни зәһәрләп өлтүрүш җинайити билән әйиблинип сотқа тартилған көрүнүш. 2012-Йили 9-авғуст, хефий.
AFP

Өткән һәптә сабиқ чуңчиң шәһәр башлиқи бо шиләйниң аяли гу кәйләйгә әнглийилик содигәр хәйриводни зәһәрләп өлтүрүш җинайити билән әйиблинип, икки йил кечиктүрүлүп өлүм җазаси бериш һөкүм қилинғандин кейин, мәтбуатларниң диққити сабиқ чуңчиң шәһәр башлиқи бо шиләйниң бундин кейинки ақивитигә мәркәзләшти.

Хитай тор бекәтлири һәм чәтәл мәтбуатлириниң хәвәрлиридин мәлум болушичә, йеқинда бейдәйхеда ечилған хитай компартийисиниң алий дәриҗилик рәһбәрләр йиғинида бо шиләйни хитай компартийисидин қоғлап чиқириш қарари елинған. Тор бәтлиридики муназириләрдә йәнә, бо шиләйниң һазир бейҗиңдики өйигә нәзәрбәнд қилинип, мәркизий интизам тәкшүрүш комитети тәрипидин давамлиқ тәкшүрүлүватқанлиқи һәққидики учурларму тарқалған.

Түнүгүн 26-авғуст күни японийиниң “асахи шинбин” гезитидә, хитай компартийисиниң алий рәһбәрлири бейдәйхеда йиғин ечип, бо шиләйни компартийидин қоғлап чиқиришни қарар қилғанлиқи һәққидики хәвәр бесилди. Хәвәрдә йәнә хитай вәзийитини көзәткүчиләрниң, бо шиләйниң хитай компартийисидин қоғлап чиқирилғандин кейинки ақивити вә хитай вәзийитиниң бундин кейинки тәрәққият йөнилиши һәққидики қарашлири оттуриға қоюлған.

Японийиниң “асахи шинбин” гезитидә бу һәқтә тохтилип, “бо шиләйни хитай компартийисидин қоғлап чиқириш қарариниң елиниши, бейдәйхеда йиғин ечиватқан хитайниң алий дәриҗилик рәһбәрлириниң 18-қурултайдин илгирики һоқуқ талишиш күришиниң кәскинликини көрсәтмәктә. Алдинқи нөвәтлик дөләт рәиси җяң земин гуруһидикиләр бо шиләйгә еғир җаза беришни рәт қилип кәлгән болсиму, әмма нөвәттә рәислик вәзиписини өтәватқан ху җинтав вә униң тәрәпдарлири бо шиләйни қоғдаш тәшәббусиға қарши турмақта” дейилгән.

Хитай тор бекәтлиридики инкаслардиму, җяң земин тәрәпдарлириниң йеңи бир нөвәтлик рәһбәрлик қатлимида вәзипә елиш тәшәббус қилинған ғоллуқ адәмлиридин бири болған бо шиләйниң җазалиниши, җяң земин гуруһи үчүн еғир зәрбә икәнлики тәкитләнди.

Бүгүн бо шүн тор бекитидә елан қилинған бу һәқтики хәвәрдә “бо шиләйниң хитай компартийә әзалиқидин чиқирилиш қарари, бу йил күздә хитайниң йеңи рәһбәрлик қатлими һоқуқни өткүзүвалидиған хитай компартийисиниң 18-қетимлиқ қурултийиниң ечилиш һарписиға тоғра кәлди. Бу хитайда җяң земин тәрәпдарлири билән ху җинтав тәрәпдарлири оттурисида узундин буян давамлишиватқан һоқуқ талишиш күришидә ху җинтав тәрәпдарлириниң җяң земин тәрәпдарлириға бәргән йәнә бир қетимлиқ әҗәллик зәрбиси болди” дегән баянлар берилди.

Бо шиләйгә кәлгүсидә йәнә қандақ конкрет җинайәтләр артилидиғанлиқи һазирчә намәлум болсиму, әмма хитай тор бекәтлиридики инкасларда, бо шиләйниң партийидин чиқирилишниң бо шиләйгә берилгән җазаниң ахирқи нуқтиси әмәслики тәкитлинип, бо шиләйниң хитай компартийиси ичидики барлиқ сиясий вәзипилиридин қалдурулғандин кейин, қануний җазаға тартилиши мумкинлики оттуриға қоюлмақта.

Бо шиләйниң қилмишлири һәм униң аяли гу кәйләйниң қатиллиқ җинайитигә аит сәтчиликләрни америка консулханисида ашкариливәткән чуңчиң шәһәрлик сақчи идарисиниң башлиқи ваң лиҗүн “дөләт мәипийәтликини ашкарилаш” җинайити билән әйиблинип қолға елинип, хәйриводниң өлүм сәвәбини тәкшүрүшкә қатнашқан төт нәпәр юқири дәриҗилик разветчиккиму охшимиған дәриҗидики муддәтлик қамақ җазаси берилгән иди. Хитай даирилири гу кәйләй үстидин ечилған сот нәтиҗисини мәтбуатларға ашкара тарқатқан болсиму, әмма чуңчиң шәһәрлик сақчи идарисиниң башлиқи ваң лиҗүн үстидин ечилған сотниң әһвали, дөләт мәхпийәтликигә четилиду дегән баһанидә мәтбуатларға ашкариланмиған иди.

Җяң земин гуроһиниң ғоллуқ адими, чуңчиң шәһириниң сабиқ башлиқи бо шиләйниң әң йеқин адими дәп қаралған ваң лиҗүн илгири чуңчиң шәһириниң муавин шәһәр башлиқи, сақчи идарисиниң биринчи қол башлиқи қатарлиқ вәзипиләрни өтигән. У бу йил 2-айда америкиниң чеңдудики консулханисиға кирип панаһлиқ тилигәндә, бо шиләйниң өзигә қәст қилмақчи болғанлиқини билдүрүп, бо шиләйниң аяли гу кәйләйниң әнглийилик содигәр хәйриводни қәстләп өлтүргәнликигә даир сәтчиликләрни ашкариливәткәндин кейин, бу йил 3-айда бо шиләй вәзиписидин қалдурулуп, униң аяли гу кәйләй қатиллиқ җинайити билән әйиблинип қолға елинған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт