Bo shiley weqesining bir terep qilinishi heqqidiki inkaslar

Yekshenbe küni xitayda chungching shehirining sabiq sheher bashliqi bo shileyning kompartiye ezaliq salahiyitini élip tashlighanliq xewiri tarqalghandin kéyin, bu xewer xitay tor béketliri hem xelq'ara metbu'atlarda inkas qozghidi.
Muxbirimiz méhriban
2012.08.27
Share on WhatsApp
Share on WhatsApp
gu-keyley-sot-305.jpg Bo shileyning xotuni gu keyley xeyriwodni zeherlep öltürüsh jinayiti bilen eyiblinip sotqa tartilghan körünüsh. 2012-Yili 9-awghust, xéfiy.
AFP

Ötken hepte sabiq chungching sheher bashliqi bo shileyning ayali gu keyleyge en'gliyilik sodiger xeyriwodni zeherlep öltürüsh jinayiti bilen eyiblinip, ikki yil kéchiktürülüp ölüm jazasi bérish höküm qilin'ghandin kéyin, metbu'atlarning diqqiti sabiq chungching sheher bashliqi bo shileyning bundin kéyinki aqiwitige merkezleshti.

Xitay tor béketliri hem chet'el metbu'atlirining xewerliridin melum bolushiche, yéqinda béydeyxéda échilghan xitay kompartiyisining aliy derijilik rehberler yighinida bo shileyni xitay kompartiyisidin qoghlap chiqirish qarari élin'ghan. Tor betliridiki munazirilerde yene, bo shileyning hazir béyjingdiki öyige nezerbend qilinip, merkiziy intizam tekshürüsh komitéti teripidin dawamliq tekshürülüwatqanliqi heqqidiki uchurlarmu tarqalghan.

Tünügün 26-awghust küni yaponiyining “Asaxi shinbin” gézitide, xitay kompartiyisining aliy rehberliri béydeyxéda yighin échip, bo shileyni kompartiyidin qoghlap chiqirishni qarar qilghanliqi heqqidiki xewer bésildi. Xewerde yene xitay weziyitini közetküchilerning, bo shileyning xitay kompartiyisidin qoghlap chiqirilghandin kéyinki aqiwiti we xitay weziyitining bundin kéyinki tereqqiyat yönilishi heqqidiki qarashliri otturigha qoyulghan.

Yaponiyining “Asaxi shinbin” gézitide bu heqte toxtilip, “Bo shileyni xitay kompartiyisidin qoghlap chiqirish qararining élinishi, béydeyxéda yighin échiwatqan xitayning aliy derijilik rehberlirining 18-qurultaydin ilgiriki hoquq talishish kürishining keskinlikini körsetmekte. Aldinqi nöwetlik dölet re'isi jyang zémin guruhidikiler bo shileyge éghir jaza bérishni ret qilip kelgen bolsimu, emma nöwette re'islik wezipisini ötewatqan xu jintaw we uning terepdarliri bo shileyni qoghdash teshebbusigha qarshi turmaqta” déyilgen.

Xitay tor béketliridiki inkaslardimu, jyang zémin terepdarlirining yéngi bir nöwetlik rehberlik qatlimida wezipe élish teshebbus qilin'ghan gholluq ademliridin biri bolghan bo shileyning jazalinishi, jyang zémin guruhi üchün éghir zerbe ikenliki tekitlendi.

Bügün bo shün tor békitide élan qilin'ghan bu heqtiki xewerde “Bo shileyning xitay kompartiye ezaliqidin chiqirilish qarari, bu yil küzde xitayning yéngi rehberlik qatlimi hoquqni ötküzüwalidighan xitay kompartiyisining 18-qétimliq qurultiyining échilish harpisigha toghra keldi. Bu xitayda jyang zémin terepdarliri bilen xu jintaw terepdarliri otturisida uzundin buyan dawamlishiwatqan hoquq talishish kürishide xu jintaw terepdarlirining jyang zémin terepdarlirigha bergen yene bir qétimliq ejellik zerbisi boldi” dégen bayanlar bérildi.

Bo shileyge kelgüside yene qandaq konkrét jinayetler artilidighanliqi hazirche namelum bolsimu, emma xitay tor béketliridiki inkaslarda, bo shileyning partiyidin chiqirilishning bo shileyge bérilgen jazaning axirqi nuqtisi emesliki tekitlinip, bo shileyning xitay kompartiyisi ichidiki barliq siyasiy wezipiliridin qaldurulghandin kéyin, qanuniy jazagha tartilishi mumkinliki otturigha qoyulmaqta.

Bo shileyning qilmishliri hem uning ayali gu keyleyning qatilliq jinayitige a'it setchiliklerni amérika konsulxanisida ashkariliwetken chungching sheherlik saqchi idarisining bashliqi wang lijün “Dölet me'ipiyetlikini ashkarilash” jinayiti bilen eyiblinip qolgha élinip, xeyriwodning ölüm sewebini tekshürüshke qatnashqan töt neper yuqiri derijilik razwétchikkimu oxshimighan derijidiki muddetlik qamaq jazasi bérilgen idi. Xitay da'iriliri gu keyley üstidin échilghan sot netijisini metbu'atlargha ashkara tarqatqan bolsimu, emma chungching sheherlik saqchi idarisining bashliqi wang lijün üstidin échilghan sotning ehwali, dölet mexpiyetlikige chétilidu dégen bahanide metbu'atlargha ashkarilanmighan idi.

Jyang zémin gurohining gholluq adimi, chungching shehirining sabiq bashliqi bo shileyning eng yéqin adimi dep qaralghan wang lijün ilgiri chungching shehirining mu'awin sheher bashliqi, saqchi idarisining birinchi qol bashliqi qatarliq wezipilerni ötigen. U bu yil 2-ayda amérikining chéngdudiki konsulxanisigha kirip panahliq tiligende, bo shileyning özige qest qilmaqchi bolghanliqini bildürüp, bo shileyning ayali gu keyleyning en'gliyilik sodiger xeyriwodni qestlep öltürgenlikige da'ir setchiliklerni ashkariliwetkendin kéyin, bu yil 3-ayda bo shiley wezipisidin qaldurulup, uning ayali gu keyley qatilliq jinayiti bilen eyiblinip qolgha élin'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet