Turamet tursunning xitay saqchi yétekchisi wéy yüenxong teripidin étiwétilgenliki delillendi

Muxbirimiz shöhret hoshur
2017-04-11
Élxet
Pikir
Share
Print
Uyghur rayonidiki melum saqchi ponkitida, saqchining Uyghur yashni uquwatqan körünüshi.
Uyghur rayonidiki melum saqchi ponkitida, saqchining Uyghur yashni uquwatqan körünüshi.
Social Media

"Uyghur nidasi" tor radi'osi poskam nahiye ikkisu yézisidiki turamet tursun isimlik bir yashning 2014 ‏-yili 8 ‏-ayda ikkisu saqchi xadimi abdurusul teripidin étiwétilgenliki we abdurusulning körsetken bu xizmiti üchün poskamning yima yézisigha siyasiy yétekchi qilip yötkelgenlikini xewer qildi. Muxbirimizning éniqlishi dawamida ikkisu tagharchi kentidiki turamen tursunning shu yili, shu ayda xitay saqchi wéy yüenxong teripidin étiwétilgenliki we wéy yüenxongning nöwette ikkisu saqchixanisida siyasiy yétekchi bolup ishlewatqanliqi delillendi. Melum bolushiche, turamet tursun aqsugha ishlemchilikke bérish üchün saqchixanidin yol xet sorighan, saqchilar telepni ret qilghan, netijide toqunush yüz bérip turamet tursun neq meydanda étiwétilgen.

"Uyghur nidasi" torining xewiride turamet tursunni étiwetken saqchining ikkisu saqchixanisining sabiq xadimi abdurusul ikenliki we nöwette uning yima saqchixanisida siyasiy yétekchi bolup ishlewatqanliqi bayan qilin'ghan. Biz bu yip uchigha asasen awwal yima saqchixanisigha téléfon qilduq. Saqchixana xadimi abdurusul isimlik bir kishining bu saqchixanida saqchixana bashliqi bolup ishlewatqanliqini delillidi؛ emma uning téléfon nomuri we ish-izi heqqide melumat bérishni ret qildi. Biz arqidin ikkisu yézisigha téléfon qilduq. Ikkisu yézisidiki saqchi we kent sékrétarliri, turamet tursunning 2014 ‏-yili yol xéti sorap kelgen chéghida étiwétilish weqesini delillidi. Melum bolushiche, turamet tursun aqsugha paxta térishqa bérish üchün awwal kent rehberliridin ruxset sorighan. Kent sékrétari telepni keskin ret qilghan؛ kent sékrétari bilen turamet tursun arisida sürkilish yüz bergen. Kent sékrétari turamen tursunni telipini saqchixanigha éytishqa buyrughan.

Bir qoralliq qisim xadimining déyishiche, turamet tursun saqchixanigha yeng ichige kichik bir pichaqni tiqip barghan, yol xet telipi ret bolghandin kéyin, saqchixanining mu'awin bashliqi nuraxmetni pichaq bilen yarilandurghan. Bu chaghda saqchixanining siyasiy yétekchisi wéi yüenxong turamet tursun'gha qaritip ikki pay oq atqan, oqning biri turametning bilikige yene biri yürikige tekken we saqchixanida jan üzgen؛ yene bu xadimning bayan qilishiche, yarilan'ghan saqchi uzun mezgil dawalan'ghandin kéyin, nöwette yene mu'awin saqchixana bashliqi bolup wezipe ötimekte.

Ikkisu saqchi xadimi we bir kent sékrétarimu turamet tursunning wéy yüenxong teripidin étiwétilgenliki delillidi, biz ulardin turamet tursun'gha oq chiqarghuchining abdurusul ikenliki heqqide uchur barliqini éytqinimizda, ular nöwette yima yézisida wezipe ötewatqan abdurusulning familisi abla ikenlikini, eyni waqitta ikkisu saqchixanisining bashliqi ikenlikini, shu künki neq meydanda abdurusul ablaningmu barliqini we qoralliq ikenlikini, lékin abdurusulning oq chiqarghan yaki chiqarmighanliqini bilmeydighanliqini, bu déloni nahiye bir terep qilghanliqini éytti.

Yuqiriqi saqchi xadimliri turamet tursunning étiwétilishtin burun mu'awin saqchixana bashliqini birqanche yéridin pichaq bilen yarilandurghanliqini ilgiri sürmekte. Emma weqeni tunji bolup "Uyghur nidasi" radiyosigha ashkarilighan kishi, turamet tursunning saqchilardin peqet özige yol xet bérilmeslikning qanuniy asasini telep qilip gep takallashqanliqi üchünla étiwétilgenlikini melum qilghan. "Uyghur nidasi"ning torida, turamet tursunni étiwetken saqchining yalghan pakit oydurup özini aqlighanliqi bayan qilin'ghan.

Toluq bet