"Shinjang géziti" kadirlar bölümi: "Tutulghan 4 xadimimizning 3 nepiri partiye ezasi idi"

Muxbirimiz shöhret hoshur
2018-09-06
Élxet
Pikir
Share
Print
"Shinjang géziti" idarisi Uyghur bölümining xadimliri.
"Shinjang géziti" idarisi Uyghur bölümining xadimliri.
RFA/Shohret Hoshur

Ashkarilinishiche, "Shinjang géziti" ning Uyghur bölümidin 4 neper mudir we bash muherrirning atalmish "Ikki yüzlimichilik" jinayiti xitay qanun organliri teripidin emes, belki Uyghur aptonom rayonluq partkom intizam tekshürüsh komitétining tekshürüshi we qarari bilen békitilgen iken.

"Shinjang géziti" idarisining ishxana mudiri lyu jyenrong, 4 neper Uyghur xadimining tutqun qilinish délosini intizam tekshürüsh tarmaqliri bilidighanliqini ashkarilan'ghandin kéyin, biz Uyghur aptonom rayonluq intizam tekshürüsh komitétigha téléfon qilduq. Téléfonimizni qobul qilghan xadim bu délo heqqide téléfon ziyariti qobul qilalmaydighanliqini éytti.

Biz tekrar "Shinjang géziti" ning alaqidar bölümlirige téléfon qilduq. Gézitxanining kadirlar bölümide ishleydighan bir xadim tutqun ilham weli, mirkamil ablimit, memtimin obul we jür'et hajilardin 3 nepirining kompartiye ezasi ikenlikini ashkarilidi.

Melum bolushiche, bu töt neper xadimning tutqun qilinishi 7-ayning 4-küni Uyghur aptonom rayonluq intizam tekshürüsh kométidin bu gézitxanigha kelgen bir xizmet guruppisining tekshürüshidin kéyin bashlan'ghan. Tekshürüsh guruppisi xizmet bashlap 3 heptidin kéyin bash muherrir ilham weli, uningdin bir hepte kéyin qalghan 3 xadim tutqun qilin'ghan iken.

Mezkur tekshürüsh guruppisigha aktip hemkarlashqan bir xadimning bayan qilishiche, guruppa gerche gézitxanida omumyüzlük tekshürüsh élip barghan bolsimu, emma xitay we qazaq bölümidin tutulghanlar bolmighan.

Bu 4 xadim bilen bir mehel bir idare we bir ishxanida xizmet ishligen, nöwette washin'gtonda yashawatqan sabiq muxbir jür'et nizamidinning bayan qilishiche, mezkur töt neper xadim Uyghur axbarat saheside közge körün'gen shexslerdin iken. Jür'et nizamidin xizmet ornidin ayrilghini 4 yildin ashqanliqi, shunga ularning "Ikki yüzlimichi" sanilishigha némining seweb bolghanliqini bilmeydighanliqini, emma yéqinqi siyasiy dolqunlarda xitay kütkendikidek bir aktipchanliqini körsetmey qalghan bolushi mumkinlikini ilgiri sürdi.

U tutqun qilin'ghan 4 neper sabiq xizmetdishining mijezi keskin, memuri bashqurush tejribisige ige xadimlar ikenlikini tilgha élish bilen birlikte ulardin bezilirining hayatida tunji qétim awarichilikke uchrishi emeslikini bayan qildi.

Uning déyishiche, mudir mirkamil ablimit aliy mektepte oquwatqan mezgilide namayishqa qatnashqanliqi üchün mekteptin heydelgen we bir qatar japaliq jeryanlardin kéyin iqtidarliq terjiman we axbaratchi bolup yétiship chiqqan iken.

Toluq bet