Шиветсийәдики хитай әлчиханисиға четилған зор җасуслуқ делоси вә униң баш-ахири (A10)

Мухбиримиз қутлан
2015-06-26
Share
babur-mexsut-305.jpg Рәсимдики қолини көтүрүп турған әр бабур мәхсут, оң тәрәптики хитай аял шиветсийәдин қоғлап чиқирилған хитай аял дипломат җов лулу. 2010-Йили.
svd.se din elinghan


10- Қисим(A): җасусниң сотқа тартилиши

62 яшлиқ уйғур җасус гумандари тутулғандин кейин шиветсийә адаләт министирлиқи бу делоға интайин инчикилик вә еһтият билән муамилә қилиду.

Ситокһолм шәһириниң пулхемсгатан кочисидики 30 -номурлуқ қоруда мәзкур делониң 2000 бәткә йеқин материяли мәхсус гуруппидики хадимларниң бирқанчә айлиқ әмгики җәрянида һазирлиниду.

Бу һәқтә шиветсийә дөләт радиоси мәхсус хәвәр берип мунуларни билдүриду: “сәпо, йәни шиветсийә дөләт хәвпсизлик идарисиниң мәхсус хадимлири ситокһолм шәһириниң пулхемсгатан кочиси 30-номурлуқ қоруға җайлашқан ахбарат мәркизидә мәзкур җасуслуқ делосиға даир материялларни 4 ай анализ қилиду һәмдә 2000 бәткә йеқин доклат тәйярлайду. Һалбуки, 62 яшлиқ җасус қолға елинған дәсләпки күнләрдә өз җинайитигә иқрар қилмай турувалиду.”

Йерим йилдин көпрәк тәйярлиқтин кейин, 2009-йили 12-айниң оттурилирида 62 яшлиқ җасус тунҗи қетим рәсмий сорақ қилиниду. 2010-Йили 2-айниң 1-күни у ситокһолм шәһәрлик сот мәһкимисидә биринчи қетим сотлиниду.

Мәзкур сотта гвәнтанамо түрмисидин “гунаһсиз” дәп қоюп берилип, аввал албанийәгә, андин шиветсийәгә йәрләшкән адил һекимҗан тәклип бойичә гуваһлиқ бериду.

Шиветсийә уйғур комитетиниң сабиқ рәиси абдушүкүр муһәммәт әпәндиму әйни чағда уйғур комитетиниң рәислик вәзиписини үстигә алған маһинур һәсәнова ханим билән биллә сотқа қатнашқанлиқини әслимә қилиду.

Мәзкур делони паш қилиш гурупписидики сәпо хадимлиридин томас линдстрөм билән җасуслуққа қарши анализчи вилһелм унге қатарлиқ кишиләр җасус гумандариниң шиветсийәдики уйғур тәшкилатлири билән уйғур сиясий актиплириниң учурини хитай әлчиханисиға йәткүзгәнлики һәққидә гуваһлиқ бериду.

Адил һекимҗан, әйни чағдики сот һәққидә әслимә қилип, уйғур җавабкарниң сотта һечқандақ иш болмиғандәк безирип олтурғанлиқини тилға алиду. Абдушүкүр муһәммәт әпәндиму җавабкарниң сот мәйданида сирттин қатнашқан уйғурларни қәстән көрмәскә салғанлиқини тәкитләйду.

(10-Қисимниң баш қисми түгиди, давами бар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт