Atushta yaridarni kötürgen jama'et oblastliq hökümetke qeder yürüsh qilghan

Muxbirimiz shöhret hoshur
2014-03-27
Élxet
Pikir
Share
Print
Yeken qatarliq rayonlardiki xitay hökümitining bésimigha qarshi weqelerdin kéyin ürümchining amanliq ishliri téximu kücheytilgen. 2013-Yili 29-iyun, ürümchi.
Yeken qatarliq rayonlardiki xitay hökümitining bésimigha qarshi weqelerdin kéyin ürümchining amanliq ishliri téximu kücheytilgen. 2013-Yili 29-iyun, ürümchi.
AFP

Atushta 23-mart küni yüz bergen alahide saqchilar zorawanliq weqesi heqqide muxbirimiz weqe yüz bergen teweliktiki saqchixanigha téléfon qildi. 1-Saqchixana xadimi we saqchixana bashliqi weqening yüz bergenlikini yoshurdi.

Emma weqede xitayning alahide saqchiliri teripidin chala ölük qilin'ghan nijat semetning a'ilisi, weqe yüz bergen küni 50-60 kishilik bir jama'etning bu heqsizliqqa naraziliq bildürüsh üchün yaridarni kötürüp, oblastliq 1‏-doxturxanidin oblastliq hökümetke qeder yürüsh qilghanliqini ashkarilidi. Yaridar a'ilisining melum qilishiche, yürüsh kéche sa'et birde yüz bergen, jama'et yaridarning xizmet ornidiki bashliqlarning terbiye we wede bérishi bilen arqisigha chékin'gen.

Téléfon ziyaretlirimiz dawamida, atush sheherlik saqchi idarisining xadimi we 1-saqchixanining bashliqi weqe heqqide melumat bérishtin özini qachurdi. Emma ziyankeshlikke uchrighan a'ile weqege qarita yalghuz özliriningla emes, weqeni körgen-bilgenlerningmu qattiq échin'ghanliqini we oblastliq hökümetke qeder özliri bilen birlikte yürüsh qilghanliqini bayan qildi. Weqening jeryanini bashtin axiri yene bir qétim anglatqan semet hajim bu qétimqi tesiratini bundaq bayan qildi:
-Méning eng échinidighinim: balamni 2-saqchixanigha özüm yétilep apirishta, balamni qanun arqiliq qoghdaymen dep oylighantim, balamda gunah bolsa tutup solap sotlaydu, gunahi bolmisa, qandaq bir uqushmasliq bolghinini manga chüshendüridu dep oylighantim, alahide saqchilarning balamni méning közümning aldida koyza sélip urup tépip, nege apiridighanliqinimu dep bermey apqéchip kétishini texmin qilmighantim. Mana 4 kün bolay dédi, hökümettin bir adem kélip, balangni ma sewebtin urduq dégen adem yoq, balang qandaq dégenmu adem yoq. Jem'iyette kishiler dep yürgen "Bular hökümet emes, bulangchi, bular saqchi emes, qaraqchi" dégen geplirige emdi ishendim, men bekla döt ikenmen, balamni chala ölük qilip qoyghiche bilmey yürüptimen.

Yuqirida yekshenbe küni atushta yüz bergen xitay alahide saqchilirining topliship adem urush weqesi heqqide toluqlima melumatlar berduq. Melum bolushiche, weqe sadir qilghuchi alahide saqchilar xitay millitidin, weqede tayaq zerbisidin chala ölük qilin'ghuchi Uyghur, 21 yash, atush sheherlik sheher bashqurush idarisining kadiri.

Toluq bet