Türkiyedin qayturulghan zinnetgülning ikki qizi chong apisigha bériwétilgen, özi iz-déreksiz

Muxbirimiz shöhret hoshur
2020.07.27
zinnetgul-we-2-balisi.jpg Zinnetgül tursunning türkiyede turushluq iqamet kinishkisi we ikki perzenti.
Social Media

Türkiyedin tajikistan arqiliq xitaygha qayturulghan zinnetgülning se'udi erebistanda yashawatqan hedisi güljennet, singlisi zinnetgülning tügep ketkenliki we ikki balisigha anisi qarawatqanliqi heqqide isharetlik bir uchur alghan. Bu heqte élip barghan bir qatar éniqlashlirimiz dawamida zinnetgülning ikki balisigha nöwette anisi emes, chong anisi qarawatqanliqi, özining nede ikenliki heqqide bolsa a'ile ezaliri we qolum-qoshniliriningmu xewersiz ikenliki ashkarilandi.

Zinnetgülning se'udi erebistanda yashawatqan hedisi güljennet ötken ayning béshida munasiwetlik qanalliri arqiliq singlisi zinnetgülning tügep ketkenliki we ikki balisigha anisi roshen'gül yasinning qarawatqanliqi heqqide isharetlik bir uchur alghan. Yeni uchur yetküzgüchi ündidarda uninggha zinnetgülning biraqla yoqalghanliqi we ikki balisining apisigha qélip qalghanliqini bayan qilghan. Güljennet “Biraqla yoqaldi” dégen bu sözni, yetküzgüchining échinish keypiyatigha qarap “Tügep kétish” dep chüshen'gen. Uning üstige birqanche ay ilgiri u zinnetgülning doxturxanida ikenliki heqqide bir uchur alghanliqi üchün mezkur isharetlik uchur uninggha téximu qorqununuchluq bilin'gen. Ötken yili 6‏-ayda türkiyedin tajikistan arqiliq yurtigha qayturulghan zinnetgül qorghas nahiyesining lengger yéza merkez kentige nopusluq bolup, bu uchurni aydinglashturush üchün awwal lengger yéziliq saqchixanigha téléfon qilduq. Biz bu saqchixana teminligen alaqe uchurlirigha asasen lengger yéziliq ayallar birleshmisige téléfon qilduq. Bu birleshmidiki mes'ul xadim zinnetgül we a'ilisini bilidighanliqi, bolupmu uning türkiyedin qayturup kélin'genlikidin xewiri barliqini éytqan bolsimu, emma uning aqiwiti heqqide, bolupmu hayat yaki emesliki heqqide xewersizlikini éytti. Biz yene saqchi xadimliri teminligen alaqe uchurlirigha asasen, zinnetgül olturushluq merkez kent ayallar mudiri bilen alaqileshtuq. Bu xadim,

Zinnetgülning ikki balisigha nöwette anisi emes, uning chong anisi, yeni anisi roshen'gül yasinning hedisi aman'gülning qarawatqanliqini ashkarilidi. Emma umu zinnetgülning ehwali heqqide, bolupmu hayat yaki emesliki heqqide héchqandaq uchuri yoqluqini bildürdi. Téxi 2-3 heptining aldida xizmet munasiwiti bilen mezkur a'ilige barghanliqini tilgha alghan bu xadim, bu öyde héchqandaq bir musibet hawasini körmigenliki, qolum-qoshnilarningmu ölüm petisi qilip kirip-chiqiwatqanliqigha shahit bolmighanliqini eskertti.

Bu xadim zinnetgülning ikkisi balisigha qarawatqan chong apisi aman'gülningmu merkez kentide olturushluq ikenliki, uning bir a'ile ayali ikenlikini tilgha aldi. Zinnetgülning ikki balisining néme üchün chong apisigha tapshurulghanliqi we ehwalining qandaqliqi heqqide aman'gülning yoldishi hesenjan dégen kishidin uchur élishimizni tewsiye qildi. Emma birqanche kün qayta qayta téléfon qilghan bolsaqmu, hesenjanning téléfoni ulanmidi. Bu ayallar mudirining ashkarilishiche, xizmet munasiwiti bilen zinnetgülning a'ilisige barghinida 5 janliq bu a'ilide yalghuz zinnetgülning inisi ibrahimni uchratqan, emma ibarahimmu zinnetgülning nede we qandaq ehwalda ikenlikidin xewersizlikini éytqan.

Hörmetlik radi'o anglighuchilar, yuqarqida türkiyedin tajikistan arqiliq yurti süydüngge qayturulghan zinnetgülning ikki balisigha chong anisining qarawatqanliqi, özining bolsa iz-déreksiz ikenliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.