Qazaqistandiki Uyghurlar roza-ramazan éyini xeyr-saxawetlik ishlar bilen uzatmaqta

Ixtiyariy muxbirimiz oyghan
2022-04-29
Share
Qazaqistandiki Uyghurlar roza-ramazan éyini xeyr-saxawetlik ishlar bilen uzatmaqta
RFA/Oyghan

Qazaqistandiki Uyghur jama'iti her yili xasiyetlik ramazan éyi kirishi bilen iqtisadiy ehwali nachar a'ililerge, yitim-yésirlargha, köp baliliq a'ililerge we mejruh-méyip kishilerge maddiy hem meniwiy yardem qilip, xeyr-saxawetlik ishlarni izchil dawamlashturup kelmekte. Ötken ikki yil dawamida bashqa memliketlerge oxshash qazaqistan hökümitimu korona wirusi wabasi munasiwiti bilen ramazan éyida bir yerge topliship, iptar ötküzüsh, bir-birini yoqlash we bashqimu her xil kolléktip heriketlerni men'iy qilghan idi,  emma Uyghur jama'iti özlirining mundaq xeyr-saxawetlik ishlirini bixeterlik charilirini qattiq saqlighan halda dawamlashturup keldi. Bu yil weziyet yumshighanliqtin Uyghur ahalisi yashawatqan yéza we sheherlerde mundaq saxawetlik ishlar erkin we hertereplime élip bérildi. Qazaqistanliq Uyghurlar ene shundaq xeyr-saxawetlik ishlar arqiliq özlirining  ömlikini, méhir-shepqitini we insaniy xisletlirini namayish qilmaqta. Bu heqtiki xewerler Uyghur tilliq metbu'atlarda we ijtima'iy taratqularda dawamliq bérilmekte. Bu yilmu saxawetlik ishlar adettikidek Uyghurlar zich otturaqlashqan almuta shehiri, shuningdek almuta wilayitining panfilof, Uyghur, emgekchiqazaq, talghir, qarasay nahiyeliride élip bérildi. Bu ishlar Uyghur medeniyet merkezliri, yigit bashliri, xanim-qizlar kéngeshliri, yashlar we bashqilar teripdin uyushturulmaqta.  

Radiyomiz ziyaritini qobul qilghan jumhuriyetlik “Uyghur awazi” gézitining panfilof nahiyesi boyiche öz muxbiri göherbüwi ismayiljanowa xanim roza-ramazan éyining deslepki künliridin bashlapla nahiyede xeyr-saxawetlik ishlarning qizghin bashlan'ghanliqini otturigha qoyup, mundaq dédi: “Panfilof nahiyelik Uyghur étno-medeniyet merkizi yénidiki xanim-qizlar kéngishining re'isi mahinur ayupowaning rehberlikide, yarkent tewesidiki xanim-qizlar kéngeshlirining ezaliri bir yengdin qol, bir yaqidin bash chiqirip, teminati nachar, yalghuz bashliq bimarlarning könglini élish meqsitide iptarliq uyushturdi. Shundaqla panfilof nahiyesining pexriy puqrasi güljahan hajim muratowa xeyrixahliq ishlirini yarkent tewesidin bashlidi. Uning a'ilisi teripidin 300 a'ilige yémek-ichmek tarqitildi.”

Guljahan muratova panfilof nahiyesidiki kheyri-sakhavetlik ishi ustide 2022-yil aprel.jpg

Göherbüwi ismayiljanowaning éytishiche, güljahan muratowa jumhuriyet boyiche 750 a'ilige un, gürüch, chay, maygha oxshash yémek-ichmekliklerni tarqatqan. Yéqinda panfilof nahiyesining hakimi terkibidiki anilar kéngishi, tedbirchan xanim-qizlarning rehberlikide “Biz birgemiz” herikiti da'iriside iptarliq bérilip, mundaq saxawetlik ishlar yenimu dawamlashmaqta.

Biz emgekchiqazaq nahiyelik Uyghur étno-medeniyet merkizi re'isining orunbasari nurjamal hasanowa xanim bilen alaqilashqinimizda, u mundaq dédi: “Aylarning sultani bolghan xasiyetlik ramazan éyining axirqi künliri chélek tewesidiki yéza-yézilirimizda köp baliliq anilargha, millitimizge uzun yillardin béri emgiki singip, hazir dem élishqa chiqqan mötiber anilirimizgha, qaraköz narisidelirimizge, turmushta türlük késelliklerge uchrap, qiynilip qéliwatqan anilirimizgha maddiy yardem bérish, meschitlirimizde iptargha chaqirish we bashqa xeyr-saxawet ishliri élip bérish ishliri — emgekchiqazaq nahiyesi chélek tewesidiki barliq medeniyet merkizi shöbisining ezaliri, yigit bashliri we xanim-qizlar re'islirining birlik hem ömlükte yurtdashlarning könglini élish üchün aldimizgha qoyghan yaxshi niyetlirimiz hem wezipimizdur.”

Nurjamal hasanowa yene jumhuriyetlik Uyghur étno-medeniyet merkizi terkibidiki yigit bashliri kéngishining re'isi dolquntay abduxélilning bu yilmu chélek tewesidiki yurtlargha 60 séwet ozuq- tülük we mötiber anilargha on'gha yéqin gilem i'ane qilghanliqini tekitlidi. U yene milletperwer insan bilal hoshurofning chélek yézisining merkizige jaylashqan qebristanliqning etrapini awatlashturushqa hamiyliq qilghanliqini bildürdi. Nurjamal hasanowa ene shundaq insanlargha yurt-jama'et namidin minnetdarliq bildürüp, ulargha xatirjemchilik, ishlirigha utuq we beriket tilidi.

Igilishimizche, yéqinda qazaqistan prézidénti qasim-jomart toqayéf roza tutqanlar üchün iptarliq bergen. U yighilghanlargha muraji'et qilip, iptarliqning xeliqning birliki we güllinishini körsitidighan yaxshi en'ene ikenlikini, islamning tinchliq we insanperwerlik qedriyetlirini terghib qilidighan,  ademlerni ittipaqliqqa chaqiridighan din ikenlikini tekitligen, shundaqila qazaqistandiki barche puqralargha birlik we xatirjemlik tiligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet