Uyghur tenheriketchisi nariman qurbanof dunya musabiqiside altun médalgha érishti

Dangliq gimnastikichi nariman qurbanof 22 we 25-féwral ariliqida gérmaniyening kotbus shehiride ötken gimnastika boyiche dunya musabiqisining ikkinchi basquchida altun médalgha érishti. U yaghach atta oyun körsitish türi boyiche birinchilikni igilidi.

Bu heqte qazaqistanning “Qazaq axbarat” xelq'ara axbarat agéntliqi we bashqimu bir qatar ammiwi axbarat wasitiliri, shuningdek memliketning sayahet we tenheriket ministirliqi hemde olimpik komitéti xewer tarqatqan. Ularda éytilishiche, mezkur musabiqige 70 tin oshuq dölettin 300 etrapida tenheriketchi qatnashqan. Qazaqistanliq nariman qurbanof birinchilikke, iyordaniyelik we jenubiy koréyelik tenheriketchiler ikkinchi we üchinchi orunlargha érishken.

Mezkur netijisi bilen nariman qurbanofning bu yil firansiye paytexti parizhda ötidighan olimpik musabiqisige qatnishigha mumkinchilikler tughulghan.

Ziyaritimizni qobul qilghan “Kéntawr” qabiliyetlik tenheriketchilerge yardem qilish jem'iyetlik fondining prézidénti, qazaqistanning xizmet körsetken trénér, nariman qurbanofning ustazi mexmut iskenderof ependi mundaq dédi: “Birinchi küni tallash boldi. Uninggha her ellerdin 50 ke yéqin tenheriketchi qatnashti. Axirqi yekmu-yek musabiqige peqet 8 adem qélip, nariman birinchilerdin bolup birinchi nomur bilen shu sekkizlik qatarigha kirdi. Bu nahayiti yaxshi. Démek u ishenchlik halda mukapat igileshke qarap mangdi dégen söz. Ikkinchi küni ene shu 8 adem küch sinashti. Ularning ichide bolupmu koréye we iyordaniyening, shuningdek yawropa hem amérikaning eng küchlük tenheriketchiliri boldi. Nariman öz wezipisini nahayiti yaxshi orunlap chiqip, altun médalgha érishti. Rast, bu basquch uning olimpik musabiqisige yollanma élishigha mumkinchilik yaratti. Emma bu basquch téxi axirqisi emes. Aldimizda bakuda ötidighan musabiqe bar. Nariman gérmaniyedin shu yaqqa uchup ketti. Hazir u on künlük teyyarliq meshiqlirige kirishti.”

RFA/Oyghan

Mexmut iskenderof nariman qurbanofning aldida chong wezipiler barliqini éytip, yene mundaq dédi: “Mubada u yene bir altun médalgha érishse, u chaghda uning olimpik musabiqisige qatnishishqa yollanma élishi üchün keng mumkinchilik yaritilidu. Egerde bizning bu yigitimiz yollanma élip, olimpik musabiqisige qatnashsa, bu biz üchün chong tarixiy weqe bolup hésablinidu. Buningdin bashqa yene bir musabiqe bar bolup, uningdimu nariman birinchilerdin bolushi lazim. Shertler intayin murekkep. Lékin uning yollanma alidighinigha chong ümid bar. Chünki axirqi ikki yil ichide xelq'ara gimnastika birleshmisining hésabi boyiche nariman birinchilerning tizimigha kirdi. Hazirche bakuda ötidighan musabiqidin ümid kütüwatimiz. Shuning üchün biz nariman'gha chong utuq tileymiz.”

Radiyomiz ziyaritini qobul qilghan qazaqistan Uyghur yashliri birlikining ezasi nozugum tayirowa xanim nariman qurbanof heqqide mundaq dédi: “Yashlirimizning tenheriketning her xil türliridin yaxshi netijilerni körsitiwatqanliqi bizni xushal qilidu, elwette. Shularning biri nariman qurbanof yéqinda gérmaniyede ötken gimnastika boyiche dunya musabiqiside yene bir mertem altun médalgha érishti. Qazaqistandiki Uyghur yashliri narimanning dunya musabiqilirige qatniship, qolgha keltürüwatqan utuqliri bilen yéqindin tonush. Bu heqte yerlik metbu'atlarda, shundaqla ijtima'iy torlarda pat-pat xewerler élan qilinip turidu. Narimanning bir ajayip xisliti-uning öz aldigha qoyghan nishan-meqsitidin hergiz chékinmesliki, bek tirishchanliqidur. Xelq'ara derijilik tenheriket mahiri narimanning pütkül qazaqistan namidin shunchilik yuqiri derijilik musabiqige qatniship, dunyaning eng küchlük tenheriketchiliri ichidin altun médalgha érishishi her kimning qolidin kéliwermeydu. Hazir u nöwettiki musabiqige teyyarliniwatidu. Biz qazaqistanliq Uyghur yashliri namidin nariman qurbanofning shu aldinqi sinaqlardin ötüp, parizhda bolidighan olimpik musabiqisige qatnishishini ümid qilimiz hem tilekdashmiz. Biz nariman'gha ishinimiz!”.

Melumatlardin igilishimizche, bu yil 26-iyuldin 11-awghustqiche firansiye paytexti parizh shehiride 33-nöwetlik olimpik musabiqisi bolidu. Eger nariman qurbanof gimnastika boyiche bu musabiqige qatnishish imkaniyiti bolsa, bu, qazaqistan üchünmu, Uyghurlar üchünmu zor sherep hésablinidiken.