Қазақистан уйғур яш-өсмүрлириниң «яш талантлар!» фестивали миллий кимликни қоғдашни нишан қилған

Ихтиярий мухбиримиз ойған
2019-05-15
Елхәт
Пикир
Share
Принт
Туздибастав йезисида өткүзүлгән «яш талантлар!» фестивалидин көрүнүш. 2019-Йил 12-май, қазақистан.
Туздибастав йезисида өткүзүлгән «яш талантлар!» фестивалидин көрүнүш. 2019-Йил 12-май, қазақистан.
RFA/Oyghan

Мәлумки, қазақистан мустәқиллиққа еришкәндин буян башқа милләтләр билән бир қатарда уйғурларму мәмликәтниң иқтисадий вә мәдәний тәрәққиятиға өз төһписини қошуп келиш билән биргә өзлириниң тилини, тарихини, мәдәнийитини, өрп-адәтлирини сақлап қелишқа тиришмақта. Һазир, уйғур диярида хитай даирилириниң уйғурларниң миллий мәдәнийитини йоқитиш сиясити кетип барған бир мәзгилдә қазақистан уйғурлири һәр хил паалийәтләрни өткүзүш арқилиқ өз кимликини сақлап қелишқа вә яш әвладларни миллий роһта тәрбийәләшкә алаһидә көңүл бөлмәктә. Йеқинда қазақистанда өткүзүлгән җумһурийәтлик фестивал шуниң бир испатидур.

12-Майда алмута вилайитиниң талғир наһийәсигә қарашлиқ туздибастав йезисиниң мәдәнийәт өйидә атақлиқ уйғур мәрипәтчиси һебибуллам қаһароф хатирисигә беғишланған «яш талантлар!» темисида 20-фестивал болуп өтти. Уни талғир наһийәлик уйғур мәдәнийәт мәркизи вә туздибастав 31‏-оттура мәктипи уюштуруп, җумһурийәтлик уйғур етно-мәдәнийәт мәркизи вә талғир наһийәлик билим бериш бөлүми қоллап-қуввәтлигән. Мәзкур паалийәткә уйғурлар зич олтурақлашқан алмута шәһири вә алмута вилайитиниң уйғур, панфилоф, әмгәкчиқазақ вә талғир наһийәлиридики мәктәпләрдә билим еливатқан уйғур қиз-йигитлири болуп 500 дин ошуқ адәм қатнашқан.

Һебибуллам қаһарофниң өмүр баяни вә әмгәк паалийити бойичә доклат қилинғандин кейин сөзгә чиққан қазақистан парламенти алий кеңишиниң әзаси, җумһурийәтлик уйғур етно-мәдәнийәт мәркизиниң рәиси шаһимәрдан нурумоф фестивал қатнашқучилириниң әң бәхтлик балилар икәнликини, өз ана тилида билим елиш имканийитигә игә болғанлиқини, уларниң келәчики үчүн барлиқ имканийәтләрниң яритилғанлиқини алаһидә тәкитлиди. У узун вақиттин буян өткүзүлүп келиватқан бу фестивалниң тунҗи қатнашқучилириға һәм буниңда алаһидә паалийәтчанлиқ көрсәткән шәхсләргә пәхрий ярлиқ вә совғилар тапшурди.

Буниңдин ташқири фестивалниң ечилиш қисмида сөзлигән гүлдала 21-оттура мәктипиниң мудири қуан айтбайеф, туздибастав 31-оттура мәктипиниң мудири қарлиға сәдвақасова вә башқилар бу мурасимниң тәрбийәви әһмийитини юқири баһалап, униң тәшәббускари вә баш һамийси мәхсәтҗан қаһарофқа миннәтдарлиқини изһар қилди һәмдә яш талантларға ақ йол тилиди.

Игилишимизчә, қазақистан муһаҗирәттики уйғурлар әң көп олтурақлашқан мәмликәт болуп, уйғурлар башқа қошна оттура асия җумһурийәтлиридә, йәни қирғизистан, өзбекистан, түркмәнистанда яшаватқан қандашлири билән селиштурғанда, өзлириниң миллий мәктәплиригә, мәтбуатиға, әдәбиятиға, академийә дәриҗидики тиятириға игә икән.

Радийомиз зияритини қобул қилған җумһурийәтлик уйғур етно-мәдәнийәт мәркизи рәисиниң орунбасари, «уйғур авази» гезитиниң баш муһәррири йершат әсмәтоф әпәнди қазақистандики уйғурларниң асасән мәзкур мәркәз әтрапиға топлинип, паалийәт елип бериватқанлиқини тәкитләп, мундақ деди: «мәркәздә һәр хил кеңәшләр бар. Мушундақ йөнилишләр билән бир қатар ишларни әмәлгә ашуруватимиз. Елимизниң тунҗи президенти нурсултан назарбайефниң миллий сиясити түпәйли биз көплигән утуқларни қолға кәлтүрдуқ. Шуларниң әң муһими, йәни тилимизни сақлап қелишниң яхши амили, җан-томуримиз болған миллий мәктәплиримизниң мәвҗут болушидур. Бу, бизниң тәрәққиятимизниң асасий күч-қудрити. Шундақла миллий мәтбуатимизниң мәвҗут болуши миллий алаһидиликлиримизни сақлап қелишниң муһим амиллири болуп һесаблиниду.»

Йершат әсмәтоф йәнә башқиму уйғур тәшкилатлириниң қазақистандики бар мумкинчиликләрдин пайдилинип, миллий кимликни сақлап қелиш мәқситидә көплигән паалийәтләрни өткүзүп келиватқанлиқини билдүрүп, йәнә мундақ деди: «җумһурийәтлик уйғур мәдәнийәт мәркизиниң қоллап-қуввәтлиши билән өтүватқан язғучи-шаирлиримизниң тәвәллутлири, уйғур мәтбуатиниң 100 йиллиқи, ату паҗиәсиниң 100 йиллиқи, уйғурларниң латин елипбәсигә көчүши охшаш паалийәтләр әмәлгә ашурулди. Мушуниң һәммиси миллий кимликимизни сақлап қелишниң амали дәп һесаблаймән. Ениқ мисал ‹һошшәрә, яш талантлар! ' фестивалидур.»

Алмута вилайитиниң әмгәкчиқазақ наһийәсигә қарашлиқ маливай оттура мәктипиниң уйғур тили вә әдәбияти пәни муәллими арзугүл абдримова ханимниң ейтишичә, фестивал қатнашқучилири «билим», «шаһмат», «илмий лайиһә», «тәсвирий сәнәт», «шеирни ипадилик оқуш», «ләпәр иҗра қилиш», «қол һүнәр», «миллий саз», «миллий нахша», «миллий йәккә уссул» охшаш көплигән бөлүмләр бойичә мусабиқигә чүшкән.

Арзугүл абдримова мәзкур фестивалниң миллий кимликни сақлашни вә тәрғиб қилишни нишан қилғанлиқини оттуриға қоюп, мундақ деди: «бу фестивалда маңа бәк яққини билим бөлүми. Бу йәрдә оқуғучиларниң ана тилида, инглиз тилида, мәмликәтлик қазақ тилида сөзләшлири юқири дәриҗидә болди. Йәнә бир тәрәптин, фестивал юқири дәриҗидә уюштурулған. Нөвәттики 21-фестивални өткүзүш маливай йезисиға берилди. Бу фестивалниң йәнә бир әһмийити шуниңдики, у пәқәт уйғур тилида өткүзүлди. Буниңдин башқа биздә муәллимләр йиғилиши, қабилийәтлик оқуғучилар мусабиқиси, йүсүп хас һаҗибниң 1000 йиллиқиға беғишланған илмий ишлар фестивали, абдумеҗит дөләтоф хатирисигә беғишланған әдәбий кәч охшаш көплигән фестиваллар өткүзүлди.»

Туздибастав йезисида өткән «яш талантлар!» фестивали ғалибларни мукапатлаш билән аяғлашқан. Уларниң ичидә, мәсилән, баш мукапатларға билим бөлүми бойичә уйғур наһийәсиниң мәшүр җәлилоф намидики кәтмән оттура мәктипиниң оқуғучиси шаһсәнәм искалинова, миллий саз бөлүми бойичә йәнә шу наһийәниң дардамту оттура мәктипи оқуғучиси шиар җәрипоф еришкән. Алдинқи орунларни алғанлар шундақла һебибуллам қаһароф намидики мәхсус медал, лоңқа вә башқиму көплигән маддий вә мәниви соғилар билән тәқдирләнгән.

Пикирләр (0)
Share
Толуқ бәт