Qazaqistandiki bir Uyghur ana köp baliliq a'ililerge öy hediye qildi

1-Awghust küni almuta wilayitining talghir nahiyesige qarashliq güldala yézisida köp baliliq a'ililerge hediye qilin'ghan öylerning achquchini tapshurush murasimi bolup ötti.

Qazaqistan Uyghurlirining jumhuriyetlik étno-medeniyet merkizining bashqarma ezasi, merkez yénidiki “Nuraniy anilar kéngishi” ning re'isi güljahan muratowa teripidin orunlashturulghan mezkur murasimgha ziyaliylar, jem'iyetlik birleshmiler, yerlik hökümet organliri hemde ammiwi axbarat wasitilirining wekilliri, yashlar, yéza turghunliri bolup köp kishi qatnashti.

Igilishimizche, mezkur murasim güljahan muratowa teshkilligen ijtima'iy layihe asasida uyushturulghan bolup, bu layihe boyiche köp baliliq, turmush shara'iti töwen, baqquchisidin ayrilghan a'ililerni turushluq öy bilen teminlesh pilanlan'ghan iken.

Murasim riyasetchisi bu küni peqet güldala yézisidila emes, belki pütkül talghir nahiyesi da'iriside chong yéngiliqning yüz bergenlikini tekitlep, murasimni échip bérishke güljahan muratowani teklip qildi. Güljahan muratowa bu murasimning qazaqistandiki milletler ara dostluqning, birlikning bir yarqin ülgisi ikenlikini, yétim we mejruh balilargha, turmushi éghir a'ililerge meniwi we maddiy yardem körsitishning her bir kishining insanliq burchi ikenlikini otturigha qoydi.

Radiyomiz ziyaritini qobul qilghan besh balining anisi zulfiye isra'ilowa xanim mundaq dédi: “Men yoldishim qaytish bolghandin kéyin éghir ehwalgha chüshüp qaldim. Shu chaghda güljahan apa derru köchüp kéling dédi. Méni baliliringni yétimler öyige ötküzüwet dégen idi. Allagha shükri, mushu güljahan anining öyige kelgendin béri ehwalim yaxshi turuwatidu.”

Murasimda sözge chiqqan talghir nahiyelik ichki siyaset bölümining bashliqi tolqun samétowa, güldala yéza bashliqining orunbasari méru'ért ezilqiyashowa, qazaqistan Uyghurlirining jumhuriyetlik étno-medeniyet merkizi re'isining orunbasari érshat esmetof we bashqilar mezkur ijtima'iy layihe asasida uyushturulghan bu murasimni yuqiri bahalap, layihe asasida yardemge érishken a'ililer ichide her millet wekillirining bar ikenlikini alahide tekitlidi. Murasimda güljahan muratowagha talghir nahiyelik we güldala yéziliq hakimiyetler namidin pexriy yarliqlar tapshuruldi.

Ziyaritimizni qobul qilghan yene bir köp baliliq ana tatyana xulxachinowa özining besh yil mabeynide öylerde ijaride turup, maddiy jehettin intayin qiynalghanliqini, shu chaghda güljahan anigha yoluqqanliqini bildürüp, mundaq dédi: “Men bashta gumanlan'ghan idim, sewebi mundaq ademlerni uchritish ademning eqlige kirmetti. Men güldala yézisigha kélip, özümning bu ishidin pushayman qilmidim. Biz bu yerge kelgende güljahan ana ijtima'iy layihe boyiche öy saldi. Biz bügün ene shu öyning achquchini tapshurup éliwatimiz. Bu biz üchün chong bext. Güljahan hede intayin yaxshi kishi. Mundaq ademler az bolsimu, lékin bar ikenlikige biz xushal. Biz emdi öyimiz yoq dep ensirimey, balilirimizni xatirjem terbiyeleymiz, dep oylaymen.”

“Nuraniy anilar kéngishi” ning re'isi güljahan muratowa xanim ziyaritimizni qobul qilip, mundaq dédi: “Men kichik waqtimda qiyinchiliqni köp tarttim. Shu waqitta arminim bar idi. Chong bolsam, balilargha qaraymen dégen. Shuning üchün mushu ishlarni qolumgha aldim. Ottuz yil boldi. Kéyin hamiylar peyda boldi. Shular we xelq nurghun yardem qildi. Ikki yil boldi, salametlikim nachar bolghanliqi üchün kenji balamni mushu ishqa teyyarlawatimen.”

Güljahan muratowa hamiylarning yardimi bilen yenimu köp mushundaq a'ililerni öy bilen teminlesh, yétim-yésirlargha yardem qilish ishlirini yenimu dawamlashturush oyining barliqini ilgiri sürdi.

Melum bolushiche, güljahan muratowa yéqinda almuta wilayitining Uyghur nahiyeside 150 a'ilini, yarkend teweside 180 a'ilini ozuq-tülük bilen teminligen. Buningdin tashqiri u bashqimu xeyrxahliq ishlirini yürgüzüp, yurt-jama'etchilik ichide chong hörmetke érishmekte.