Қазақистан уйғурлири йәнә бир милләтпәрвәр пәрзәнтидин җуда болди

Ихтиярий мухбиримиз ойған
2019-12-05
Елхәт
Пикир
Share
Принт
Қазанған алмута шәһәрлик йигит башлири кеңишиниң рәиси мәрһум инәмҗан худабәрдийеф әпәнди. 2019-Йил алмута.
Қазанған алмута шәһәрлик йигит башлири кеңишиниң рәиси мәрһум инәмҗан худабәрдийеф әпәнди. 2019-Йил алмута.
RFA/Oyghan

2-Декабир күни алмута шәһиридә узун йиллар давамида җамаәтчиликни йетәкләп, юртида абруй қазанған алмута шәһәрлик йигит башлири кеңишиниң рәиси инәмҗан худабәрдийеф 71 йешида аләмдин өтти. 3-Декабирда шәһәрниң достлуқ мәһәллисигә йиғилған юрт-җамаәт уни ахирқи сәпәргә узатти.

Мәрһумниң җиназа намизи чүшүрүлүш алдида өткән хатириләш мурасимида сөзлигән қазақистан җумһурийәтлик уйғур мәдәнийәт мәркизи қармиқидики йигит башлири кеңишиниң рәиси ярмуһәммәт кибироф мәрһумниң узун йиллар давамида өзи туруватқан достлуқ мәһәллисини башқуруп, мәһәллиниң мәдәний һаятида муһим рол ойниғанлиқини, болупму яшларни милләтпәрвәрлик роһта тәрбийәләш ишлириға чоң әһмийәт берип кәлгәнликини тәкитлиди.

Нөвәттә сөзгә чиққан қазақистан уйғурлириниң җумһурийәтлик етно-мәдәнийәт мәркизи рәисиниң орунбасари, «уйғур авази» гезитиниң баш муһәррири йершат әсмәтоф қазақистан парламенти алий кеңишиниң әзаси, җумһурийәтлик уйғур мәдәнийәт мәркизиниң рәиси шаһимәрдан нурумофниң тәзийәнамисини йәткүзди. Ершат әсмәтоф мундақ деди: «инәмҗан акини биз йүрикидә оти бар, өз мәнпәәтини ташлап, милләт мәнпәәтигә хизмәт қилидиған инсан сүпитидә тонуп кәлдуқ. Инәмҗан ака десәк бизниң көз алдимизға миллий мәдәнийитимиз келиду.»

Хатириләш мурасимида сөзлигән алмута шәһәрлик алий кеңишиниң әзаси, абдулла розибақийеф намидики 153-мәктәп-гимназийәниң мудири шавкәт өмәроф, тиҗарәтчи әхмәтҗан шәрдиноф мәрһумниң һөкүмәт вә юрт алдидики иш-паалийәтлирини, инсаний пәзиләтлирини юқири баһалиди.

Радиомиз зияритини қобул қилған султанқорған мәһәллисиниң турғуни, атақлиқ чақчақчи сабирҗан ғаппароф әпәнди мундақ деди: «инәмҗан, достлуқ мәһәллиси йигитвеши болғандин кейин мәсчит селишта, балиларни уйғур мәктипигә бериштә яхши күч чиқарғаниди. У бир йили ашхана ечип, уни «пор-баҗин» дәп атиди. Инәмҗан наһайити мәрд, вәтәнпәрвәр, милләтпәрвәр иди. У өзи башқурған достлуқ мәһәллиси үчүн җенини пида қилатти.»

Сабирҗан ғаппароф инәмҗан худабәрдийефниң 2008-йили рус мәктипидә оқуватқан төт нәврисини һәмдә шу йили йәттә яшқа толған бир нәврисини йетиләп, өзи яшаватқан мәһәллигә орунлашқан абдулла розибақийеф намидики уйғур мәктипигә елип кәлгәнликини, униң бу башланмисиниң көплигән йигит башлири, юрт актиплири, пүткүл уйғур җамаәтчилики ичидә зор қизғинлиқ пәйда қилғанлиқини билдүрди.

Инәмҗан мәшрәп оғли худабәрдийеф 1948-йили уйғур елиниң ғулҗа шәһиридә дуняға кәлгән. Ата-аниси 1955-йили қазақистанниң алмута шәһиригә келип орунлашқандин кейин у мәктәпкә киргән. Мәктәпни тамамлиғандин кейин у шопурлуқни оқуп, 1969-йилдин 1977-йилғичә таксичи болуп ишлигән. Алмутадики санаәт-техника институтиниң геологийәлик тәкшүрүш факултетида сирттин оқуған. Инәмҗан худабәрдийеф көктат базирида, андин чай фабрикисида башлиқ болуп ишлигән, кейинки йилларда у тиҗарәт билән шуғуллиниш билән бир қатарда җамаәтчилик ишлириниму елип барған. Инәмжан худабәрдийеф узун вақит давамида алмута шәһиридики достлуқ мәһәллиси вә наһийәлик йигит беши лавазимини атқурған.

Сиясәтшунас қәһриман ғоҗамбәрди йигит башлириниң уйғур җәмийитидики ролини юқири баһалап, мундақ деди: «мәрһум инәмҗан әпәнди юрт-җамаәт ишлирини рәтләш билән биргә көпрәк һазирқи вәзийәткә маслишип, гезиткә муштәри топлаш, уйғур мәктәплиригә бала елип бериш ишлирини қилди. Шуниң билән бир қатарда 2009-йил үрүмчи қанлиқ паҗиәсидин кейин алмутада уюштурулған чоң намайишқа көп күч чиқарди. Андин кейин һөкүмәтниң йол-йоруқи билән достлуқ мәһәллисидә өткүздуқ. Мушу ишқиму көп күч чиқарди.»

Қәһриман ғоҗамбәрди қандақла ишта болмисун мәрһумниң башқиларға үлгә болуп, милләт, вәтән үчүн қилған хизмәтлириниң һеч қачан унтулмайдиғанлиқини алаһидә тәкитлиди.

Игилишимизчә, инәмҗан худабәрдийеф җумһурийәтлик йигит башлири кеңишиниң рәиси мәрһум абдурешит мәхсүтоф билән бирликтә қазақистанниң һәр хил районлирида йүз бәргән тәбиий апәтләрдин азаб чәккәнләргә, шундақла турмуш-тирикчилики начар аилиләргә, мәҗруһ балиларға маддий ярдәм көрситиш ишлириға вә башқиму хәйрхаһлиқ һәрикәтлиригә актип қатнашқан. У шундақла 2008-йили алмута шәһиридә өткән улуғ мутәпәккур мәһмут қәшқәриниң 1000 йиллиқиға беғишланған паалийәтләрни уюштурушта һәмдә уйғур елидин кәлгән алимларни күтүвелишта алдинқи сәпләрдин болған.

Пикирләр (0)
Share
Толуқ бәт