Uyghur qizi dilnaz tilayéwa “Qazaqistan yer melikisi” ataldi

Ixtiyariy muxbirimiz oyghan
2022.11.22
Share on WhatsApp
Share on WhatsApp
Dilnaz-tilayeva-1.jpg Uyghur qizi dilnaz tilayéwa qazaqistanning “Yer melikisi” mukapatigha érishti. 2022-Yili noyabir, qazaqistan.
RFA/Oyghan

Yéqindin buyan qazaqistanning rus we qazaq tilliq metbu'at sehipiliride hem ijtima'iy torlarda Uyghur qizi dilnaz tilayéwaning “Qazaqistan melikisi” musabiqisige qatniship, “Qazaqistan yer melikisi” mukapatigha érishkenliki toghriliq xewerler élan qilindi. Bu, bolupmu ijtima'iy torlarda küchlük inkas peyda qilghanidi.

Qazaqistanning “Qazaq axbarat byurosi” qatarliq inawetlik ammiwi axbarat wasitilirining xewerliridin melum bolushiche, almuta shehiridiki jumhuriyet sariyida ötken bu musabiqige qazaqistanning her qaysi wilayet we nahiyeliridin yash qizlar qatnashqan. Qazilar topi nurghunlighan qizlarning ichidin peqet 23 nepirini tallighan. Shularning ichidin yene 12 qizni talliwélip, musabiqige qatnashturghan. Musabiqe shertliri boyiche uning qatnashquchiliri her xil kiyimlerde we zhanirlarda öz hünerlirini namayish qilghan.

Qazaqistanning “Yer melikisi” mukapatigha érishken Uyghur qizi dilnaz tilayéwa(singlisi bilen olturghan) ata-anisi we qérindashliri bilen xatire sürette. 2022-Yili noyabir, qazaqistan.
Qazaqistanning “Yer melikisi” mukapatigha érishken Uyghur qizi dilnaz tilayéwa(singlisi bilen olturghan) ata-anisi we qérindashliri bilen xatire sürette. 2022-Yili noyabir, qazaqistan.
RFA/Oyghan

Netijide tonulghan we talantliq artislar, téléwiziye riyasetchiliri, naxshichilar, tor aptorliri we bashqilarning qobul qilghan qararlirigha bina'en musabiqidin besh qiz ozup chiqqan. Ularning her biri mexsus mukapat namliri bilen mukapatlan'ghan. Ene shular qataridin Uyghur qizi dilnaz tilayéwa qazaqistanning “Yer melikisi” mukapatigha ériship, xelq'ara musabiqige yollanma alghan.

Mezkur musabiqige qatnashqan bu besh qiz ichidin tomiris kakimowa “Qazaqistan-2022-yil melikisi” ghalibi atalghan. Buningdin tashqiri, “Dunya melikisi” mukapatigha di'ana tashimbayéwa, “Yer melikisi” mukapatigha Uyghur qizi dilnaz tilayéwa érishken.

Musabiqe qa'idiliri boyiche uninggha 17-25 yashlar ariliqidiki, boyi 165 tin 185 santimétirghiche kélidighan qizlar qatnashqan. Qazilar ularning sirtqi körünüshliridin tashqiri yene natiqliq qabiliyitini, her xil sahelerdiki bilimini we sawatini, shu jümlidin bolupmu qazaq we in'gliz tilliri boyiche bilimini bahalighan.

Biz “Yer melikisi” mukapatigha érishken dilnaz tilayéwaning ziyaret qilduq. U mundaq dédi: “Eslide uninggha qatnishidighan oyum bolmighanidi. Instagramgha kirip, tuyuqsizla ‛qazaqistan melikisi‚ musabiqisi bolidu dégen xewerni uchritip qaldim. Qarisam, u yerde men oquwatqan ‛turan‚ uniwérsitétining heqsiz oqush shertimu barken. Shuning bilen uninggha qatnishishni qarar qildim. Biraq bu heqte ata-anamgha éytmidim. Eger qobul qilsa, shu waqitta deymen dep oylidim. Shundaq qilip iltimas sun'ghanidim, köp waqit ötmeyla tor arqiliq birinchi basquchtin ötkinim toghriliq manga xewer keldi we méni teklip qildi. Men buninggha qattiq xushal bolup, derru apamgha téléfon qildim. Apammu buninggha xushal boldi. Omumen ata-anam méni her tereptin qollidi”.

Dilnaz tilayéwa 2003-yili almuta wilayitining emgekchiqazaq nahiyesige orunlashqan qaraturuq yézisida dunyagha kelgen. U talghir nahiyesining güldala ottura mektipini tamamlap, almuta shehiridiki “Turan” uniwérsitétining terjime fakultétigha oqushqa kirgen. Hazir shu aliy mektepning 2-kursida bilim éliwatidu. Dilnaz kichikidinla kitab oqush, ussul, bosh waqitlirida tenheriketning har xil türliri boyiche shughullinip kelmekte. U shuningdek üch yérim yil mabeynide yéngi kiyimlerning modélini körsitish saheside xizmet qilmaqta.

Uyghur qizi dilnaz tilayéwa qazaqistanning “Yer melikisi” mukapatigha érishti. 2022-Yili noyabir, qazaqistan.

Dilnaz tilayéwa özining “Melike” musabiqisidin alghan tesiratini mundaq dep chüshendürdi: “Méning ismimni téxi atimay turup, boynumgha lénta asqanda men hetta özümni tutalmay, xushalliqimdin yighliwettim. Men nahayiti qattiq xushal boldum. Perdining u yéqida manga qarap turghan qizlarmu yighlashqa bashlidi. Bu méning üchün kütülmigen bir weqe boldi. Emdi téximu tiriship, élimni, xelqimni dunyagha tonutimen dégen arminim bar. Aldimda turghan xelq'ara musabiqide yene utuqqa yétimen dégen ümidimmu bar. Men méni qollighan barliq dostlirimgha, méning üchün awaz bergen barliqinglargha chong rehmitimni éytimen. Silerning awazinglar manga küch-medet berdi. Shundaqla da'im méning yénimda bolghan ata-anamgha, yéqinlirimgha cheksiz minnetdarmen. Hemminglargha yene bir qétim chong rehmet!”.

Hazir almuta wilayitining talghir nahiyesige qarashliq güldala yézisida yashawatqan dilnazning anisi adilem tilayéwa xanim mundaq dédi: “Bizning a'ilide ikki qiz, ikki oghul bar. Dilnaz balilirimning chongi. Dilnazning bala chéghidin armini kino artisi bolush idi. Kichikidin boyi égiz, kélishken, chirayliq, güzel qizlardin bolup östi. Dostliri, sinipdashliri, mu'ellimliri qarap, qiziqatti. ‛almuta melikisi‚ musabiqisige qatniship, birinchi ‛witsé ( mu'awin) melike‚atiqigha ige boldi. 18-Noyabirda dilnaz ‛qazaqistan yer güzili‚ atiqigha ige boldi. Emdi alem boyiche derijige teyyarliq qilimiz. Biz qizimizni meniwi tereptin qollap-quwwetliduq. Biraq dilnaz öz küchi bilen mushu netijilerge yetti. Méning qizimni qollap-quwwetligen, yardem bergen, awaz bergen xelqimge minnetdarliq bildürgüm kélidu”.

Qazaqistandiki Uyghur yashliri her xil sahelerde özlirining talantini namayish qilip kelmekte. Ularning ichide bolupmu ten-heriket saheside peqet jumhuriyet da'irisidila emes, belki dunya derijisidimu tonulghan tenheriketchiler bar. Uyghur yashliri buningdin tashqiri ilim-pen, sen'et, edebiyat, ishlepchiqirish, yéza igiliki we bashqimu sahelerde közge körünüp, Uyghurlarni dunyagha tonutmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.