Қазақистанниң қаратуруқ йезисида өткән мурасим уйғур миллий маарипиға беғишланди

Ихтиярий мухбиримиз ойған
2019-05-03
Елхәт
Пикир
Share
Принт
Қазақистанниң қаратуруқ йезисида өткүзүлгән миллий маарипқа беғишланған мурасимдин бир көрүнүш. 2019-Йил 2-май. Қаратуруқ, қазақистан.
Қазақистанниң қаратуруқ йезисида өткүзүлгән миллий маарипқа беғишланған мурасимдин бир көрүнүш. 2019-Йил 2-май. Қаратуруқ, қазақистан.
RFA/Oyghan

2-Майда алмута вилайитиниң әмгәкчиқазақ наһийисигә қарашлиқ қаратуруқ йезисиниң авут саттароф намидики мәктипидә буниңдин 40 йил илгири оттура мәктәпни тамамлиғучиларниң учришиши болуп өтти. Учришиш мәктәпни уйғур тилида тамамлиғанлар тәрипидин уюштурулуп, униңға йәрлик һөкүмәт вәкиллири, зиялийлар, юрт-җамаәтчилик, устазлар, оқуғучилар, шундақла алмута шәһиридин тәклип қилинған бир гуруппа меһманлар қатнашти.

Дәсләптә мурасим қатнашқучилири авут саттароф намидики оттура мәктәпни зиярәт қилип, униңда уйғур тилида билим еливатқан оқуғучилар билән учрашти. Алмута шәһиридин кәлгән билим бериш саһәси хадимлири оқуғучиларниң өзлирини қизиқтурған соаллириға җаваб бәрди.

Мурасим йезиниң «варис» ресторанида давам қилип, алмута шәһири әвезоф наһийилик уйғур мәдәнийәт мәркизиниң рәиси, мурасим тәшәббускари һәм униң уюштурғучилириниң бири бурһан таҗиддиноф бу йиғилишиниң асасий мәқситиниң ана тилида билим еливатқан уйғур балилирини һәм уларға билим вә тәрбийә бериватқан муәллимләрни, мәктәпни мәниви вә маддий қоллаш икәнликини тәкитлиди. 

Андин мурасим риясәтчиси қаратуруқ йезиси уйғур мәдәнийәт мәркизиниң рәиси гүлинур бақийева меһманларни тонуштурди. Меһманлар қатарида алмута шәһәрлик алий кеңишиниң рәиси, җумһурийәтлик уйғур етно-мәдәнийәт мәркизи йенидики уйғур мәктәплири бирләшмисиниң рәиси, абдулла розибақийеф намидики 153-мәктәп-гимназийә мудири шавкәт өмәроф, қаратуруқ йезиси оттура мәктипиниң сабиқ мудирлири, алимлар, язғучилар, һәр саһә вәкиллири болди. 

Мурасимда аләмдин өткән устазларға, мәктәпниң сабиқ оқуғучилириға атап қуран тилавәт қилинғандин кейин дәсләп сөзгә чиққан қаратуруқ райони һакими йермек самсибекоф мәктәп тамамлиғучиларни сәмимий тәбрикләп, бу юрттин көплигән мәшһур шәхсләрниң чиққанлиқини һәм хәлқниң әнә шулар билән пәхирлинидиғанлиқини оттуриға қойди. 

Мурасимда йезилиқ уйғур мәдәнийәт мәркизи йенидики ханим-қизлар кеңишиниң рәиси гүлбадәм розийева «ана тилида оқуш вә униң маһийити» темисида доклат қилди. У өз доклатида һәр бир хәлқниң өз тарихини өгиниш, ана тилини, өрп-адәтлирини, мәдәний мирасини сақлаш вә тәрғиб қилиш һоқуқиға игә икәнликини билдүрди. 

Мурасимда сөзгә чиққанлардин мәктәпниң сабиқ мудирлири қәһриман әмәтоф вә қасим исмайилофлар мәктәп тарихиға тохтилип, униңда әйни вақитларда хизмәт қилған атақлиқ устазлар, һәр саһәләрдә ишләватқан мәктәп тамамлиғучилири һәққидә тохталди. 

Мурасимда сөзгә чиққанлардин йәнә «өрлев» вилайәтлик муәллимләрниң кәспини мукәммәлләштүрүш институтиниң бөлүм башлиқи, филологийә пәнлириниң кандидат доктори руслан арзийеф уйғур елидә хитай даирилири тәрипидин уйғур миллий маарипиға қарши аталмиш «қош тиллиқ маарип» сиясити елип бериливатқан бүгүнки күндә қазақистанда ана тилини, миллий мәдәнийәтни, ана тиллиқ мәктәпләрни сақлап қелиш үчүн барлиқ имканийәтләрниң мәвҗут икәнликини һәм миллий маарип үчүн күрәшни пәқәтла давам қилиш зөрүрлүкини алаһидә тәкитлиди. 

Сөзгә чиққан башқиму меһманлар ана тили, миллий маарип, уйғурлар тәқдири, яшлар тәрбийиси, бирлик вә иттипақлиқ һәққидә өз пикирлири билән ортақлашти. 

Зияритимизни қобул қилған қаратуруқ йезисиниң турғуни, юрт актиплириниң бири алимҗан баратоф вә пешқәдәм устаз вә язғучи қасим исмайилоф бу һәқтә өз қарашлирини билдүрди. 

Зияритимизни қобул қилған пешқәдәм устаз вә язғучи қасим исмайилоф мундақ деди: «ана тили мәктәплирини сақлап қелиш бүгүнки күнниң наһайити муһим муәммалириниң бири. Учришишқа кәлгән балилар уйғур синиплириға көңүл бөлүп, уларға маддий ярдәм берип, ана тилида оқушиға қизиқтуруш ойида болди. Униңда барлиқи мушу әтрапида сөзлиди. Һазир ана тилиниң йоқилиш милләтниң йоқилиши дегән сөз.» 

Қаратуруқ йезисиниң турғуни, юрт актиплириниң бири алимҗан баратоф қаратуруқ йезисида аһалиниң балилирини уйғур тиллиқ мәктәпләргә бәрмәйватқанлиқиниң сәвәблирини көрсәтти.

У йәнә аддий хәлқниңму уйғур диярида йүз бериватқан вәқәләрдин бәк әнсирәватқанлиқини тәкитләп, мундақ деди: «вәтинимиздә наһайити хәвплик иш болуватиду. Башланғучни хитайчә оқутудикәнмиш. Башланғучни хитайчә оқуған адәм уйғурчини қанчилик оқуп кетиду? «тәрбийиләш» лагерлирини ечивапту. Уйғурларниң роһий җәһәттинму, дининиму чәкләп езип келиватиду. Бу хитайлаштуруш сияситидур». 

Алимҗан баратоф мушундақ мурасимларни, учришишларни пат-пат өткүзүшниң интайин муһимлиқини, һазирқи вақитта уйғурларниң өз кимликини сақлап қелиш үчүн тохтатмай, күрәш елип бериш лазимлиқини билдүрди.

Пикирләр (0)
Share
Толуқ бәт