Shinxu'a agéntliqining qeshqer chongbazar heqqide saxta xewer bergenliki ashkarilandi

Muxbirimiz shöhret hoshur
2022.04.27
Share on WhatsApp
Share on WhatsApp
qeshqer-bazar-uyghur.jpg Qeshqerning melum baziridiki Uyghurlar. 2013-Yili 9-noyabir.
AFP

Radiyomiz qeshqer chong bazarning chéqilghanliqi heqqide bir yürüsh xewerlerni bergendin kéyin ikki hepte ötkende, shinxu'a agéntliqining én'gilizche bétide qeshqer chongbazarning normal échiliwatqanliqi we dawamliq tereqqiy qildurulghanliqi heqqide xewer bérildi. Muxbirimiz qeshqer we ürümchidiki alaqidar idare-organlargha qarita élip barghan téléfon ziyaretliri dawamida, shinxu'a agéntliqining mezkur xewirining saxta ikenliki, mezkur bazarning asasen dégüdek chéqilip bolghanliqi we soda-tijaretning toxtighanliqi, xitay tarqatqan xewerdiki körünüshlerning kona körünüshler ikenliki delillendi.

Shinxu'a agéntliqining 31‏-mart künidiki mezkur xewiride Uyghurlarning normal, ténch we bextiyar yashawatqanliqi tonushturulup, buning bir pakiti süpitide qeshqer chongbazarning, yeni ottura we gherbi asiya bazirining qaynaq menzirisi körsitilgen. Xewerde bazardiki dukandalarning éghizidin xitaygha minnetdarliq ipadiliri bildürülgen. Ötken ayning aldinqi heptisidiki xewerlirimizde qeshqer chongbazarning 2/3 qismining chéqilip bolghanliqi heqqide melumat bergen iduq.

Ikki künning aldidiki éniqlashlirimiz dawamida, ürümchi sayahet idarisining bir xadimi mezkur bazarning chet ellik ziyaretchilerge waqtinche körsitilmeydighanliqini bayan qilish arqiliq, bazarning chéqilghanliqini isharetlik halda delilligen bolsimu, lékin néme üchün körsitilmeydighanliqi heqqide éniq jawap bermigen idi. Bügün biz mezkur idarigha qayta téléfon qilghinimizda, yene shu xadim, qeshqer chongbazarning chéqilish sewebini “Yuqum seweblik” dep izahlidi. Biz uningdin ijtima'iy taratqularda tarqalghan qeshqer chongbazarning chéqilghanliqi heqqidiki körünüshlerning menbesini sorighinimizda, bu uchurlarning “Yalghan” liqini bayan qildi we tordiki uchurlargha ishenmesli'ikimizni tewsiye qildi.

Biz arqidin qeshqerdiki bir saqchixanadin melumat soriduq. Saqchixana xadimi, bazarni bir-kki ayche awwal körgenlikini eskertip, shu chaghdiki melumatigha asasen, bazarning yérimi chéqilip bolghanliqini bayan qildi. Téléfonimizni qobul qilghan qeshqer soda-sana'et memuriy bashqurush idarisidiki bir mes'ul xadim, bazarning chéqilip bolghanliqi we u yerde soda tijaretning toxtighanliqini eskertti. Biz axirida qeshqerdiki xu'en xelq'ara sayahet shirkitige téléfon qilduq. Bu shirketning xadimi ochuq halda, mezkur bazarning chéqilip bolghanliqi we hazir bir xarabige aylinip bolghanliqini ashkarilidi. Biz uningdin: “Saq qalghan, yeni ziyaret qilishqa bolidighan birer parchisi yoqmu?” dep sorighinimizda, u “Yoq” dep jawap berdi.

Shinxu'a agéntliqining xewiride, qeshqer chongbazarning özgiriwatqanliqi we tereqqiy qiliwatqanliqi tilgha élin'ghan, emma chongbazarning chéqilghanliqi we dukandarlarning yötkelgenlikidek heqiqiy ré'alliq yoshurulghan. Biz xu'en xelqa'ara sayahet shirkitidin mezkur bazarning pütünley chéqilghan yaki qismen chéqilghanliqi heqqide qayta soriduq. U pütünley chéqilghanliqini tekitlesh bilen birlikte, etraptiki xizmet binaliriningla aman qalghanliqini eskertti. Bazar bashqurush xadimimu bu heqte oxshash melumat berdi.

Hörmetlik radiyo anglighuchilar, yoqurida shinxu'a agéntliqining in'gilizche xewiride qeshqer yéngibazar, yeni chongbazar toghriliq yalghan xewer bergenlikining ashkarilan'ghanliqi heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.