Qeshqer kérembagh doxturxanisidin köp sanda ishchi-xizmetchining lagérda ikenliki ilgiri sürülmekte

Muxbirimiz shöhret hoshur
2019-09-11
Élxet
Pikir
Share
Print
Sim tiken bilen chöridelgen lagér derwazisidiki xitay dölet bayriqi. 2019-Yili 4-iyun, yéngisar.
Sim tiken bilen chöridelgen lagér derwazisidiki xitay dölet bayriqi. 2019-Yili 4-iyun, yéngisar.
AFP

Qeshqer weziyitidin xewerdar kishilerdin biri qeshqer wilayetlik 1‏-doxturxana ishchi-xizmetchiliridin abduqéyum tewekkül we enwer abdukérim qatarliq 30 din artuq doxtur we xadimning bir yildin artuq waqittin buyan lagérda ikenlikini melum qilghanidi. Muxbirimizning élip barghan éniqlashliri dawamida, doxturxanining alaqidar bixeterlik xadimliri doxtur enwer abdukérimning lagérda ikenlikini delillesh bilen birlikte, bu doxturxanidin köp sanda kishining lagérda ikenlikini tekitlidi.

Radiyomizgha kelgen inkasta, xitayning atalmish kespiy terbiyelesh merkezliri namidiki orunlirining tipik bir jaza lagéri ikenliki tekitlinip؛ bu merkezlerde öz kespide dang chiqarghan her sahe kishilirining mewjutluqi bayan qilin'ghan we pakit süpitide qeshqer wilayetlik 1-doxturxana, yeni kérembagh doxturxanisining özidinla 30 din artuq doxtur xadimning lagérgha solan'ghanliqi qeyt qilin'ghan. Biz bu uchurning toghra-xataliqini aydinglashturush üchün, doxturxanigha téléfon bérip, awwal ismi atalghan enwer abdukérim qatarliq ikki neper xadimning nöwette doxturxanida bar-yoqluqini soriduq. Deslepte xadimlar ularning nöwette ish-ornida yoq ikenlikini ashkarilighan bolsimu, emma biz ularning qaysi lagérda ikenlikini sorighinimizdin kéyin؛ jawabini özgertti yaki jawab bérishtin özini tartti.

Melum bolushiche adette kérembagh doxturxanisi depmu atilidighan bu doxturxana, qeshqerdiki eng qedimiy doxturxana bolup 1934-yili qurulghan. Mezkur doxturxana tor bétide tonushturulushiche, adette dawalash, jiddiy qutquzush, aldini élish, terbiyelesh we tetqiqat qatarliq uniwérsal mulazimet élip bérilidighan bu doxturxanining 3448 neper ishchi-xizmetchisi bardur. Mezkur doxturxanining yene bir xadimimu deslepte enwer abdukérimning nöwette ish ornida yoqluqini tilgha alghan bolsimu, arqidin bu doxturxanida 3mingdin artuq ishchi-xizmetchi barliqini seweb qilip körsitip, enwer abdukérimni tonumaydighanliqini éytti.

Doxturxana tor bétide déyilishiche, bu doxturxana uniwérsal dawalash iqtidari jehette Uyghur rayoni boyiche 3-, qeshqer boyiche 1-orunda turidu. Uningda 11 proféssor, 116 magistirliq we uningdin yuqiri oqush tarixigha ige xadim؛ 246 neper aliy unwanliq doxtur mewjuttur. Radiyomizgha kelgen inkasta, mana mushundaq dangliq bir doxturxanida ishleshke tallan'ghan we bu doxturxanida közge körünerlik xizmet körsitiwatqan 30 din artuq Uyghur doxturning atalmish terbiyeleshke ekétilgenliki mesxirilik bir tilda otturigha qoyulghan.

Téléfonimizni qobul qilghan yene bir xadim؛ bu doxturxanida özi ishlewatqan bölümdin kimning lagérda ikenlikini sorighinimizda, enwer isimlik biri ikenlikini ashkarilidi. Emma u enwerning néme sewebtin lagérgha ekétilgenliki, qandaq bir terbiyege mohtaj körülgenlikini sorighinimizda, özining bu heqte melumati yoqluqini éytti. Doxturxana tor bétide tonushturulushiche, 2000 din artuq késel kariwiti bolghan bu doxturxana, qeshqer, aqsu, qizilsu we xoten tewesidiki 6 milyondin artuq kishi üchün mulazimet qilidu.

Radiyomizgha kelgen inkasta déyilishiche, terbiyeleshke ekétilgen 30 din artuq Uyghur doxturning köpinchisi bilip yaki bilmey siyasiy mehbus a'ile-tawabi'atlirini dawalap qalghanliqi we yaki ulargha hésdashliq bildürüp qalghanliqi üchün tutulghan؛ yene beziliri bolsa, diniy keypiyati gewdilik bolghanliqi we yaki milliy mesililerge bezi sorunlarda hökümetning kütkinidin perqliq pozitsiye bildürüp salghanliqi üchün tutulghan. Mezkur doxturxanidin téléfonimizni qobul qilghan bir xadim tutqundiki Uyghur doxturlarning ehwalidin xewersizlikini tekitligen bolsa, doxturxana qoghdash bölümi xadimi, özining bu heqte melumat bérelmeydighanliqining sewebini izahlash jeryanida, bu doxturxanida "Terbiyeleshke ekétilgenlerning köp" ikenlikini delillidi.

Toluq bet