Cholpanlar ustazi qéyum muhemmedning 3 yildin béri tutqunda ikenliki delillendi

Muxbirimiz shöhret hoshur
2021-08-03
Share
Cholpanlar ustazi qéyum muhemmedning 3 yildin béri tutqunda ikenliki delillendi Shinjang sen'et institutining dotsénti, cholpanlar ustazi, aktiyor qéyum muhemmed ependi. (Waqti we orni éniq emse)
Social Media

Norwégiyediki Uyghuryar fondi turghuzghan tutqundiki ziyaliylar tizimlikide shinjang sen'et institutining dotsénti, cholpanlar ustazi, aktiyor qéyum muhemmedningmu ismi orun alghan. Muxbirimizning uzun'gha sozulghan éniqlashliri dawamida, uning 3 yildin buyan tutqunda ikenliki delillendi.

Uyghur jem'iyitide "Cholpanlar ustazi" dep tonulghan, köp qirliq sen'etkar qéyum muhemmed 2017-yili ushtumtut sehne, munber we sorunlardin tengla ghayib bolghandin kéyin, bu boshluq rayon weziyitini yéqindin közitip kéliwatqan norwégiyediki Uyghuryar fondining diqqitini tartqan. Mezkur fondning yétekchisi abduweli ayup, qéyum muhemmedning xizmet orni bolghan shinjang sen'et institutining tor bétidin, uninggha ders orunlashturulmighanliqi we tor bettin, uninggha a'it barliq uchurlarning öchürülgenlikini bayqighan. Netijide, abduweli munasiwetlik qanalliri arqiliq qéyum muhemmedning birqanche meshhur sen'etkar bilen birlikte, 2017-yilning béshida tutqun qilin'ghanliqidin xewer tapqan.

Téléfonimizni qobul qilghan mezkur institutning bir xadimi dotsént qéyum muhemmed heqqidiki so'alimizgha jawab bérishni ret qildi.

"Qeshqerdiki hékaye" namliq köp qisimliq téléwiziye filimining rézhissori, nöwette amérikada yashawatqan pa'aliyetchi tahir hamutning bayan qilishiche, mezkur filimda bash rol alghan qéyum muhemmed, bolghusi kélini misirda oqup kelgen we tutqun qilin'ghan bolghachqa, 2017-yilning deslepki ayliridila turmushta égiz-peslikke yoluqushqa bashlighan we bolghusi kélinini qutquzushning koyida chépip yürginide, qara xalta özining béshigha kiydürülgen.

Shinjang sen'et institutining kadirlar bölümi xadimi qéyum muhemmed heqqide uchur élish üchün alaqidar resmiy qanallar arqiliq alaqe qilishimizni tewsiye qildi.

Tahir hamutning tonushturushiche, qéyum muhemmed awaz artisliqi, sehne riyasetchiliki, aktiyorluq, sen'et ma'aripi qatarliq köp sahede méwe bergen bir talant igisi bolup, u nöwettiki sen'et cholpanliridin abdulla abduréhim, abdukérim abliz qatarliq köp sanda sen'etkarning oqutquchisi iken.

Pa'aliyetchi abduweli ayupning bayan qilishiche, qéyum muhemmed köp qirliq sen'etkar we pishqan sen'et ma'aripchisi bolush bilen birlikte, uning xeyr-saxawet ishliridimu qozghash we yéteklesh küchi bolghan jama'et erbabliridin iken.

Sen'et institutining bir xadimi qéyum muhemmedning ilgiri bir mezgil tutup tekshürülgenlikini ashkarilidi, emma uning qachan we néme üchün tekshürülgenliki we tekshürüshning netijisi heqqide melumat bermidi.

Melum bolushiche, qéyum muhemmed "Ziwerning chéwerliki" we "Texellus" qatarliq itotlarda muweppeqiyetlik rol alghan we aldinqi itottiki "Raxman" obrazi bilen jem'iyette este qalghan.

Sen'et institutining yene bir alaqidar xadimi qéyum muhemmedning 3 yil awwal tutqun qilin'ghanliqini delillidi. Emma bu xadimmu, uning aqiwiti heqqide melumat bermidi.

Yuqirida shinjang sen'et institutining dotsénti, cholpanlar ustazi, aktiyor qéyum muhemmedning 3 yildin buyan tutqunda ikenlikining delillen'genliki heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet