“5-Féwral ghulja qirghinchiliqi” qirghizistanda xatirilendi

Bishkektin ixtiyariy muxbirimiz féruze teyyarlidi
2024.02.06
Qirghizistan-5-fewral-04 5-Féwral ghulja qirghinchiliqini xatirilesh pa'aliyitidin körünüsh.2024-Yili 5-féwral, bishkek
RFA/Feruze

5-Féwral küni qirghizistandiki Uyghurlar 1997-yili Uyghur diyarining ghulja shehiride yüz bergen “5-Féwral ghulja qirghinchiliqi” ning 27 yilliqini xatirilep, weten azadliqi yolida qurban bolghan shéhitlerge atap xetme qur'an qildi.

Xatirilesh pa'aliyiti bishkek shehirining alamédin 1-mehellisidiki “Muslim” ashxanisida ötküzüldi. Murasim dunya Uyghur qurultiyining qirghizistandiki wekillirining teshebbusida uyushturuldi. Yighin'gha bishkek shehiri we uning etrapidiki yéza-rayonlardin kelgen jama'et wekilliri bolup, 40 din oshuq kishi qatnashti.

Mezkur pa'aliyetke dunya Uyghur qurultiyining qirghizistandiki wakaletchisi rozimuhemmet abdulbaqi riyasetchilik qildi. U sözide 1997-yili ghulja shehiride yüz bergen qanliq qirghinchiliq heqqide qisqiche toxtaldi, andin hayatidin ayrilghanlargha atap qur'an tilawet qilindi.

 “Ittipaq” gézitining mu'awin bash muherriri ekberjan bawudunof 5-féwral ghulja qirghinchiliqining kélip chiqishi, jeryani we aqiwetliri heqqide doklat berdi. U, eyni waqitta ghulja shehiride Uyghur yashlirigha telim-terbiyeni kücheytish üchün “Meshrep” teshkilligen abduxélil mijit we abduméjit hemrah qatarliqlar heqqidimu tepsiliy toxtilip ötti.

5-Féwral ghulja qirghinchiliqini xatirilesh pa'aliyitidin körünüsh.2024-Yili 5-féwral, bishkek
5-Féwral ghulja qirghinchiliqini xatirilesh pa'aliyitidin körünüsh.2024-Yili 5-féwral, bishkek
RFA/Feruze

Ekberjan ependi doklatining axirida dunya Uyghur qurultiyi we Uyghur teshkilatlirining pa'aliyetliri netijiside nöwette xitay hökümitining Uyghurlargha yürgüzüwatqan irqiy qirghinchiliqining xelq'arada tonulghanliqi, xelq'ara jem'iyetning xitayni eyiblep uninggha bésim körsitiwatqanliqi, bularning Uyghurlargha ümid béghishlaydighanliqini eskertti.

5-Féwral ghulja qirghinchiliqini xatirilesh pa'aliyitidin körünüsh.2024-Yili 5-féwral, bishkek
5-Féwral ghulja qirghinchiliqini xatirilesh pa'aliyitidin körünüsh.2024-Yili 5-féwral, bishkek
RFA/Feruze

 Pa'aliyet dawamida yene dunya Uyghur qurultiyining ish-pa'aliyetliri tonushturuldi. Ixtiyariy sözge chiqqan “Ittipaq” jem'iyitining sabiq re'isi dilmurat ekberof dunya Uyghur qurultiyini maddiy we meniwi jehettin qollashni tekitlidi. Jama'et aqsaqili gheyret jahanof bu xil pa'aliyetlerge köprek yashlarni teklip qilish kéreklikini otturigha qoydi.

 Mezkur yighin'gha qatnashqan yigit bashliridin biri ezimjan mamirof ziyaritimizni qobul qilip, özining mezkur pa'aliyettin tesirlen'genlikini izhar qildi.

Igilishimizche, “5-Féwral ghulja qirghinchiliqi” ning 27 yilliqi yene qirghizistanning jalal-abad shehiridimu xatirilendi we Uyghur xelqining éghir tehditlerge uchrawatqanliqi jalal-abad ahalisige tonushturuldi. Gerche, jalal-abadtiki Uyghurlarning sani az bolsimu, emma ularning Uyghur élidiki weziyetke alahide ehmiyet bériwatqanliqi, her xil pa'aliyetlerni ötküzüwatqanliqi melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.