Qirghizistanda “5-Iyul ürümchi qirghinchiliqi” ning 15 yilliqi xatirilendi

Qirghizistan Uyghurliri “5-Iyul ürümchi qirghinchiliqi” ning 15 yilliqini xatirilesh munasiwiti bilen paytext bishkek we jalal'abad sheherliride yighilip, shéhitlerning rohigha atap xetme qur'an pa'aliyiti ötküzdi.

5-Iyul küni qirghizistan paytexti bishkek shehiridiki Uyghur jama'iti alamédin 1- mehellisige jem bolup “5-Iyul ürümchi qirghinchiliqi” ning 15 yilliqini xatirilidi we shéhitlerning rohigha atap xetme qur'an oqudi. Mezkur pa'aliyet dunya Uyghur qurultiyining qirghizistandiki wekilliri teripidin uyushturulghan bolup, uninggha bishkek shehiri we etraptiki yézilardin kelgen 40 tin artuq Uyghur jama'et wekilliri qatnashti. Mezkur pa'aliyet qur'an tilawet bilen bashlandi. Bu pa'aliyetke riyasetchilik qilghan rozimuhemmet abdulbaqiyéw, “5-Iyul ürümchi qirghinchiliqi” ning arqa körünüshi we kélip chiqishi toghrisida qisqiche doklat berdi.

Xatirilesh pa'aliyiti dawamida qirghizistan Uyghurliri“Ittipaq” jem'iyitining sabiq re'isi, dunya Uyghur qurultiyining wekili dilmurat ekberow sözge teklip qilindi. U sözide, “5-Iyul ürümchi qirghinchiliqi” ning Uyghurlar mesilisini atalmish “Xitayning ichki ishi”din dunyawi mesilige aylandurghanliqini tekitlidi.

Dilmurat ependi sözining dawamida yene bu yil may éyida gérmaniyening myunxén shehiride ötküzülgen d u q ning 20-yilliqi munasiwiti bilen ötküzülgen pa'aliyet  toghrisida melumat bérip ötti, bolupmu bügünki künde Uyghurlar mesilisining dunyawi mesile süpitide chong döletlerning siyasiy munberliride da'im tilgha élinidighan mesilige aylan'ghanliqini tekitlep ötti.

Radiyomiz ziyaritini qobul qilghan qirghizistandiki Uyghur jama'itining aqsaqali gheyret jahanow, Uyghur xelqining tarixidiki paji'elik weqelerning untulmasliqi lazimliqini eskertip ötti. U yene muhajirettiki Uyghurlarning weten azadliqi yolidiki  küreshlirini héch waqit toxtitip qoymasliqini ümid qilidighanliqini bildürdi.

RFA/Feruze

Mezkur pa'aliyetke ayallar jama'itimu qatniship, özlirining ghem-qayghuliri we oy-pikirlirini köpchilik bilen ortaqlashti. Ular nöwette qirghizistan Uyghurliri duch kéliwatqan eng chong mesililerning birining bu ana til mesilisi ikenlikini, buni hel qilishta ata-anilar hem er-ayallarning mes'uliyetlirining éghirliqini tilgha aldi. Radiyomiz ziyaritini qobul qilghan gulbahar eliyéwa xanim, Uyghur élidiki qérindashliri üchün qayghuruwatqanliqini bildürüp, muhajirettiki Uyghurlarning milliy kimlikini hergiz untumasliqini, perzentlirini her waqit ana tilda sözleshke righbetlendürüshni telep qildi.

“5-Iyul ürümchi qirghinchiliqi” ning 15 yilliqini xatirilesh pa'aliyiti jalal'abad shehiridiki “Ittipaq jem'iyiti” ning teshkillishi bilen xetme qur'an sheklide ötküzüldi. Xatirilesh murasimgha jalal'abad jama'iti we qirghizistan xelqler birleshmisi (assambléyesi) ning jalal'abad shöbisidiki her qaysi milletler wekilliri qatnashti. Radiyomiz ziyaritini qobul qilghan elishir nasiraxonow ependi, bu xil pa'aliyetlerning jalal'abad shehiridiki Uyghur jama'iti teripidin imkaniyet yar bergen da'iride uyushturulup kéliwatqanliqini tilgha aldi.

Dunya Uyghur qurultiyining qirghizistandiki wekilliri, bolupmu qirghizistan Uyghurliri “Ittipaq” jem'iyitining mes'ulliri we uning pidakar ezaliri her yili bu türdiki pa'aliyetlerning ongushluq ötküzülüshi üchün öz hessilirini qoshup kelmekte.  Ularning qatarida sabiq  re'is rozimuhemmet abdulbaqiyéw, sabiq re'is dilmurat ekberow, sabiq re'is esqer qasimow, ayallar kéngishining sabiq re'isi tursun'ay islam, “Ittipaq” gézitining tehrirat bölümidiki xadimlardin zumret roziyéwa, ekberjan bawudunow, rehimjan hapizow we bashqilarni sanap ötüsh mumkin. Igilishimizche, bu yil dunya Uyghur qurultiyining qirghizistandiki wekil namzatliqigha 9 kishi körsitilgen, resmiy wekiller 28-iyul künidiki saylam arqiliq tallap chiqilidiken.