Qirghizistan Uyghurliri bu yilliq roza héytni saxawetlik ishlar bilen kütüwaldi

Jalal'abad shehiridiki saxawetlik tarqitiwatqan körünüsh. 2024-Yili aprél, jalal'abad

10-Aprél küni qirghizistan Uyghurliri bu dölette yashawatqan bashqa musulman xelqler bilen birlikte bu yilliq roza héyt bayrimini kütüwaldi, shundaqla mohtaj a'ililerge yardem qollirini uzitip xeyr-saxawetlik ishlarni élip bardi.

Qirghizistanning jenubigha jaylashqan jalal'abad wilayitidiki Uyghurlar jalal'abadtiki ikrambay hajim meschitide rozi héyt namizini birlikte oqudi we ayemni qutlighach xeyr-saxawet ishlarni qanat yaydurdi.

RFA/Feruza

Héyt namizidin kéyin bayram keypiyatini téximu yuqiri kötürüsh üchün, meschit etrapidiki mehellide goya Uyghur diyaridikidek naghra-sunaylar chélindi, balilar üchün türlük oyunlar we musabiqiler uyushturulup mohtaj a'ililerge lazimliq turmush buyumliri tarqitildi.

RFA/Feruza

Bu yilliq roza héytliq saxawetlik pa'aliyetler gérmaniyediki sherqiy türkistan uchur merkizining re'isi abdujélil qaraqash bilen gérmaniyediki türk qérindashlirining yardimi we jalal'abad shehiridiki “Ittipaq jem'iyiti” ning qollap-quwwetlishide emelge ashuruldi. Radiyomiz ziyaritimizni qobul qilghan jalal'abad shehiridiki “Ittipaq jem'iyiti” ning re'isi elishir nasiraxunow saxawetlik hediyeler millet ayrimastin pütün mohtaj a'ililerge tarqitilghanliqini éytti.

Elishir ependi yene héyt dawamida Uyghur xelqining medeniyitini namayan qilish we Uyghurluq rohini kücheytish üchün ikrambay hajim meschiti mehellisige mexsus sazendilerni teklip qilghanliqini tilgha aldi.

Jalal'abad shehiridiki ayallar komitétining ezasi xurshide hajim xanim radiyomiz ziyaritini qobul qilip, gérmaniyediki türk qérindashlar bilen abdujélil qaraqashqa özlirining alahide rehmitini éytti we héytliq héssiyatlirini izhar qildi.

Rusiye paytexti moskwa shehiride yüz bergen partlash weqesi we bashqa munasiwetlik sewebler tüpeylidin qirghizistan pirézidénti sadir japarowning perman élan qilishi bilen bu yil paytext bishkektiki merkiziy meydanida jama'etning birlikte héyt namizi oqushi cheklendi. Jama'etler özliri turushluq mehellilerdiki meschitlerde héyt namizi oqudi. Qirghizistandiki Uyghurlar bolsa özliri zich olturaqlashqan sheher-yézilardiki jama'etlirige qoshulup, milliy en'eniliri boyiche roza héyt bayrimini qutlidi.

RFA/Feruza

Uyghurlar eng köp olturaqlashqan bishkek etrapidiki yézilardin biri bolghan nowopokrowka yézisidiki ayallar kéngishining re'isi asiyem mollabaqiyéwa radiyomiz ziyaritimizni qobul qilip, bu yilliq ramizanda meschitte sherqiy türkistandiki Uyghur qérindashliri we bashqa mezlumlargha atap du'a qilin'ghanliqini tilgha aldi. U, nowopokrowka jama'itining roza héyt bayrimini burundin qalghan en'eniliri boyiche qutlighanliqini tekitlidi.

Igilishimizche, ramizan éyida qirghizistan Uyghurliri “Ittipaq” jem'iyiti bilen türkiye jumhuriyeti tereqqiyat we hemkarliq teshkilati (TIKA) qirghizistandiki 50 mohtaj a'ilige yardem qollirini sunup héytliq hediyelerni tarqatqan.