Қирғизистан уйғурлири қурбан һейтини өз миллий әнәнилири бойичә қутлуқлиди

Қирғизистандин ихтиярий мухбиримиз ферузә тәйярлиди
2024.06.24
qirghizistan-qurban-heyt-2024-03

Һейт намизидин кейин мәсчиттин чиқиватқан җамаәт. 2024-Йили 16-июн, қирғизистан RFA/Feruze

qirghizistan-qurban-heyt-2024-01

Германийәдә яшайдиған сахавәтчи рәҗәп атеш әпәнди бир қушханиниң алдида турған көрүнүш. RFA/Feruze

qirghizistan-qurban-heyt-2024-02

Қурбанлиқ гөш тарқатқан көрүнүш. 2024-Йили 16-июн, қирғизистан RFA/Feruze

qirghizistan-qurban-heyt-2024-04

Һейт намизидин кейин мәсчиттин чиқиватқан җамаәт. 2024-Йили 16-июн, қирғизистан RFA/Feruze

qirghizistan-qurban-heyt-2024-05

Әлишир насирахуноф пидаийлар билән биллә. 2024-Йили 16-июн, қирғизистан RFA/Feruze

qirghizistan-qurban-heyt-2024-06

“иттипақ” җәмийити қурбанлиқ гөш тарқатқан көрүнүш. 2024-Йили 16-июн, қирғизистан RFA/Feruze

16-Июн күни қирғизистан уйғурлири башқа мусулман хәлқлири билән бирликтә улуғ қурбан һейтини қутлуқлиди. Уйғурларниң бәзилири һәҗ сәпиригә атланған болса, көпинчә кишиләр өзлири турушлуқ мәһәллиләрдә өзлириниң диний пәрзлирини ада қилишти. Шундақла 16-июндин 20-июнғичә германийәдики түрк сахавәтчиләрниң қурбанлиқ совғилири йәткүзүлди.

Бишкәк уйғур җамаити вәкиллиридин айбек полатбекоф зияритимизни қобул қилип, һейт давамида уйғур җамаитиниң хәйр-сахавәт ишлириниму елип барғанлиқини билдүрди.

Уйғурлар хәйр-сахавәт ишлирида милләт айримастин моһтаҗ аилиләргә ярдәм қоллирини сунуп кәлмәктә. Уларниң қатарида қәлбинур һесамидин ханимниң йетәкчиликидики “интизар ярдәм” сахавәт фонди үч күн давамида чуй вилайитидики йезиларни қидирип чиқип моһтаҗ аилиләргә қурбанлиқ гөш тарқитишти.

 Қирғизистанниң җәнубидики җалал абад шәһиридә тәшкилләнгән “иттипақ җәмийити” әлишир насирахунофниң башчилиқида 450 аилигә қурбанлиқ гөш тарқатти. Бу қурбанлиқлар германийәдики түрк қериндашлиридин әвәтилгән. Зияритимизни қобул қилған әлишир әпәнди германийәдики шәрқий түркистан учур мәркизиниң башчиси абдуҗелил қарақаш әпәндигә рәһмитини билдүрүп қурбанлиқ һәдийәләр милләт айримастин җалал абад шәһири вә униң әтрапидики районларға тарқитилғанлиқини билдүрди.

 Германийәдә яшайдиған сахавәтчи рәҗәп атеш әпәнди 15 йилдин буян қирғизистанға вә мәхсус “иттипақ” җәмийитигә қурбанлиқ гөш тәқдим қилип келиватқан болуп, у, бу йилму “иттипақ” җәмийитиниң уйғурларға йәткүзүп бериш үчүн қурбанлиқ гөш йәткүзди. Радийомиз зияритини қобул қилған рәҗәб атеш әпәнди қирғизистанға келишиниң сәвәби тоғрисида тохталди вә мундақ деди: “бизниң мәқситимиз инсаний ярдәм, бу тәвәләрдики қериндашлиримизға аз болсиму һесдашлиқ қилип қурбан һейтта өзимизниң саламлиримизни йоллидуқ. Биз явропадики түрк вә башқа милләт қериндашлиримизниң һәдийәлирини елип кәлдуқ. Биз бу әлләрдики қериндашлиримизни бәк сөйимиз, әпсуски уларниң һәр бири билән йүзлишәлмигән болсақму, лекин биз уларниң һәрбирини яхши көримиз. Улар буни билсун” деди.

Зияритимизни қобул қилған уйғур ханимлиридин җамаәт актипи турсунай абитова ханим уйғурларниң қурбан һейт әнәнилирини сақлап келиватқанлиқини тилға алди.

20-Июн күни йәнә дуня уйғур қурултийиниң қирғизистандики вәкили турсунай ислам ханимниң тәшәббусида бишкәк шәһириниң аламедин мәһәллисидә аялларниң қатнишишида дағдуғилиқ “һейт чейи” паалийити өткүзүлди. Радийомиз зияритини қобул қилған турсунай ханим “һейтлиқ паалийәтләр уйғур миллий әнәнилирини сақлашта наһайити пайдилиқтур” деди.

Қирғизистан көп милләтлик мәмликәт болуп, уйғурлар нопус бойичә бәшинчи орунни игиләйду. Бу мәмликәттә яшаватқан уйғурлар қирғизистан һөкүмитиниң қанунлириға бой сунуп, өзлириниң миллий әнәнилирини сақлаш вә раваҗландурушқа тиришмақта. Уйғурлар асаслиқи бишкәк шәһири вә униң әтрапиға мәркәзләшкән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.