Chet'ellerdiki musulmanlar jama'iti qirghizistan Uyghurlirigha "Qurbanliq" ewetip berdi

Ixtiyariy muxbirimiz féruze
2019-08-13
Share
qirghizistan-qurbanliq-qurban-heyt-1.jpg Qurban héytta rozimuhemmet abdubaqining bashchiliqidiki qurbanliq komitéti. 2019-Yili 11-awghust, qirghizistan.
RFA/Féruze

Bu yilliq qurban héytta chet'ellerdiki musulmanlar jama'iti qirghizistandiki Uyghurlargha xalis yardem körsitip, "Qurbanliq" ewetip berdi.

Bularning ichide hindonéziye musulmanlirining bir ammiwi teshkilati bilen gérmaniyediki türk qérindashlar teripidin ewetilgen qurban héytliq yardemler hemmidin köp boldi.

11-Awghust küni qirghizistandiki Uyghurlar bu dölette yashawatqan barliq musulmanlar bilen birlikte ulugh qurban héyt namizini oqudi. Héyt namizi memliketning herqaysi jayliridiki meschitlerde we paytext bishkek shehirining merkiziy meydanida birla waqitta oquldi.

Qirghizistan Uyghurliri "Ittipaq" jem'iyiti uyushturghan qurbanliq tarqitish komitétining ezaliri héyt namizidin kéyin saxawetlik ishlarni bashlidi. Qurbanliqlar bishkek shehiri we nowopokrowka yézisidiki qushxanilarda teyyar qilindi. Qurbanliqlarni teyyarlash we tarqitish ishlirigha rozimuhemmet abdulbakiyéf we mirzakérem abdullayéflar mes'ul boldi.

Qirghizistan ottura asiyadiki bir kichik bir dölet bolup, 1991-yili sabiq sowét ittipaqi yiqilghandin kéyin musteqil bolghan. Shuningdin buyan ta bügün'giche qirghizistan bilen hindonéziye arisida héchqandaq iqtisadiy, ijtima'iy we ammiwi teshkilatlar arisida saxawetlik munasiwetler bolmighan idi. Emma bu yili hindonéziye musulmanliri qirghizistandiki Uyghurlargha atap qurbanliq ewetti.

Radiyomiz ziyaritini qobul qilghan rozimuhemmet abdulbaqiyéf hindonéziyediki musulmanlar jama'itining qirghizistandiki Uyghurlargha qurbanliq éwétkenligi dunya Uyghur qurultiyining yéqindin buyan élip bériwatqan teshwiqatlirining netijisi, dep körsetti.

Rozimuhemmet ependi yene bezi islam döletliri hökümetlirining xitay hökümitini qollawatqanliqidin qattiq epsuslan'ghanliqini bildürdi. Emma u bu döletlerdiki awam puqralar egerde Uyghur mesilisini yaxshi chüshense, ular kélechekte öz döletlirining Uyghur mesiliside ijabiy qedem élishigha tesir körsitishi mumkin dégen ümidte ikenlikini izhar qildi.

Hindonéziyadiki ast teshkilatining ezasi sujita pri ramadinda radiyomiz ziyaritini qobul qilip, mundaq dédi: "Biz hindonéziye musulmanliri Uyghur mesilisining jiddiylikini ötken yilning axirida taratqular arqiliq bilduq. Yeni 2018-yili hindonéziyede minggha yékin kishi xitay elchixanisining aldida namayish qildi. Namayishchilar xitay hökümitining Uyghur musulmanliri üstidin yürgüzüwatqan bésim siyasetlirige öz qarshiliqi we naraziliqlirini bildürüshti. Bizning teshklatimiz xitayning Uyghurlargha élip bériwatqan zulumlirigha alahide köngül bölüwatimiz. Beziler öz pozitsiyesini bildürüsh üchün xitaygha qarshi namayishlargha peqet paytext jakartadila emes, belki hindonéziyediki bashqa sheherliridimu namayishlarni uyushturumaqta. Yene hindonéziyediki musulman ammisi öz yardimini bizning teshkilatimiz arqiliq Uyghurlargha ewetmekte. Biz qirghizistandin bashqa yene türkiye, misir, qazaqistan we özbékistandiki Uyghur jama'etlirigimu qurbanliqlarni ewettuq."

11-12-Awghust künliri qirghizistan Uyghurlirigha yene gérmaniyediki türk qérindashlar we dunya Uyghur qurultiyi ewetken qurbanliqlar tarqitip bérildi. Qurbanliq awwal chu wilayitidiki nowopokrowka, keng bulung, tökültash, lébédinowka yézilarida we toxmaq shehiride yashawatqan Uyghurlargha we ular bilen bille yashaydighan bashqa milletlergimu tarqitildi.

Radiyomiz ziyaritini qobul qilghan qurbanliq komitétining ezasi mirza'exmet sadikof qurbanliqlar tizimlik boyiche mehellilerdiki yigit bashliri arqiliq éwétilgenligini bildürdi.

Qurbanliq héyt küni qirghizistan Uyghurlirining "Ittipaq" teshkilati 600 gha yéqin a'ilige qurbanliq tarqatti. Qurbanliq héytning deslepki üch kün jeryanida ikki minggha yéqin a'ile we doxturxana, méyipler orunlirigha qurbanliq tarqitilidiken.

"Ittipaq" jem'iyitining re'isi esqer qasimof ziyaritimizni qobul qilip, yardem körsetken teshkilatlargha öz minetdarliqini bildürdi.

Qirghizistan Uyghurlirining "Ittipaq" jem'iyiti sherqiy türkistan uchur merkizining hemkarliqida saxawetlik ishlarni yene üch-töt kün'giche dawamlashturidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet