Қирғизистан уйғурлири йеңи нөвәтлик рәисини сайлап чиқти

Ихтиярий мухбиримиз ферузә
2019-07-02
Елхәт
Пикир
Share
Принт
Қирғизистан уйғурлири «иттипақ» җәмийитиниң нөвәттики 9-қурултийида мәзкур җәмийитиниң йеңи рәиси әсқәр қасимоф әпәнди сөзгә чиқти. 2019-Йили 30-июн, бишкәк.
Қирғизистан уйғурлири «иттипақ» җәмийитиниң нөвәттики 9-қурултийида мәзкур җәмийитиниң йеңи рәиси әсқәр қасимоф әпәнди сөзгә чиқти. 2019-Йили 30-июн, бишкәк.
RFA/Féruze

30-Июн күни қирғизистан пайтәхти бишкәк шәһириниң чиңгиз айтматоф намидики рус драма тиятирида уйғурлар икки айдин буян интизар болған қирғизистан уйғурлири «иттипақ» җәмийитиниң нөвәттики 9-қурултийи болуп өтти. Униңға мәмликәтниң уйғурлар зич олтурақлашқан чуй, ош, иссиқ көл, җалалабад вилайәтлиридики вә бишкәк һәм униң әтрапидики җайлардин болуп 375 вәкил, шундақла қирғизистан хәлқ ассамблейәси, йәни хәлқ қурултийи кеңишиниң рәиси абдуғени әркебайеф вә униң тәркибидики аз санлиқ милләтләр вәкиллири қатнашти.

Қирғизистан уйғурлири «иттипақ» җәмийитиниң низамнамиси бойичә һәр төт йил ичидә қирғизистан уйғурлириниң қурултийи өткүзүлүп нөвәтлик рәис вә мәркизий кеңәш толуқ һесабат бериши шундақла йеңи рәис сайлиниши шәрт икән.

Йиғин қирғизистан җумһурийитиниң дөләт марши билән рәсмий ечилип, йиғин паалийити «иттипақ» гезитиниң баш муһәррири, пәлсәпә пәнлириниң кандидат доктори әкбәрҗан бавудунофниң риясәтчиликидә елип берилди.

Мәзкур қурултай күн тәртипи рәис артиқ һаҗийефниң һесабат доклати, тәптиш вә малийә һәйитиниң доклати вә «иттипақ» җәмийитиниң йеңи рәисни сайлап чиқиштин ибарәт бир қатар җәрянлардин ибарәттур.

Йиғинда дәсләп «иттипақ» җәмийитиниң рәиси артиқ һаҗийефниң төт йиллиқ иш-паалийити тоғрилиқ һесабат берилип мәхсус филим көрситилди. Бу филимдики шәрқий түркистан тарихий хәритиси кишиләрни алаһидә җәлп қилди.

Қурултайда сөз қилған қирғизистан хәлқ қурултийи кеңишиниң рәиси абдуғени әркебайеф әпәнди қурултай вәкиллиригә иллиқ салам йоллап, «уйғурлар қирғизистан хәлқлири ичидә көп санлиқ милләтләрдин бири» дәп тәкитләш билән биргә йәнә уйғур дияридики бүгүнки вәзийәтни тилға елип өзиниң көңли йерим болғанлиқини билдүрди. У мундақ деди: «уйғурлар бизниң мәмликитимиздики әң көп санлиқ милләтләрниң бири. Уйғур вә қирғиз қериндаш милләтләрдур. Бизниң тарихимиз, тилимиз, динимиз бирдәк. Мени әң һаяҗанландурғини бу филим ахиридики шәрқий түркистан тарихий хәритисидур, әпсуски тарих бизниң көңлимиздәк болмайдикән. У йәрләрдә болған вәқәләрни биз һәммимиз билип ечинимиз, лекин биз хәлқаралиқ қанунларға бой сунушимиз керәк.»

Абдуғени әркебайеф йәнә уйғурлар қирғизистан тәрәққиятиға һәр саһәләрдә зор һәссиләрни қошқанлиқлирини тәкитләп мундақ деди. «Омумән мениң пикиримчә, уйғурлар бизниң дөлитимизниң тәрәққиятиға һәр саһәләрдә зор төһпиләрни қошуп кәлмәктә. Мәсилән илим-пән, йеза игилик, чарвичилиқ, иқтисад, медитсина, испорт вә сәнәт саһәлиридә. Қирғизистан хәлқ рәссами сабитҗан бабаҗанофниң рәсим көргәзмилиригә мән өзүм нәччә қетим қатнишип, бәк хурсән болған идим, шундақла мәрһум академик әзиз наринбайеф билән йеқин муамилидә болдум. Һазирғичә қирғизистандики уйғур мәтбуатини оқуп туримән».

Йиғин давамида сөзгә чиққан қирғизистан алий кеңишиниң әзаси пәрһат тулендибайеф «иттипақ» җәмийити рәисликигә төт кишиниң намзати көрситилгәнликини, буниң демократийәниң бир ипадиси икәнликини тәкитлиди.

Пәрһат тулендибайеф әпәнди йәнә өз нутқида һөкүмәтниң қоллиши билән бу йил сентәбир ейидин тартип, новопокровка вә ош вилайитидики қәшқәр қишлақ йезилиридики мәктәпләрдә уйғур тили дәрси ечилидиғанлиқини тәкитлиди. У зияритимизни қобул қилип у мундақ деди. «Новопокровка вә қәшқәр қишлақ йезилириниң аһалилири мән билән алақә қилип, бу җайлардики мәктәпләрдә уйғур тил дәрсини киргүзүш һәққидә мураҗиәт қилишти. Мән қирғизистан алий кеңишиниң әзаси болуш сүпитим билән керәклик һөҗҗәтләрни тәйярлап қойдум. Алла несип қилса бу йилниң сентәбир ейидин тартип бу икки йезида уйғур тил дәрси ечилиду.»

Йиғин ахирида йәкүн чиқирилип, «қирғизистан уйғурлири иттипақ җәмийити» ниң «төт йиллиқ паалийити қанаәтлинәрлик болди» дәп баһаланди. Қурултайниң иккинчи басқучида йиғин қатнашқучилири бир еғиздин әсқәр қасимофниң намзатини қоллап, аваз беришти. Андин җәмийәтниң тәптиш һәйити вә мәркизий кеңәш сайланди.

Йеңи сайлинип чиққан рәис сөзгә чиқип, өзиниң уйғур хәлқини иттипақлаштуруш, уйғур хәлқиниң тили вә мәдәнийитини раваҗландуруш үчүн хизмәт қилидиғанлиқини тәкитлиди.

Қирғизистан уйғурлири «иттипақ» җәмийитиниң йеңи рәиси әсқәр қасимоф әпәнди зияритимизни қобул қилип өзини бу қурултайда йәңгүчи дәп көрмәйдиғанлиқини тилға елип, өзиниң пәқәт хәлқ үчүн хизмәт қилидиғанлиқини тәкитлиди.

Қурултайға вәкил қатарида қатнашқан медитсина пәнлири саһәсидики неврологийә профессори нурмуһәммәт бабаҗаноф әпәнди зияритимизни қобул қилип, «иттипақ» рәиси вә һәйәтлириниң иш-паалийәтлирини юқири баһалиди. Лекин у җәмийәт рәисликигә бир кишиниңла намзат көрситилгәнликини тоғра тапмиғанлиқини тилға алди.

Игилинишичә әслидә «иттипақ» җәмийити рәисликигә низамнамә бойичә төт киши өз намзатлирини көрситишкәниди. Улар техника пәнлириниң кандидат доктори, дотсент бәхтияр қасими, қирғиз җумһурийитиниң мәдәнийәт вә саяһәт министирлиқидики җәмийәтләр кеңишиниң рәиси дилшат һәсәноф, новопокровка йезилиқ һөкүмәт идарисиниң сабиқ башлиқи нурмуһәммәт баяхуноф вә новопокровка йезилиқ кеңишиниң әзаси әсқәр қасимофлардур. Лекин, әсқәр қасимофтин башқилар, «рәисликини яшларға йол берәйли» дейишип, өз ихтияри билән рәисликкә сайлиништин ваз кечишти.

Новопокровка йезисиниң мәшрәп әзаси арафат зияритимизни қобул қилип, йеңи рәисниң яшларға көпрәк көңүл бөлүп, уларни өм қилиду дегән үмиди барлиқини изһар қилди.

Пикирләр (0)
Share
Толуқ бәт