Қирғизистандики уйғур пәрзәнтлири «иттипақ» гезитигә ярдәм қилди

Ихтиярий мухбиримиз ферузә
2019-12-04
Елхәт
Пикир
Share
Принт
«Иттипақ» гезитиниң баш муһәррири әкбәрҗан баудуноф гөдәкләр билән. 2019-Йили декабир, бишкәк.
«Иттипақ» гезитиниң баш муһәррири әкбәрҗан баудуноф гөдәкләр билән. 2019-Йили декабир, бишкәк.
RFA/Féruze

Қирғизистандики уйғур җамаитиниң аммиви тәшкилати «иттипақ» ниң башқурушидики «иттипақ» гезити 25 йилдин буян тохтимастин чиқмақта. Асаслиқи уйғур тилида, вә қисмән мәзмунлири рус тилида болған мәзкур гезит қирғизистан уйғурлириниң мәдәнийәт һаятидики муһим намайәндидур. Бу гезит асаслиқи хәлқниң қоллиши вә һимайиси астида чиқирилип келиватқан болуп, уйғур тиҗарәтчилири изчил түрдә гезиткә сахавәт қилип кәлмәктә. Йеқинда бишкәктики бир қисим уйғур өсмүрлириму өзлири пул топлап, бу гезиткә ианә қилди.

Қирғизистандики бир қисим уйғур пәрзәнтлири бир йил җәрянида тамчилап йиғип пул ианә сандуқини толдуруп, қирғизистанда уйғур тилида нәшр қилинидиған «иттипақ» гезитигә сахавәт қилди. Мәзкур сахавәтни тапшуруш паалийити «иттипақ» җәмийитиниң идарисидә өтти.

Аяллар бирликиниң актип әзаси рабийә мамут ханим өзиниң баллирини вә он икки нәврисини вәтәнпәрвәрлик роһида тәрбийәләп кәлмәктә. Уларниң аилисидә һәр шәнбә күни «уйғур кечиси» паалийити өткүзүш адәткә айланғаникән. Рабийә ханим һәр һәптидә нәврилиригә уйғур тилида китаб вә шеирларни, вәтән тоғрисидики һекайиләрни оқуп беридикән вә уйғур дияриниң бүгүнки вәзийити тоғрисидиму сөзләп беридикән. Рабийә мамут ханимниң нәврилири биринчи қетим өзлириниң сандуқчисини түркийәдики уйғур йетимларға әвәткән икән, бу йили болса улар «иттипақ» гезити тәрәққий қилсун дәп «иттипақ» гезитиниң тәһрир бөлүмигә тапшурған. Радио зияритимизни қобул қилған рабийә мамут ханим, нәврилириниң пул сандуқиниң наминиң «уйғуристан» икәнликини, бу арқилиқ балиларниң көңүллиридә вәтәнпәрвәрлик роһи күчәйсун дегән үмиди барлиқини билдүрди.

Сабиқ совет иттипақи йимирилгәндин кейин, қирғизистан өз мустәқиллиқиға еришип, аз санлиқ милләтләрниң тәрәққий қилишиға йол берилгәниди. 1994-Йили «иттипақ» гезитиниң биринчи сани нәшридин чиқти. Радийо зияритимизни қобул қилған «иттипақ» гезитиниң баш муһәррири әкбәрҗан баудуноф, гезитниң әһвали һәққидә тохталди.

Әкбәрҗан әпәнди йәнә, һазирқи «иттипақ» гезитиниң уйғур тиҗарәтчиләрниң ярдими билән үч миңдин ошуқ чиқириливатқанлиқини билдүрди.

Нөвәттә, «иттипақ» гезити давамлиқ қоллиғучиларниң иқтисадий җәһәттин қоллишини қолға кәлтүрүп кәлмәктә. «Иттипақ» гезитиниң муһәррири рәһимҗан һапизи, зияритимизни қобул қилип, гөдәкләрниң өз пул ианә сандуқини уйғур гезитиниң тәрәққий қилишиға тапшурғанлиқидин һаяҗанлиниватқанлиқини тәкитләп, вә аниларниң өз пәрзәнтлирини рабийә ханимға охшаш тәрбийәләшкә әһмийәт бәрсә, буниң уйғур хәлқиниң келәчики үчүн пайдилиқ икәнликини билдүрди.

Биз бу гөдәкләргә соал қойсақ, улар чоң аписиниң өзлирини даим вәтәнпәрвәрлик роһида тәрбийәләп кәлгәнликини ейтишти.

Пул ианә сандуқини йиғип вә уйғур хәлқигә беғишлиған касимофлар аилисидики пәрзәнтләр фәйзия, әмира, рәйанә, лейла, аманниса, һәдийә, әмрулла, өмәр, хәйрулла вә җаанболаттур. Уларға «иттипақ» гезити тәрипидин «қирғизистан уйғурлири» вә «елипбә» намлиқ китаблар тәқдим қилинди.

Бүгүнки күнләрдә «иттипақ» гезити һәр айда кирил вә әрәб-уйғур йезиқлирида уйғур вә рус тиллирида 3300 нусхидин нәшр қилинип келинмәктә. Гезит, қазақистан, русийә вә өзбекистандики уйғур җамаәтчиликигә почта арқилиқ тарқитилип келинмәктә, шундақла бәзи чәт’ әлләрдики уйғур тәтқиқатчиларға тор арқилиқ тарқитилмақта.

Пикирләр (0)
Share
Толуқ бәт