Qirghizistandiki Uyghur perzentliri "Ittipaq" gézitige yardem qildi

Ixtiyariy muxbirimiz féruze
2019-12-04
Élxet
Pikir
Share
Print
"Ittipaq" gézitining bash muherriri ekberjan ba'udunof gödekler bilen. 2019-Yili dékabir, bishkek.
"Ittipaq" gézitining bash muherriri ekberjan ba'udunof gödekler bilen. 2019-Yili dékabir, bishkek.
RFA/Féruze

Qirghizistandiki Uyghur jama'itining ammiwi teshkilati "Ittipaq" ning bashqurushidiki "Ittipaq" géziti 25 yildin buyan toxtimastin chiqmaqta. Asasliqi Uyghur tilida, we qismen mezmunliri rus tilida bolghan mezkur gézit qirghizistan Uyghurlirining medeniyet hayatidiki muhim namayendidur. Bu gézit asasliqi xelqning qollishi we himayisi astida chiqirilip kéliwatqan bolup, Uyghur tijaretchiliri izchil türde gézitke saxawet qilip kelmekte. Yéqinda bishkektiki bir qisim Uyghur ösmürlirimu özliri pul toplap, bu gézitke i'ane qildi.

Qirghizistandiki bir qisim Uyghur perzentliri bir yil jeryanida tamchilap yighip pul i'ane sanduqini toldurup, qirghizistanda Uyghur tilida neshr qilinidighan "Ittipaq" gézitige saxawet qildi. Mezkur saxawetni tapshurush pa'aliyiti "Ittipaq" jem'iyitining idariside ötti.

Ayallar birlikining aktip ezasi rabiye mamut xanim özining ballirini we on ikki newrisini wetenperwerlik rohida terbiyelep kelmekte. Ularning a'iliside her shenbe küni "Uyghur kéchisi" pa'aliyiti ötküzüsh adetke aylan'ghaniken. Rabiye xanim her heptide newrilirige Uyghur tilida kitab we shé'irlarni, weten toghrisidiki hékayilerni oqup béridiken we Uyghur diyarining bügünki weziyiti toghrisidimu sözlep béridiken. Rabiye mamut xanimning newriliri birinchi qétim özlirining sanduqchisini türkiyediki Uyghur yétimlargha ewetken iken, bu yili bolsa ular "Ittipaq" géziti tereqqiy qilsun dep "Ittipaq" gézitining tehrir bölümige tapshurghan. Radi'o ziyaritimizni qobul qilghan rabiye mamut xanim, newrilirining pul sanduqining namining "Uyghuristan" ikenlikini, bu arqiliq balilarning köngülliride wetenperwerlik rohi kücheysun dégen ümidi barliqini bildürdi.

Sabiq sowét ittipaqi yimirilgendin kéyin, qirghizistan öz musteqilliqigha ériship, az sanliq milletlerning tereqqiy qilishigha yol bérilgenidi. 1994-Yili "Ittipaq" gézitining birinchi sani neshridin chiqti. Radiyo ziyaritimizni qobul qilghan "Ittipaq" gézitining bash muherriri ekberjan ba'udunof, gézitning ehwali heqqide toxtaldi.

Ekberjan ependi yene, hazirqi "Ittipaq" gézitining Uyghur tijaretchilerning yardimi bilen üch mingdin oshuq chiqiriliwatqanliqini bildürdi.

Nöwette, "Ittipaq" géziti dawamliq qollighuchilarning iqtisadiy jehettin qollishini qolgha keltürüp kelmekte. "Ittipaq" gézitining muherriri rehimjan hapizi, ziyaritimizni qobul qilip, gödeklerning öz pul i'ane sanduqini Uyghur gézitining tereqqiy qilishigha tapshurghanliqidin hayajanliniwatqanliqini tekitlep, we anilarning öz perzentlirini rabiye xanimgha oxshash terbiyeleshke ehmiyet berse, buning Uyghur xelqining kélechiki üchün paydiliq ikenlikini bildürdi.

Biz bu gödeklerge so'al qoysaq, ular chong apisining özlirini da'im wetenperwerlik rohida terbiyelep kelgenlikini éytishti.

Pul i'ane sanduqini yighip we Uyghur xelqige béghishlighan kasimoflar a'ilisidiki perzentler feyziya, emira, rey'ane, léyla, amannisa, hediye, emrulla, ömer, xeyrulla we ja'anbolattur. Ulargha "Ittipaq" géziti teripidin "Qirghizistan Uyghurliri" we "Élipbe" namliq kitablar teqdim qilindi.

Bügünki künlerde "Ittipaq" géziti her ayda kiril we ereb-Uyghur yéziqlirida Uyghur we rus tillirida 3300 nusxidin neshr qilinip kélinmekte. Gézit, qazaqistan, rusiye we özbékistandiki Uyghur jama'etchilikige pochta arqiliq tarqitilip kélinmekte, shundaqla bezi chet’ ellerdiki Uyghur tetqiqatchilargha tor arqiliq tarqitilmaqta.

Toluq bet