Қирғизистанда уйғур миллий уссуллири қизиқиш қозғимақта

Қирғизистандин ихтиярий мухбиримиз ферузә тәйярлиди
2024.03.28
qirghizistan-ussul-04 Уйғур уссул маһарити гуваһнамиси алған көрүнүш. 2024-Йили 26-март, бишкәк
RFA/Feruza

Қирғизистан уйғур аһалиси арисида уйғур миллий мәдәнийити, миллий өрп-адәтлирини тәрғиб қилиш, сақлаш вә уни йеңи әвладларға өгитиш омумий қизғинлиқ шәклидә давамлашмақта. Шуниң билән бир вақитта уйғур мәдәнийәт әнәнилири қирғизистан аһалилири арисиғиму өз тәсирини көрсәтмәктә. Уйғур мәдәнийитиниң бир қисми болған уйғур миллий уссул сәнити уйғур яшлириниң, җүмлидин қирғизистандики асасий милләт қирғизлар вә башқа милләтләрниңму өгинишкә қизиқидиған әң муһим мәдәнийәт үлгилириниң биригә айланған. Һәтта бишкәк шәһиридики ресторанларда, кулубларда уйғурчә нахша-музикиларға җор болуп, уссул ойнаш омумий әһвалға айланған.

Уйғур уссул маһарити дәрсидин көрүнүш.  2024-Йили 26-март, бишкәк
Уйғур уссул маһарити дәрсидин көрүнүш. 2024-Йили 26-март, бишкәк
RFA/Feruza

Нөвәттә, уйғур миллий уссуллириниң мәстанилири көпийип уйғур уссуллириға болған қизиқиш вә уни өгиниш қизғинлиқи ашмақта.

26-Март қирғизистан пайтәхти бишкәк шәһиридә өткүзүлгән уйғур миллий уссули бойичә 4-нөвәтлик уссул маһарити дәрси буниң ярқин бир ипадисидур.

Уссул маһаритини өгиниш дәрси қирғизистандики “юлтуз” уйғур миллий уссули ансамбилиниң бәдиий рәһбири гүлназ мәхсутованиң тәшәббуси билән уюштурулди. Радийомиз зияритини қобул қилған гүлназ ханим шу уссул маһарити дәрсиниң асасий мәқсити қирғизистандики уссулчиларға асаслиқ уйғур уссули вә миллий кийим-кечәклирини тонуштуруш икәнликини билдүрди. У мундақ деди: “бүгүн уйғур миллий уссули бойичә маһарәт дәрси болуп өтти, бу дәрскә мениң ‛юлтуз‚ ансамбилимдин сирт йәнә башқа йәнә нахшичилар вә қирғиз уссуллири топлириниң уссулчилири, устазлири қатнашти. Бизниң асаслиқ мәқситимиз миллий уссул мәсилилири һәққидә билим бериш вә башқа милләтләр һәм башқа милләт уссул устазлириға уйғур миллий уссули вә уйғур миллий кийим-кечәклириниң немә икәнликини көрситиштур. ”

Гүлназ ханим йәнә қирғизистан аһалиси “чинә уссули” вә кейинки йилларда “долан уссулини” ни бәк яқтуридиғанлиқини тилға алди.

Уйғур уссулиға қизиқидиған рус қизи викторийә (Victoria). 2024-Йили 26-март, бишкәк
Уйғур уссулиға қизиқидиған рус қизи викторийә (Victoria). 2024-Йили 26-март, бишкәк
RFA/Feruza

Қазақистанда даңқи чиққан “долан” уйғур миллий уссул академийәсиниң бәдиий рәһбири бәхтияр имран қирғизистанға дәвәт қилинип бир топ уссулчиларға уссул маһарити дәрси бәрди. У, уссул дәрслири җәрянида уйғур уссулиниң келип чиқиш тарихи вә мәдәнийәт қиммити һәққидиму сөзлиди. Мәзкур дәрсләргә пәқәт уссулчиларла әмәс, бәлки уйғур миллий уссуллириға қизиққан башқа милләт қизлириму қатнашти. яш уссулчи қиз меерим, зияритимизни қобул қилип өзиниң уйғур уссуллиридин “долан” уссулини бәкрәк яқтуридиғанлиқини ейтти: “мениң исмим меерим мән ‛юлтуз‚ топида он йилдин буян уссул ойнаватимән, мениң әң сөйүмлүк уссулум бу ‛долан‚ уссули, чүнки у башқа уйғур уссуллиридин бәк пәрқлиниду. Бүгүнки маһарәт дәрсидә мән ‛долан‚ уссули тоғрисида еришкән билимләрдин бәк хурсәнмән. Бүгүн биз йеңи уссул һәрикәтлирини өгәндуқ шундақла ‛долан‚ ниң овчилар уссули икәнлики вә кийимниң рәңлири нәқәдәр муһим болғанлиқини өгәндуқ. Қара рәң земинни, ақ рәң асманни вә қизил рәң ялқунни символ қилидикән. Бизгә мушундақ бир пурсәт яритип бәргәнлики үчүн бизниң рәһбиримиз гүлназ ханимға өз миннәтдарлиқимни билдүримән” .

Мәзкур паалийәт бишкәк шәһиридики аламедин 1-мәһәллисидики “омат” уссул мәркизидә уюштурулди. Радийомиз зияритини қобул қилған “долан” уйғур миллий уссулиниң бәдиий рәһбири бәхтияр имран өзиниң қирғизистанда уйғур миллий уссули бойичә төтинчи қетим дәрс бериватқанлиқини ейтип, уйғур миллий уссуллириға башқа милләттики қизларниң қизиқишидин бәк хушал болғанлиқини ейтип, бүгүнки дәрсиниң мәзмуни тоғрисида тохталди.

яш уссулчи уйғур миллий кийимлирини сизған көрүнүш.  2024-Йили 26-март, бишкәк
Яш уссулчи уйғур миллий кийимлирини сизған көрүнүш. 2024-Йили 26-март, бишкәк
RFA/Feruza

Қирғизистан уйғурлири өз мәдәнийитини вә миллий өрп-адәтлирини сақлап қелиш йолида тиришчанлиқ көрситип 2013-йили бир топ яш сәнәткарларни үрүмчи шәһиригә бир йиллиқ курсқа әвәткән, шу яш сәнәткарларниң арисида гүлназ мәхсутоваму бар. Қирғизистан уйғурлири өзлириниң миллий мәдәнийити, җүмлидин миллий нахша-музика, уссул сәнитини сақлап қелиш вә тәрәққий қилдурушқа әһмийәт берип кәлмәктә. Қирғизистан уйғурлири асасән бишкәк шәһири вә униң әтрапидики вилайәт йезилириға һәм җәнубтики ош вә җалал-абад вилайәтлиригә тарқалған. Лекин өз мәдәнийитини, сәнитини сақлиған асасий қисим бишкәк шәһири вә әтрапиға орунлашқандур.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.