Gu'antanamodiki Uyghur tutqunlarning teqdiri mesilisi axbarat saheside ghulghula peyda qilmaqta

Eksiche, amérika edliye ministirliqining bash adwokati grégori garrié bush hökümitige wakaliten, güentanamodiki Uyghur tutqunlarni amérikigha qoyup bérishke bolmaydighanliqini bildürüp, fédéral sotning Uyghur tutqunlarni amérikigha qoyup bérish heqqidiki qararini aghdurup tashlishini telep qildi.

Amérika washin'gton rayonluq fédéral sot mehkimisining sotchisi urbina 7 ‏ - öktebirdiki sot qararida bush hökümitini güentanamodiki Uyghurlarni amérikigha qoyup bérishke buyrighan bolsimu, emma bush hökümitining naraziliq erzige asasen,amérika rayonluq fédéral sot mehkimisi güentanamodiki 17 neper Uyghurni amérikigha qoyup bérish heqqidiki qararini ijra qilishni toxtitip qoyghan idi.

Fédéral erziyet mehkimisining düshenbe künidiki sotida, bu Uyghurlarning qandaq orunlashturulidighanliqi heqqide yenila höküm chiqirilmidi. Terepler kéler yili 1 ‏ - ayning 20 ‏ - küni amérikining yéngi prézidénti barak obama wezipe tapshuruwalghandin kéyin ularning teqdiri heqqide toghra qarar élinishidin ümid kütmekte.

Amérika we bashqa gherb ellirining axbaratliri gu'antanamodiki Uyghurlarning teqdiri mesilisige muhim orun bérip kelmekte. Xewerlerde bu Uyghurlarning xitaygha qayturulsa xuddi ularni ölümge buyrighan bilen barawer ikenliki sherhiylenmekte. Közetchiler bolupmu, bu Uyghurlarning düshmen jengchiliri emes dep aqlinip bolghandin kéyinmu panahlinidighan dölet chiqmighanliqi üchün dawamliq gu'antanamoda turushqa mejbur boluwatqanliqini heqsizliq dep qarimaqta. Shuning bilen bir waqitta, insan heqliri teshkilatliri yawrupa parlaménti hemde amérika hökümitidin bu Uyghurlarni qobul qilishni teshebbus qilmaqta.