Америка җумһурийәтчиләр партийиси низамнамисидә хитайниң “шинҗаң” қатарлиқ җайлардики кишилик һоқуқ вә диний бузғунчилиқи тәнқид қилинған

Америка җумһурийәтчиләр партийисиниң флорида штатида чақирилған мәмликәтлик қурултийи сәйшәнбә күни мақуллиған партийә низамнамисидә хитай тәнқид қилинған.
Мухбиримиз әркин
2012.08.29

Низамнаминиң хитай билән болған мунасивәт һәққидики қисмида хитай кишилик һоқуқ хатириси вә хитайниң җәнубий деңиз мәсилисидики позитсийиси тәнқид қилинип, униң һечқандақ зөрүрийәт болмисиму, һәрбий күчини кеңәйтиватқанлиқи, тибәт, уйғур вә башқа районларда кишилик һоқуққа, диний әркинликкә бузғунчилиқ қилип, бастуруш елип бериватқанлиқи, пиланлиқ туғут сияситини йолға қоюп, кишиләрни бала чүшүрүшкә мәҗбурлиғанлиқи, хоңкоңниң демократийисигә бузғунчилиқ қилғанлиқи вә җәнубий деңизда җиддийчилик пәйда қилғанлиқи әйибләнгән.

Низамнамидә йәнә, әгәр хитай тинчлиқ вә сөһбәт принсипиға бузғунчилиқ қилип, тәйвән боғузиниң мәвҗут һалитини өзгәртишкә урунса, америкиниң “тәйвән мунасивәт қануни” ға тайинип, тәйвәнниң өзини қоғдишиға ярдәм беридиғанлиқи қәйт қилинған. Хитайниң содида хәлқара қаидә -түзүмгә хилаплиқ қилип, әқлий мүлк һоқуқи вә пул курси қатарлиқ мәсилиләрдә сахтипәзлик қиливатқанлиқи илгири сүрүлгән.

Әгәр, бу қетимқи сайламда җумһурийәтчиләр ғәлибә қилип һакимийәт йүргүзсә, юқириқи мәсилиләрдә хитайға қәтий позитсийә тутидиғанлиқини билдүргән.

Сәйшәнбә күни, сабиқ массачусетис валиси мит ромней җумһурийәтчиләрниң флорида штати темпа шәһиридә ечиливатқан қурултийида йетәрлик беләткә еришип, мәзкур партийиниң президент намзатлиқиға көрситилгән. У,11-айдики сайламда демократлар намзати, президент обама билән келәр нөвәтлик америка президентлиқини талишиду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.