Amérikida bala chüshürüsh opératsiyisi bilen shughullan'ghan doxtur öltürüldi
Muxbirimiz gülchéhre
2009.06.02
2009.06.02
Doxtur tillir bu yil 67 yashqa kirgen bolup, yekshenbe küni chérkawdin qaytishida qestke uchrap neq meydanda ölgen.
Tillérni öltürgen qatil hazirgha qeder téxi tutulmidi. Weqege shahid bolghuchilarning bildürüshige qarighanda, uninggha oq chiqarghan aq tenlik bir er kishi iken, u kök renglik aptomobil bilen qéchip ketken.
Amérikida chiqidighan axbarat wastiliride körsitilishiche, tillér buningdin 13 yil burunmu, özining shexsi ambolatoriyiside bala chüshürüshke qarshi kishilerning qestige uchrighan bolsimu, jéni aman qalghan iken. Uning ambulatoriyisi 1985 - yilida bala chüshürüshke qarshi teshkilatlar teripidin bomba qoyup partlitilghan.
Doxtur térllir 20 heptidin ashqan hamililernimu chüshürüsh opératsiyisi qilip kelgen bolup, téllirning bu herikiti bala chüshürüshke qarshi teshkilatlar teripidin qatilliq dep eyiblinip kelmekte iken. Emma bu qétim tillérning öltürülüsh weqesidin bu teshkilatlarmu intayin chüchügenlikini hem échin'ghanliqini ipadileshken.
Pilanliq tughut siyasiti yürgüziliwatqan xitaydimu hazirgha qeder 20 heptidin ashqan hamililerni mejburiy chüshürüsh opératsiyisi dawam qiliwatqan bolup, Uyghur élide bu siyaset téximu qattiq qolluq bilen ijra qiliniwatqanliqi melum shundaqla u jaydimu mezkur siyasetlerge qarshi heriketler yüz bergen idi.
Ilgiri pilanliq tughut siyasitini qollap, meschitlerde burmilap teshwiq qilghan harunxan hajimning yigirme nechche yérige, bir qisim kishiler teripidin pichaq tiqilghan bolsimu jéni aman qalghan, aqsuda pilanliq tughut ishxanisi bir qisim Uyghurlar teripidin partlitilghan weqege oxshash, pilanliq tughut siyasitige qarshi weqeler dawamliq yüz bérip keldi.
Adette qorsaqta 20 heptilik bolghan hamilining tughulghandin kéyin hayat qélish éhtimaliy intayin yuqiri bolidu. Bolupmu méditsina tereqqiy qilghan ellerde hayat qélish nisbiti téximu yuqiri.