Xoten shehiride ropash ayallar soda - saraylargha kirishtin cheklenmekte

Xoten wilayitidiki her derijilik hökümet organlirining xotende diniy yosunda kiyin'gen ayallarni kemsitish xaraktérlik teleplerni otturigha qoyghanliqi ashkarilanmaqta.
Muxbirimiz irade
2012-06-21
Élxet
Pikir
Share
Print


Hökümet da'irilirining bu xildiki telepliri roshen körsitilgen bir uqturush yéqinda xoten shehiridiki soda saraylirida közge chéliqqan.

Bularning tipik misalliridin biri xoten wilayetlik "Altun yultuz" soda cheklik mes'uliyet shirkiti tarqatqan bu xildiki bir uqturush bolup, uningda mundaq déyilgen: diniy puraqni suslashturush, diniy muhitni saplashturup we bazar tertipini qoghdash üchün wilayetlik partkom memuriy mehkime we sheherlik partkom xelq hökümitining telipige asasen ropash ayallarning soda - saray, tijaret orunlirigha kirishi men'i qilinidu. Soda - saraylarda diniy puraq alghan kiyim - kécheklerni sétish men'i qilinidu. Herxil qanunsiz ün - sin matériyallirini sétish men'i qilinidu.

2012 - Yili 6 - ayning 11 - küni tarqitilghan bu uqturush chet'eldiki tor betlerde qoyulghandin kéyin, Uyghurlar arisida küchlük inkas qozghidi. Ular buni Uyghurlarning milliy örp - adetliri, kishilik hoquqigha qilin'ghan tajawuz, dep tenqidleshti.

Téxi yéqindila qeshqer wilayetlik ayallar komitétimu ayallar béshigha yaghliq salmasliqqa ündilidighan mezmundiki "Güzel jamalimizni namayan qilip, sumbul chachlirimizni lepilditeyli" dep yézilghan bir lozunkini qeshqerdiki kocha - koylargha asqan. Dunya Uyghur qurultiyi bu xil heriketler Uyghur ayallirigha qilin'ghan haqaret, dep eyibligen idi.

Toluq bet