Amérika: xitay dunya soda teshkilatigha kirgende bergen wedilirini ijra qilmidi

Amérika soda wakaletchisi ishxanisi doklatta, xitay dunya soda teshkilatigha eza bolup kirgen 8 yildin béri bir qatar iqtisadi islahatlarni élip barghan bolsimu, lékin yéqindin buyan hökümet xitay karxanilirini yöleydighan we qoghdaydighan siyasetlerni yolgha qoyup, karxanilargha arilishishni kücheytkenlikini, bezi sahelerde wedisini ijra qilmighanliqini, dunya soda teshkilati aldidiki mejburiyitini ada qilish mesiliside éghir mesililer körülgenlikini tekitligen.

Doklatta mundaq déyilidu : "amérikidiki bezi kespiy orunlarning mölcherige qarighanda bu yil kirgendin buyan nurghun bisharetler xitayning bazar iqtisadigha qarap ilgirilesh qedimi pütünley toxtighanliqini körsetmekte."

Doklatta yene xitayning eqliy mülük hoquqini qoghdashni kücheytip, eqliy mülük hoquqigha tajawuz qilghuchilarning jinayi jawabkarliqini sürüshtürüsh jehettiki yétersizliklerni tügitishi telep qilin'ghan shuningdek xitayda saxta mallarni ishlesh we qanunsiz köchürüp tarqitish ehwalining yenila nahayiti éghirliqi, bu amérika karxanilirini éghir ziyan'gha uchritiwatqanliqi ilgiri sürülgen.

Doklatta, eger söhbet ikki terep arisidiki ixtilapni hel qilalmisa, amérikining ikkilenmey soda qanuni we dunya soda teshkilatining qa'ide - yosuni da'iriside "xitayning xelq'ara sodidiki wedisini ijra qilishigha kapaletlik qilidighanliqi" tekitlen'gen.