فىلىپپىن خىتاينىڭ جەنۇبىي دېڭىزدىكى چارلاش پاراخوتلىرىغا چۈشەندۈرۈش تەلەپ قىلدى

تاشقى ئىشلار مىنىستىرى ئالبېرت روسارىئونىڭ بىلدۈرۈشىچە، خىتاينىڭ نېفىت ۋە تەبىئىي گاز زاپىسى مول دېڭىز تەۋەلىكىگە چارلاش پاراخوتلىرىنى ئەۋەتىشى ئىككى تەرەپ ئارىسىدىكى يېڭى جىددىيچىلىكلەرگە سەۋەب بولغان.

خىتاي ئاخباراتلىرىغا قارىغاندا، خىتاينىڭ چارلاش كېمىلىرى 27-دېكابىر خەيكۇ شەھىرىدىن جەنۇبىي دېڭىزغا قاراپ چارلاشقا يول ئالغان.

خىتاي تەرەپ بۇنى «ئۆز دېڭىز تەۋەلىكىنى قوغداش» دەپ چۈشەندۈرگەن بولسىمۇ، ئەمما فىلىپپىن ھۆكۈمىتى قوغدىلىدىغان رايون تەۋەلىكىنى ئېنىق كۆرسىتىشنى تەلەپ قىلغان.

روسارىئو مۇنداق دېدى: ھەممەيلەن شۇنداق غەزەپلەندۇق، بىئارام بولدۇق. شۇڭا بىز ئۇلاردىن بۇنى شەرھلەشنى تەلەپ قىلدۇق، ئەمما ئۇلاردىن ھازىرغىچە سادا يوق.

خىتاي بەلگىلەنگەن خەلقئارا قانۇن-مىزانلارغا خىلاپ ھالدا جەنۇبىي دېڭىزنىڭ كۆپىنچە قىسمىنى ئۆزىنىڭ، دەپ ئېلان قىلىپ مەزكۇر دېڭىز بىلەن چېگرىلىنىدىغان بارلىق دۆلەتلەرنىڭ چىشىغا تەگمەكتە ئىدى.