Чеңдуда франсийиниң Carrefour сода базириға бомба қоюлған

Радиомиз хәвири, бүгүн йәни сәйшәнбә күни кәчтә, сичүән өлкисиниң чеңду шәһиридики франсийә ширкитигә аит Carrefour сода базириға намәлум киши яки кишиләр тәрипидин бомба қоюлған. Бомба партлаш алдида байқилип, сақчилар тәрипидин вәқәниң алди елинған.
Мухбиримиз шоһрәт һошур
2010-04-20
Share

Хәвәрдә билдүрүлүшичә, сақчилар вәқә гумандари дәп қаралған бир кишини тутқан; әмма гумандарниң кимлики, четишлиқ кишилири һәққидә мәлумат беришни рәт қилған.

Вәқә чеңду шәһиридики Shuangqiao йәни қош көврүк дегән җайда йүз бәргән. Нөвәттә мәзкур сода базири вә әтраптики кочилар сақчилар тәрипидин қамал қилинған. Вәқә әтраптики аһалиләрдә қаттиқ әнсизчилик пәйда қилған.

2008 ‏ - Йилидики олимпик һарписида хитай билән франсийә арисида тибәт мәсилиси тоғрилиқ ихтилап йүз бәргән. Әнә шу чағда хитайдики бир түркүм кишиләр франсийиниң Carrefour ширкитини җазалаш һәққидә аммиви һәрикәт башлиған иди, һәтта мәзкур ширкәтниң бәзи шәһәрләрдики сода базарлири һуҗумға учриған иди.

Бу қетимқи вәқәниң әнә шу олимпик мәзгилидики хапилиқниң давами вә яки ширкәтләр ара риқабәттин келип чиққан тәһдит характерлик һуҗум икәнлики һазирчә ениқсиз һаләттә турмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт