Rabiye qadir amérika dölet mejlisi ezalirini “5-Iyul weqesi” din kéyin qolgha élin'ghan Uyghurlar mesiliside xitaygha bésim ishlitishke chaqirdi
2012.07.25
Mezkur guwahliq bérish yighinini amérika dölet mejlisi tashqi ishlar komitéti chaqirghan bolup, bu mezkur komitét xitay tehditini tekshürüsh témisi astida chaqirip kéliwatqan guwahliq bérish yighining ikkinchi qismidur.
Mezkur yighin'gha yene “Xelq'araliq tibet herikiti” teshkilatning mu'awin prézidénti buchun tséring ependi, falun'gong möriti xeyli ependi we “Hörlük shu'an” teshkilatining qurghuchisi jarét genser qatarliqlar qatniship, xitaydiki kishilik hoquq depsendichiliki heqqide guwahliq berdi.
Rabiye qadir xanim asasliq 2009-yilidin kéyin Uyghur élide yürgüzülgen siyasetler, bolupmu “5-Iyul weqesi” din kéyin ölüm jazasi bérilgen, türmige tashlan'ghan we iz-déreksiz ghayib bolghan Uyghurlar mesilisi, “ Shinjang xizmet yighini” hemde xitayning köchmen yötkesh siyasiti heqqide toxtaldi.
Rabiye xanim yene, xitay hökümitining Uyghur tilini ma'arip sahesidin pütünley chiqirip tashlash üchün jiddiy heriketke ötkenliki, Uyghurlarning diniy étiqad erkinlikini mislisiz derijide chekligenliki, chekleshning bu yil ramzan mezgilde téximu kücheytilgenlikini bayan qildi.
U axirida amérika dölet mejlisige 8 türlük teklip sunup, mejlis ezalirini “5-Iyul weqesi” din kéyin qolgha élin'ghan Uyghurlarning sani, qamalghan jayi qatarliqlarni ashkarilash we ularni jiddiy qoyup mesiliside xitaygha bésim ishlitishke chaqirdi.