Gogulning bir qisim iqtidarliri xitayda kashiligha uchridi

Birleshme agéntliqining bildürüshiche, xitaydiki abontlar gogul sehipisige kirginide "gogulning tewsiye qilghan sehipiliri" deydighan alahidilikini ishlitelmigen. Gogulning bayanatchisi jéssika pawil "gogulning bu alahidiliki kashiligha uchritildi" dep bildürdi.

Ötken ikki aydin béri, intérnét erkinliki mesiliside xitay terep bilen tirkiship kéliwatqan Google shirkiti xitaydiki izdesh mulazimétérini xongkongdiki mulazimétérigha yötkigen. Emma, xitay da'iriliri buningghimu unimay gogulning ruxsitini bikar qilish bilen tehdit qilghan. Netijide gogul bir qedem keynige chékinip, abuntlar "özi xalighan teqdirde" , andin ularni gogulning xongkong merkezlik izdesh matorigha ulashturidighan bir sehipe chiqardi.

Xitay da'iriliri intérnét üstidiki kontrolluqini kündin - kün'ge ashurup barmaqta. Ular bir yaqtin tor sehipilirini cheklise, yene bir yaqtin tor abontlirining kimlik melumatlirini yighish herikitini kücheytmekte. Yéqinda xitay da'iriliri omumyüzlük uqturush chiqirip, torda oyun oynash üchün kirgenlergimu aldi bilen kimlikini tizimlitish shertini qoydi. Ular bu qararini yash - ösmürlerning tor oyunlirining ziyinigha uchrishining aldini élish üchün dep körsetti.