Шинхуа агентлиқиниң қаришичә, сақчи хунәндики яңақ торт маҗирасида хитайға җәриманә қоюп, вәқәни “адил бир тәрәп қилмиған”

Шинхуа ахбарат агентлиқи җүмә күни мақалә елан қилип, хунән сақчилириниң йеқинда йүз бәргән яңақ торт сатқучи уйғур билән бир хитай херидар арисидики маҗирани адил бир тәрәп қилмиғанлиқини билдүрди.
Мухбиримиз әркин
2012.12.07

Мақалә шинхуа агентлиқиниң ваң әнхуй исимлик язғучиси тәрипидин қәләмгә елинған. Мақалида илгири сүрүшичә, қанун иҗра қилғучилар яймичилар тәрипидә туруп иш беҗирсә, бу яймичиларниң хорикини өстүрүп қойидикән.

Йеқинда хунәндә уйғур яймичилар билән йәрлик хитайлар арисида коллектип җедәл йүз бәргән. Җедәлни бир хитай херидарниң кесип таразида тартип болған яңақ тортни сетивелиштин йенивелиши кәлтүрүп чиқарған. Җедәл наһайити тезла йәрлик хитайлар билән уйғурлар арисидики коллектип маҗираға айланған. Җедәлдә 3 тонна яңақ торт вәйран қилинған, 16 ғалтәк бузуп ташланған вә нурғун уйғур яймичи яриланған иди.

Сақчи тәрәп җедәл чиқарған хитайға җәриманә қоюп, уйғур яймичиларға 24 миң доллар төләм төләшни буйруған. Мәзкур вәқә хитай тор бәтлиридә ғулғула қозғап, уйғурлар йәнә һуҗум нишаниға айлинип қалған иди.

Охшашла, шинхуа агентлиқиниң мақалисидә уйғур яймичилар йошурун тәнқид қилинған. Мақалида, бу хил вәқәләрни миллий пәрққә қарап бир тәрәп қилиш тәнқид қилинип, уйғур яймичиларниң баһани тоғра қоюши, икки тәрәп бир -бирини һақарәтләйдиған сөзләрни қилмаслиқи тәләп қилинған.

Чәтәлдики уйғур паалийәтчилириниң илгири сүрүшичә, хитай ахбарати изчил мәқсәтлик сәлбий хәвәр тарқитип, уйғурларниң образини хунүкләштүрүп кәлгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.