«Җуңго ишлар комитети» икки уйғур сиясий мәһбусниң җаза муддити тошуп қоюп берилгән болуши керәкликини билдүрди

Америка дөләт мәҗлиси вә мәмури даирилириниң «җуңго ишлар бирләшмә комитети» хитай даирилиригә хитаб қилип, уйғур сиясий мәһбуслиридин мәһбубә абләш вә абдуғени мәмтиминниң қамақ җаза муддити тошқанлиқи, уларниң қанунға асасән қоюп берилгән болуши керәкликини билдүрди.
Мухбиримиз әркин
2011-10-21
Елхәт
Пикир
Share
Принт

Мәзкур комитетниң илгири сүрүшичә, «бөлгүнчилик» билән әйиблинип, 3 йиллиқ қамақ җазасиға һөкүм қилинған мәһбубә абләшниң қамақ җазаси бу йил 8‏-айда тошқан. «Чәтәлгә дөләт мәхпийәтлики йәткүзүш» билән әйиблинип, 9 йиллиқ қамақ җазасиға һөкүм қилинған абдуғени мәмтиминниң қамақ җазаси тошуп, бу йил 7-айда қоюп берилиши керәк иди.

Бирақ, уларниң қоюп берилгәнликигә даир һечқандақ шәпә йоқ. Әгәр улар қоюп берилгән болса, уларниң саламәтлик әһвали, һазир қәйәрдә туруватқанлиқиға даир тәпсилатлар мәлум әмәс. Әгәр қоюп берилмигән болса, уларниң немә үчүн қоюп берилмигәнлики, хитайниң қандақ сәвәбләрни көрситип, уларни давамлиқ тутуп туруватқанлиқи бир сир.

Мәһбубә шинҗаң хәлқ радио истансисиниң сабиқ хизмәтчиси болуп, у 2008‏-йили 8‏-айда хитайниң «қош тиллиқ» маарип сияситини тәнқид қилип қолға елинған. Бирақ даириләр униң қандақ җинайәт билән әйибләнгәнликини елан қилмиған иди. Америкидики «диалог» фонди җәмийитиниң кейин ашкарилишичә, у« бөлгүнчилик» билән әйибләнгән.

Абдуғени мәмтимин журналист вә оқутқучи болуп, 2002-йили 7‏-айда қолға елинған. Кейинки йили 6‏-айда қәшқәр оттура сот мәһкимиси тәрипидин 9 йиллиқ қамақ җазасиға һөкүм қилинған. У «дөләтниң бирликигә тәһдит селиш, дөләт мәхпийәтликини ашкарилаш вә чәтәлгә йоллаш» билән әйибләнгән иди.

Пикирләр (0)
Share
Толуқ бәт