Зорлап сетилған кала сеғиш машиниси 22 яшлиқ сәйдулланиң җениға замин болди

Уйғур елиниң йеза ‏- қишлақлирида йеза рәһбәрлири билән бир қисим завут, карханилириниң ғәйрий әхлақий һәмкарлиқлири, шу җайлардики истемалчиларниң мәнпәәтлирини дәхлигә учратмақта вә бәзидә паҗиәләрни кәлтүрүп чиқармақта.
Мухбиримиз шөһрәт һошур
2011-01-25
Share

Ғулҗа шәһириниң пәнҗим йеза ара мәһәллисидә олтурушлуқ бир беқимчи аилиниң 22 яшлиқ оғли сәйдулла өткән һәптә, кала сеғиш машинисини ишлитиватқанда ток соқуветип һаятидин айрилған.

 Мәһәллидики аһалиләрниң инкас қилишичә, йеза рәһбәрлири мәһәллидики беқимчи аилиләрни кала сеғишта әнәниви усулидин ваз кечишкә вә кала сеғиш машинисини ишлитишкә мәҗбурлиған; униң үстигә беқимчиларниң кала сеғиш машинисини өзлири таллап сетивелишиға йол қоймиған. Ара мәһәллидики беқимчиларға зорлап сетилған бу машиниларниң техникилиқ қурулмиси мукәммәл болмиғачқа, бу қетимқи паҗиә келип чиққан.

Нөвәттә сәйдулланиң ата-аниси, сүпәтсиз кала сеғиш машинисини ишләпчиқарған завут үстидин шикайәт қилмақчи болғанда, йеза рәһбәрлири вә шәһәрниң алақидар органлири уларға түрлүк тәлим ‏- тәрбийиләр билән тосқунлуқ қилмақта. Әмма, мәһәллидики аһалиләр болса, йеза рәһбәрлириниң мәзкур машиниларни сетивелиш җәрянида ишләпчиқарған завутлардин пара алғанлиқини, шуңа у завутларға берип әрз қилишқа тили қисқа келиватқанлиқини билдүрмәктә. Әмма, хитайниң йеза игилик қанунида, деһқан -чарвичиларға ишләпчиқириш пилани вә усулини мәҗбурлашқа болмайдиғанлиқи, ишләпчиқириш васитилирини өзлири әркин сетиш вә сетивелиш һоқуқиға игә икәнлики ениқ билдүрүлгән.

Мәлум болушичә, һаятидин айрилған сәйдулла мусибәтлик аилиниң икки пәрзәнтидин бири. Нөвәттә сәйдулланиң ата-аниси әл-җамаәткә, оғлиниң җениға замин болған завут һәм йеза рәһбәрлири үстидин дава ачидиғанлиқини, һәрқандақ бир тәһдитниң уларни бу йолдин ваз кәчтүрәлмәйдиғанлиқини билдүрмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт