Су чечиш байрими күни камбодҗада көврүк чүшүп кетип көп адәм өлүш паҗиәси йүз бәрди

22-Ноябир күни йәни шәрқий җәнубий асия әллириниң су чечиш байриминиң ахирқи күни камбодҗада көврүк чүшүп кетиш һадисиси йүз берип, 456 адәм өлгән вә 700 дин артуқ адәм яриланған.

Мунасивәтлик мәлуматларға асасланғанда, бу паҗиә 2006- йили мәккидә йүз бәргән һәҗ паалийитидики қистаңчилиқ сәвәбидин 362 адәм өлгән вәқәдин кейинки йәнә бир қетимлиқ аммиви паалийәт җәрянида көп адәмниң өлүш-ярилиниш һадисиси һесаблинидикән. Камбодҗа һөкүмити бу вәқәни камбодҗада йүз бәргән әң еғир трагедийә дәп елан қилип, 25- ноябир күнини камбодҗада дөләт бойичә матәм күни дәп елан қилип, шу күни дөләт байриқиниң йерим чүшүрүлидиғанлиқини җакарлиған.

 Нөвәттә бу қетимлиқ паҗиә һәққидә хилму-хил пәрәзләр оттуриға қоюлмақта икән. Камбодҗаниң һөкүмәт мәлуматлирида дейилишичә, 22-ноябир күни кечидә тәхминән 3 милйондәк киши пайтәхт пхном пен шәһиригә орда алдидики дәряда өткүзүлидиған қолвақ мусабиқисини көрүшкә топланған. Мусабиқә аяғлишишқа аз қалғанда кишиләр арисида аралға тутушидиған чоң көврүк мустәһкәм әмәскән дегән өсәк сөзниң тарқилиши билән вәһимә пәйда болуп, көврүктә еғир қистаңчилиқ йүз бәргән. Һәтта бәзиләр өзини көврүк үстидин дәряға етип, техиму көп адәмниң өлүш-ярилиниш вәқәси келип чиққан болуши мумкин икән.

Әмма, йәнә башқа инкаслардин мәлум болушичә, сақчилар көврүк үстидики қистаңчилиқни пәсәйтиш үчүн, кишиләр топиға юқири бесимлиқ су чачқан. Нәтиҗидә кишиләр арисида паракәндичилик йүз берип, нурғунлиған кишиләр өз җенини қутулдуруш үчүн һәр тәрәпкә қачқан. Вәқәдә өлгәнләрниң көпинчиси дәссилип өлгән һәм қистаңчилиқ сәвәбидин нәпси боғулуп өлгән болуши мумкин икән.

Мәлум болушичә , бу қетим өлгәнләр ичидә аяллар нисбәтән көп болуп, өлгәнләр арисида йәнә камбодҗаға саяһәт үчүн кәлгән чәтәлликләрму бар икән.