Xelq'ara sot mehkimisining teptishliri kazafiyning oghli seyful islam bilen gheyriy resmiy uchurushup, teslim bolush mesilisini muzakire qilghan

Xelq'ara sot mehkimisi seyful islam bilen kélishtürgüchilerning wasitichilikide “Gheyriy resmiy” alaqe qilghanliqini bildürdi.

Xelq'ara sot mehkimisining teptishi lu'is moréno okampo jüme küni bayanat élan qilip, seyful islam bilen alaqe qiliwatqanliqi, u teslim bolsa uning adil sotlinidighanliqini bildürdi. Biraq u söhbetke kimlerning wasitichilik qiliwatqanliqi, seyful islam teslim bolsa uning gollandiyidiki sot mehkimisige qandaq élip bérilidighanliqi qatarliq tepsilatlarni ashkarilimidi.

Okampo, seyful islam xelq'ara sot mehkimisige teslim bolsa, sot mehkimiside uninggha söz bérilidighanliqi, uning resmiy höküm élan qilin'ghan'gha qeder “Gunahsiz” dep qarilidighanliqini bildürgen.

Xelq'ara sot mehkimisi kazafiy, seyful islam we liwiye axbarat idarisi bashliqi sununi üstidin “Urushi jinayiti sadir qilish”, “Insaniyetke qarshi turush ” qatarliq jinayetler bilen eyiblep, tutush buyruqi chiqarghan idi. Lékin kazafiy birqanche kün ilgiri liwiyilik isyanchilar teripidin öltürülgendin kéyin, xelq'ara sotning uning heqqidiki tutush buyruqi küchidin qalghan.

Biraq seyful islam xelq'ara sotning tutush buyruqi chiqarghan asasliq adimi bolup qalghan idi. Xewerlerdin melum bolushiche, liwiye milliy kéngishi xelq'ara jem'iyetning bésimida kazafining ölümi üstidin tekshürüsh élip baridighanliqi we uni öltürgen isyanchilarni jazalaydighanliqini élan qilghan.