B d t kishilik hoquq kéngishi qazaqistanning Uyghur musapirlirini xitaygha qayturush qilmishidin qayghurghanliqini bildürdi

B d t kishilik hoquq kéngishining bir mutexessisler komitéti teyyarlighan doklatta, qazaqistanning xelq'ara puqraliq we siyasiy heqler ehdinamisini ijra qilish ehwali közdin kechürülüp, uning bolupmu siyasiy panahliq we musapirliq salahiyitige toshidighan özbék we Uyghurlarni dölitige qayturup, musapirlarni kishilik hoquqi depsendichilikke uchrash éhtimalliqi mewjut döletlerge qayturmasliq toghrisidiki xelq'ara prinsiplargha xilapliq qilghanliqidin ilgirilep qayghurghanliqini ipadiligen.

Doklatta, shangxey hemkarliq teshkilatigha eza qazaqistanning mezkur teshkilat ramkisi ichide bergen diplomatik wedisige asasen, musapirlarni ten jazasi we éghir kishilik hoquq depsendichiliki roy bériwatqan bu döletlerge özi xalap qayturuwatqan bolushi mumkinlikini eskertip, qazaqistan da'irilirini xelq'ara ehdinamilerge ri'aye qilishqa chaqirghan.

Merkizi nyuyorktiki “Junggo kishilik hoquq teshkilati” qazaqistanning yéqinda ershidin isra'ilni xitaygha qayturuwetkenlikini shundaqla yene, 28 neper özbék musapirni özbékistan'gha qayturup bergenlikini eskertip, b d t kishilik hoquq kéngishining mezkur doklatidiki teklip pikirlerni qarshi alidighanliqini bildürdi.